An de Wochen, an deenen d'Grenzen zou waren, huet d'Lëtzebuerger Douane d'Leit dru gehënnert, fir d'Land ze verloossen - ma se hate kee Recht dozou.

Dat geet aus engem Avis vum Maître Marc Kohnen ervir, deen um Méindeg op der Generalversammlung vun der Douanesgewerkschaft virgestallt gouf.

D'Conclusioun, seet hir Presidentin Lynn Luciani ass ....

"... dass mer einfach keng Base légale haten an dass mer ëmmer drop higewisen hunn, dass ee muss oppassen, wann eis Beamten op Missioune geschéckt ginn, dass all Kaderen ofgedeckt sinn. Grad och de legale Kader, mat deem de Beamten dobausse seng Missioun erfëllt an dee war hei einfach net ginn. Déi Kontrolle waren op Lëtzebuerger Säit an et war eng Ausreesverhënnerung do, fir d'Lëtzebuerger, déi wollten an Däitschland goen a mir hunn absolut keng Base legale, déi dat ka bestätegen."

Wéi d'Grenzen zou waren, hat d'Douane d'Missioun kritt fir d'Leit drun ze hënneren, aus dem Grand-Duché auszereesen.... en Avis vum Affekot Marc Kohnen confirméiert, datt dat net legal war.

"Ech mengen, do muss iergendwann Faarf bekannt ginn, wien eis op déi Missioune geschéckt huet a wann, am Fall wou nach eng Kéier esou Grenzkontrolle sinn, datt dat absolut net geet."

D'Douanesgewerkschaft ënnersträicht, datt si ënner kengen Ëmstänn méi wëll toleréieren, datt d'Douanieren en Uerder kréien, deen net legal ass. Dës Diskussioun war ee vun de Punkten um Ordre du jour vun der Generalversammlung, ma et ginn nach weider Problemer - zum Beispill wat d'Aarbechtszäite betrëfft.

D'Douanesgewerkschaft gouf sech e Méindeg den Owend op hirer Generalversammlung eens, e Litige ze deposéieren, esou wéi d'CGFP dat och schonn annoncéiert hat. Et géifen illegal Stonne geschafft ginn an esou kéint et net méi viru goen.

Den Amenagement du temps ass scho méi laang e Problem. D'Fuerderunge vun der Gewerkschaft sinn iwwert d'Joer bekannt, ma et gëtt weider géint national a géint europäesch Direktive verstouss, beschwéiert sech d'Presidentin vun der Douanesgewerkschaft, d'Lynn Luciani.

"De Beamte schafft hautdesdaags am Kader vum horaire mobile. Den horaire mobile ass super gereegelt, mä alles, wat net horaire mobile ass, muss gereegelt ginn. Do si jo och bei der Police a bei der Arméi Accorde getraff ginn, wou festgehale gëtt, wéi déi europäesch Direktiv ëmzesetzen ass. dat ass dee Punkt, deen haut nach ëmmer bei eis feelt an dofir schafft d'Douane nach ëmmer net an engem legale Kader."

D'Gewerkschaft hofft elo, duerch zum Beispill eng Mediatioun, eng Léisung ze fannen.

Illegal Douaneskontrollen / Rep. Dany Rasqué