Spéitstens elo missten déi politesch Responsabel unerkennen, datt ee sech och an der Schoul ustieche kann a spéitstens elo misst konsequent reagéiert ginn.

Dat fuerdert d'Enseignantsgewerkschaft SNE am Kontext vun der Meldung vun der Santé, datt 12% vun der Corona-Fäll d'lescht Woch op d'Schoul zeréckzeféieren waren. Den SNE widderhëlt nach emol seng Fuerderungen, datt d'Ofstandsreegelen iwwerall an de Schoule missten agehale ginn. Wann dat bei grouss Klasseneffektiver net méiglech ass, misst entweder op méi grouss Säll zeréckgegraff ginn oder d'Klass opgedeelt ginn.

An de Schoule géife mobil Apparater gebraucht ginn, do wou d'Fënsteren net opginn, fir ze lëften. An all Sall sollte sougenannten CO2-Ampelen installéiert ginn, fir d'Konzentratioun vun der verbrauchter Loft ze moossen. D'Schoule misste Féiwerthermometer zur Verfügung gestallt kréien an d'Kanner net méi an de Maisons relais vermëscht ginn.

Den SNE-President Patrick Remakel:

De Patrick Remakel (SNE)

Och wann d'Gebaier dat vu sech aus kéinten decidéieren, wier eng national Recommandatioun oder Obligatioun néideg, seet de Patrick Remakel, de President vum SNE: "Den Ament hänkt dat da vun deenen eenzele Schoulen of. Et wier awer besser wa mer do eng national Recommandatioun hätten oder eng Obligatioun, wou da géif gesot ginn, dat do ass de Wee wéi mer dat an all de Schoulen am Land maachen. Et gi ganz sécher Eegeninitiative vun den Enseignanten oder de Schoulen, mä hei fuerdere mer eng national Decisioun vum Minister."

Den SNE ënnersträicht, datt an de Schoule keng gesondheetleche Risiken dierfe geholl ginn an d'Gesondheet vun de Kanner, dem Léierpersonal an dem edukative Personal muss Prioritéit hunn.
Kritesch gesäit d'Enseignantsgewerkschaft vun der CGFP och nach ëmmer déi proposéiert Rattrapage-Offer. Déi wiere just eng Drëps op de waarme Steen. Nëmme mat extraen Appui-Stonne kéint garantéiert ginn, datt all Kand zousätzlech Hëllef kritt, déi et brauch.