De Centre Pontalize zu Ettelbréck ass vun e Méindeg un zou fir Visiteuren. "Beim Klouschter" um Houwald mussen d'Bewunner nees um Zëmmer iessen.

Vun e Méindeg u mécht d'Alters- a Fleegeheem "Centre Pontalize" vun Ettelbréck ganz fir Leit vu baussen zou. Dat elo mol bis den 9. November.

Et huet een ee positive Covid-Fall vun engem Bewunner op enger Unitéit. Duerch den Traçage konnt awer nach net sécher festgestallt ginn, wou déi Persoun sech ugestach huet.

Dofir sinn déi Leit, déi mat der positiv getester Persoun enke Kontakt haten, elo mol a Quarantän a gi getest. Fir awer z‘evitéieren, dass de Virus sech weider verbreede kann, gi keng Visitte méi erlaabt.

Et gëtt och gepréift, ob elo all d‘Bewunner an d'Personal kënne getest ginn. Wann d‘Situatioun sech géing verbesseren, kéinten eenzel Visitten vläicht och nees virum 9. November méiglech sinn.

Och am Alters- a Fleegeheem '"Beim Klouschter" um Houwald gëtt et Corona-Infektiounen. Dat huet d'Direktioun vum CIPA vu Servior e Samschdeg de Mëtteg gemellt.

De Bedreiwer verséchert, sech bei der Fleeg, dem Service an de Visitte strikt un déi néideg Mesurë gehalen ze hunn. Nawell sinn eng Partie Residenten positiv getest ginn a sinn den Ament isoléiert. D'Famillje wären informéiert ginn, heescht et an engem Communiqué.

All d'Residenten an d'Mataarbechter solle vun der nächster Woch u getest ginn. D'Direktioun hëlt eng Rei präventiv Mesuren. Esou kréien d'Bewunner zum Beispill nees um Zëmmer z'iessen. D'Visitten sinn iwwerdeems just nach op Rendez-vous an engem spezifesche Raum méiglech.