Um Mëttwoch war et déi traureg Nouvelle, dass de Jay Schiltz no schroer Krankheet am Alter vun 62 Joer gestuerwen ass.

De Jay Schiltz war dem grousse Publikum als Kabarettist mat schaarfer satirescher Fieder a bëssegem Humor bekannt.

Hie war iwwer Jore Member vun der RTL-Redaktioun um Radio an op der Tëlee, hie war Chefredakter vum 100,7 an zu Lescht bei eis op der Antenn an der Emissioun "5 vir 12" derbäi.

Der Famill vum Jay Schiltz eist opriichtegt Bäileed.

Al Ginter, Lucien Czuga, Christiane Kremer, Jay Schiltz a Gérard Valerius. Foto vum 26. Januar 2020. /

Noruff op de Jay Schiltz/Reportage Christiane Kremer

Vum Christiane Kremer

Léiwe Jay, am leschte Mail, deen s de geschéckt hues, hues de geschriwwen: "Wann et sollt goen, mellen ech mech!" Dat ass nach kee Mount hier. An iergendwéi hu mer all, déi am Mail stoungen, gehofft, datt s de dech géifs mellen an dee Projet, fir deen s de deng wuel lescht Texter geschriwwen hues, kéint vun eis all zesumme op d'Bün bruecht ginn.

Déi leschte Kéier, wou mer eis gesinn hunn, war am Januar, hei am Studio bei der Emissioun 5vir12, zu där s de zënter e puer Méint gehéiert hues an déi s de mat denger direkter, pickeger, pointéierter an awer dréchener Manéier beräichert hues.

Du bass kengem eng schëlleg bliwwen, hues ausgedeelt, ob s de als Journalist kommentéiert hues oder op der Kabaretsbün stoungs.

Mä du hues ni gezéckt, dech och selwer op d'Schëpp ze huelen, vrun allem, wéi s de dech eng Zäitlaang zeréckgehalen hues, fir net an Interessekonflikter ze geroden.

An de laange Joren, wou mer hei beim Radio oder bei der Tëlee zesummegeschafft hunn, mä och dono wa mer eis begéint hunn, hu mer dacks diskutéiert, awer och vill gelaacht. Mir hunn iwwer Texter a Bicher an Theaterstécker a Cabaretsprogrammer geschwat, awer och iwwer Futtball- ech erënnere mech vrun allem un deng Freed no der Final vun der Champions-League 1999.

Besonnesch markéiert huet mech en Interview mat der iwwer däi Buch "Aschengänger", an deem s de d'Thema vun der Shoah an d'Visitt vun Auschwitz op eng ganz touchant, déifgrënneg a literaresch Manéier upaaks.

Du wäerts feelen, Jay, vrun allem denger Famill, mä och eis all, als een, deen emol gär ausgeschwat huet, wat huet musse gesot ginn. Vläicht net ëmmer nuancéiert, awer ëmmer argumentéiert.

Dat war, ass a bleift deng Stäerkt, well deng Texter an Theaterstécker bleiwen eis. A vrun allem d'Erënnerung un däin Humor, deng Jovialitéit an däin Talent, gären um leschte Stëppel eppes richteg Guddes aus der Fieder ze zauberen.