D'Reegele wäerte méi streng ginn, sollten d'Leit sech net un déi aktuell Mesuren halen. Dat sot d'Paulette Lenert e Méindeg de Moien um Pressebriefing.

Pressebriefing vun der Paulette Lenert am Replay

Fir ze kontrolléieren, ob sech wierklech un déi aktuell Mesurë vu Fermeture vu Restauranten a Caféen gehale gëtt, ass vun e Méindeg un d’Police ënnerwee. Vun en Dënschdeg u ginn d’Leit, déi sech net un d’Verbueter halen, verbaliséiert.

Eent vun den Ziler wier et, ze verhënneren, datt de Gesondheetssecteur déi sanitär Kris net méi packt, dat duerch Mesuren, déi een hëlt. Do ginn et zwou Haaptschrauwen, esou d’Paulette Lenert. Dat geet duerch d’Aschränkung vun der Beweegung, d’Reduktioun vun de soziale Kontakter an duerch d’Entlaaschte vum Gesondheetssecteur.

Lëtzebuerg ass net am Lockdown, mä villméi an enger Phas vu limitéierten Deplacementer, wou awer all vital Zerwisser fonctionéieren. Et gëllt d'Verbreede vum Coronavirus ze limitéieren an op Zäit ze spillen. Dee Message war et e Méindeg am spéide Moie vun der Gesondheetsministesch, déi bannent 15 Stonnen eng zweete Kéier virun d'Press getruede war.

D'Zuel vun infizéierte Patienten läit entretemps bei 81, en entspriechende Round-Up gëtt vun elo un all Moie géint 9 Auer decidéiert.

Paulette Lenert, Extrait 1

Et war och nees de Rappell, datt déi eeler Leit doheem solle bleiwen. Dat wier net fir hir Mobilitéit anzeschränken, mä fir si selwer ze schützen.

D’Mesure, d’Geschäfter zouzemaachen, wier fir esou mann Plaze wéi méiglech ze hunn, wou d’Leit sech kënnen ustiechen. A Frankräich gesäit et aus, datt een nach méi drastesch Mesurë misst huelen, d’Leit géife sech do nämlech net drun halen. Dat dierft net zu Lëtzebuerg geschéien. Et wéilt een net nach méi strikt Mesurë mussen en Place setzen.

D'Ministesch huet ze verstoe ginn, datt een natierlech och a Frankräich misst mat engem Zoumaache vun de Minetter Grenzen rechnen an och da soll eng Exceptioun fir Frontalieren gëllen, wouriwwer awer nach verhandelt gëtt.

Entreprisen an Infrastrukture mussen dogéint opbleiwen: Dat haten de Premier Xavier Bettel an d’Gesondheetsministesch Paulette Lenert e Sonndeg den Owend schonn annoncéiert. E Méindeg de Moien ass d’Paulette Lenert nach emol drop agaangen, wat weider opbleift: d’Dréckkëschten ofhuelen, de Secteur vun der Alimentatioun, Laboen, de Gesondheetssystem, de Fleegesecteur, ëffentlechen Transport, Banken...

Zanter e Méindeg de Moie sinn déi däitsch Grenzen zou, wann ee vu Lëtzebuerg aus an Däitschland fuere wëll. Dat wier déi Lëtzebuerger Regierung e Sonndeg duerch een Appell gewuer ginn, et hätt ee sech dofir och net kënnen drop preparéieren.

D’Regierung huet dofir séier den Certificat op den Internetsite gesat. Vun en Dënschdeg u muss een den Certificat bei sech hunn, soss riskéieren d’Persounen op der Grenz stoen ze bleiwen. Frankräich huet nach keng esou Mesure geholl, esou d’Paulette Lenert, mä d’Ministesch huet ze verstoe ginn, datt si net dovunner ausgeet, datt Frankräich bei där Positioun bleiwe wäert.

Paulette Lenert, Extrait 2

Ronderëm d’Spideeler goufe Crèchen agesat, fir d’Kanner vun deene Leit, déi am Secteur schaffen, ënnerzekréien. Där Crèchen hätt een zu Rëmeleng, Biwer, Stroossen, Ettelbréck, Habscht, Ëlwen, Wolz, Nidderaanwen a bei der Zitha Klinik installéiert.

Ma et wëll een déi Frontalieren, déi een néideg brauch, well se am Fleegesecteur schaffen, hei zu Lëtzebuerg behalen. Dofir kënnen déi an Hoteller ënnerkommen, déi eidel stinn. Och mat hire Familljen.

Wat d’Mesure fir Patronen ugeet, war et d’Annonce, datt d’Cotisations sociales ausgesat ginn. Den Delai fir de Congé pour raisons familiales rembourséiert ze kréien, géif och adaptéiert ginn, fir kee Problem beim Cash Flow ze provozéieren.

Wat d’Stocke vun Schutz-Outilen ugeet, huet d’Paulette Lenert erkläert, datt een nach zwee Volle vun der Cargolux erwaart. Et géif een versichen vun iwwerall wou et méiglech ass, därer Gidder ze kréien.

Coronavirus: Aktuell Situatioun hei am Land
D'Caroline Maart huet déi wichtegst Informatioune vum Pressebriefing vun der Paulette Lenert zesummegefaasst.

Online-Plattform fir Liewensmëttel

D'Francoise Schlink vum Mëttelstandsministère huet annoncéiert, datt wäert eng Online-Plattform gemaach ginn, fir kënne Liewensmëttel Online ze bestellen. Dat ass fir vulnerabel Leit, respektiv Leit iwwer 65 Joer. Disponibel sinn eng 40 Produiten, plus frëscht Uebst a Geméis.

