Weltwäit ginn den Ament Leit op d'Strooss, dat an der Suite vum Dout vum US-Afroamerikaner George Floyd, deen zu Minneapolis Affer vu Policegewalt gouf.

Och zu Lëtzebuerg gëtt en däitlecht Zeeche gesat. Eng 1.500 Mënschen hunn e Freideg de Mëtteg virun der US-Ambassade protestéiert.

Manif géint Rassismus / Reportage Pit Everling

Lëtz Rise Up“ heescht déi nach jonk Organisatioun, déi op de sozialen Netzwierker zum Protest opgeruff huet. Rassismus ass kee rengen amerikanesche Problem, sou ee vun de Messagë vun der Co-Organisatrice Marissa Daruwalla. Rassismus zu Lëtzebuerg wier notamment bei der Integratioun an d'Lëtzebuerger Gesellschaft ze gesinn.

Rassistesch Erfarunge fänke schonn an der Spillschoul oder an der Primärschoul un. Falsch Orientatiounen, wou schwaarz Kanner ze héiere kréien, datt se méi Chancen am Lycée Technique hunn, ewéi am Lycée Classique, oder dass se verschidde Beruffer an e Studium solle si loossen. Dës falsch Orientatioun huet als Konsequenz eng Mindestloun-Aarbecht, wat nees Suitten um Wunnengsmaart huet.

Wat d'Policegewalt géintiwwer Afrikaner ugeet, do géifen et fir Lëtzebuerg keng Zuele ginn, an dofir kéint een och dozou kee Kommentar ofginn, sou nach Marissa Daruwalla.

Vill Leit hate sech op de Lampertsbierg deplacéiert, dat trotz kalem, sabbelegem a lëftegem Wieder. Et wier alles disziplinéiert a friddlech ofgelaf, heescht et vun der Police, déi dat Ganzt encadréiert huet a vun enge 1.500 Participante schwätzt.

Eng grouss Protestaktioun a Coronazäiten ass natierlech net evident. Manifestatioune mat enger onbegrenzter Unzuel si jo zënter kuerzem nees erlaabt. D'Organisateuren hunn Depliante verdeelt, wou op d'Sécherheets- an Hygiènesreegele verwise gouf. Déi ganz grouss Majoritéit vun de Leit hate Masken un.

US-Korrespondenz vum Philip Crowther
Weltwäit ginn den Ament Leit op d'Strooss, dat an der Suite vum Dout vum US-Afroamerikaner George Floyd, deen zu Minneapolis Affer vu Policegewalt gouf.

Reaktioun vum Ambassadeur:

"Ech hunn iech héieren a soen iech Merci, fir déi friddlech Protester, esou datt och aner Leit Iech konnten héieren. Als Amerikaner musse mir individuell an als Natioun zesumme weider Efforte maachen, fir eng méi perfekt Unioun ze kreéieren, an eis helleg Verflichtung z'erfëllen, déi mir eis géigesäiteg an eiser Konstitutioun gemaach hunn", esou den J. Randolph Evans.
Statement of Ambassador J. Randolph Evans

In response to the protests today outside the United States Embassy in Luxembourg, Ambassador J. Randolph Evans issued the following statement:

“I heard you and I thank you for the peaceful protest so others could hear you as well.  We, as Americans, must and will continue our efforts individually and as a nation to work toward a more perfect union, fulfilling the sacred commitments we have made to each other in our Constitution equally, fully, and completely.”