Restauranten a Caféë kënne Chômage partiell ufroen, ma kënnen och mat Take-Away a Liwwerservice weider funktionéieren. Employéen aus deem Secteur hunn deemno net d'office e Recht dorop Doheem ze bleiwen.

Detailer vum Dr Romain Nati

De Verlaf vun der Krankheet: se kann zu enger Longenentzündung féieren. Normalerweis ginn esou Infektiounen anti-viral behandelt, allerdéngs gëtt et aktuell kee Medikament dofir. Et gëtt awer e Medikament dat kéint hëllefen, ma dat nach net kommerzialiséiert ass. 

A schlëmme Fäll muss Sauerstoff zougefouert ginn. An nach méi schlëmme Fäll musse Patienten esouguer kënschtlech beotemt ginn.

Den CHL huet de Service national de maladies infectieuses a wäert sech, soulaang d'Disponibilitéite bestinn, ëm Corona-Fäll këmmeren. Leit mat méi banalen Infektiounskrankheete kéinten och op anere Statioune behandelt ginn. Wann déi Capacitéiten net méi duerginn, ginn d‘Patienten op déi 4 Spideeler verdeelt.

An normalen Zäiten huet de CHL 24 Ventilatiounsplazen. Déi kéinten op 50 opgestockt ginn. Dofir missten awer zum Beispill Operatiounssäll genotzt ginn.

Aktuell just 1 Patient mat kënschtlecher Beootmung. Bis ewell goufe 15 Patienten am CHL traitéiert.

Aner programméiert Aktivitéite géifen no an no erofgefuer ginn.

Wat de Congé pour raisons familiales ugeet, misst ee pragmatesch dorun erugoen. Et wier awer dat lescht Mëttel, wann näischt anescht méi geet. Aktuell géif et awer keen Enkpass u Personal.

Och de Stock u Maske wier aktuell gutt. Et géif een awer ganz virsiichteg domat ëmgoen a se net onnëtz verschwenden.

En cas de doute: éischter Paracetamol.

Detailer vun der Dr Françoise Berthet

Vulnerabel Persounen, dat heescht Leit iwwer 65, Leit, déi zockerkrank sinn oder an enger Kriibsbehandlung sinn, musse besonnesch oppassen. Op de sozial Reseauen zirkuléieren Informatiounen, deenen no de Virus awer fir jidderee liewensgeféierlech wier. D‘Doktesch Françoise Berthet vun der Direktioun vun der Santé sot dozou e Méindeg de Moien et wier net ausgeschloss, datt och Jonker eng uerg Form vum Virus kéinte kréien. Opgrond vun den Donnéeën, déi d’Santé huet, géing et och 1 Prozent vun uerge Fäll bei Jonken ginn.

"Et ass also effektiv méiglech, datt eng jonk Persoun, ouni d’Facteure vu Vulnerabilitéit zum Covid, eng grav Form vun der Krankheet kann entwéckelen".

Extrait Dr Françoise Berthet

Eng weider Fro vun de Journaliste war wéi vill Better et fir Intensiv Soinen am Land ginn. D’Äntwert war 169. Dorënner sinn awer och Better, déi fir mëttel Soine virgesi sinn, mä zu all Moment séier fir intensiv Soinen kënnen ëmgestallt ginn.

Den Taux d‘occupation actuel gëtt net public gemaach.

Maske si sënnvoll fir Leit, déi de Virus hunn, fir dass déi keng aner Leit ustiechen. Zum Deel kënne si och gesond Leit schützen. Leit, déi an direktem Kontakt mat kranke Leit sinn, brauchen eng Mask, déi och Partikel filtert.

Beootmungsmaschinne ginn et nach ëmmer ze kafen. Dat heescht am Noutfall kéint een där nach ëmmer besuergen, sollt dat néideg ginn. De Problem ass éischter genuch Personal ze hunn, fir dës Patienten ze versuergen.

Bis ewell sinn ongeféier 4 bis 5 Corona-Patienten erëm geheelt. Als geheelt kann nëmmen e Patient ugesi ginn, dee 14 Deeg no der schlëmmer Phas vun der Infektioun keng Symptomer méi huet.

D‘Tester bei vulnerabele Leit si sënnvoll, fir kënnen ze plangen wat ronderëm muss organiséiert ginn, a fir d‘Ëmfeld ze warnen.

Kris wesentlech méi schlëmm wéi 2008/2009

Scho méi wéi 200 Ufroen a méi wéi 170 offiziell Demanden, seet den Tom Theves vum Ministère de l'Economie. Eng extrem héich Zuel kéime vu klenge Betriber.

Dës Kris wier wesentlech méi schlëmm wéi 2008/2009.

De Problem vun den Independante wier erkannt ginn. Et wier eng komplett nei Situatioun an et géif een dru schaffen, fir Solutiounen ze fannen.

Et wier elo virop wichteg, dofir ze suergen dass d‘Leit hir Aarbechtsplaz kënne behalen. Dofir géif och elo d‘Personal bei der Adem opgestockt ginn, fir méiglechst séier kënnen Dossiere fir de Chômage partiel ze traitéieren.

Congé pour raisons familiales iwwer 1.400 Mol ugefrot

Am Prinzip ass dëse Congé geduecht fir Leit, déi Kanner an der Schoul/Crèche hunn, sou den Abílio Fernandes vum Ministère de la Sécurité sociale. E kéint awer och op Leit, deenen hir Kanner normalerweis vun de Grousseltere versuergt ginn, ausgedeent ginn.

Den normale Congé pour raisons familiales gëtt net fir Covid genotzt.