An der Santés-Chamberkommissioun gouf en Dënschdeg déi 9. Adaptatioun vum Covid-Gesetz diskutéiert, mat deem d'Mesurë bis den 21. Februar verlängert ginn.

D'CSV ass domat averstanen, dass aktuell keng Lockerunge bei de Covid-Restriktioune geplangt sinn. Ëmmerhi géif déi brittesch Mutatioun vum Virus sech wuel séier am Land verbreeden, seet d'CSV-Fraktiounscheffin Martine Hansen. Si hätt en Dënschdeg de Moien op Nofro hin an der Gesondheetskommissioun matgedeelt kritt, dass der Santé den Ament scho 36 Fäll vun der Variant bekannt sinn.

Santékommissioun/Reportage Pierre Jans

Déi gréisst Oppositiounspartei widderhëlt och hir Kritik, d'Regierung hätt keng laangfristeg Strategie, fir dem Virus a senge Konsequenze Meeschter ze ginn.

D'Martine Hansen: "Et ass keng Previsibilitéit do. Dat feelt de private Leit, dat feelt de Betriber. Ech denke virun allem un d'Horesca-Betriber, déi elo zou musse bleiwen. Mir wëssen awer net wéi laang. Beim leschte Gesetz hate mir an enger Motioun gefrot, dass d'Regierung eis sollt soen, ënnert wéi eng Krittären d'Decisioun geholl gëtt, ob zou bleift oder ob erëm opgeet. Déi Motioun gouf komescherweis emol eng Kéier gestëmmt. Mä se hat keng Konsequenzen, well mir hunn näischt kritt. Ech weess och elo net, ob d'Restauranten den 21. Februar nees opmaachen. Ech fannen, dass misst decidéiert ginn: wann d'Infektiounszuelen net méi héich sinn ewéi dee Chiffer, da kënnt der opmaachen, mä ënnert deene konkrete Konditiounen. Vläicht nëmmen zwee Leit pro Dësch, oder véier. Mä et muss een de Leit eppes soen, an dat feelt eis."

D'Hëllefen un d'Betriber ginn der Martine Hansen an der Héicht net duer.

D'Fraktiounspresidentin beklot och, dass déi vulnerabel Leit net genuch protegéiert ginn. Si fuerdert en Aktiounsplang vun der Regierung. An och d'Impfstrategie kënnt bei der CSV net gutt ewech. D'Liwwerunge vun de Vaccine sinn der Martine Hansen no net de Problem. Aktuell géif een et emol net fäerdeg bréngen, de Leit déi Dosissen, déi do sinn, effikass ze sprëtzen. D'CSV fuerdert eng visibel Sensibiliséierungscampagne.

Och wann d’CSV d’Verlängerung vun den aktuellen Mesuren guttheescht, d’Partei wäert de Projet de Loi net matstëmmen. Dat gouf en Dënschdeg kuerz viru Mëtteg an der Sëtzung vun hirer Chamberfraktioun decidéiert. Dat neit Gesetz kënnt deemno e Freideg op den Ordre du jour.

Déi Lénk bedaueren, dass et keng wëssenschaftlech Basis fir d'Decisioune vun der Regierung géif. D'Pirate stéiere sech bei den Impfungen drun, dass déi perséinlech Donnéeë gespäichert ginn. An d'LSAP warnt d'Pharmakonzerner.

D'Impfcampagne schleeft méi ewéi geplangt. De President vun der Santéskommissioun an Rapporter vum neie Projet fir Covid-Gesetz Mars Di Bartolomeo gesäit de Feeler awer net bei der Regierung. De LSAP-Politiker zielt d'Pharmakonzerner un. Déi géifen d'EU-Memberlänner géinteneen ausspillen.

''Dat Spillchen, dat d'Pharmaindustrie oder déi de Vaccin entwéckelt hunn, am Moment mat der europäescher Unioun maachen, ass net akzeptabel. Der Industrie muss ee ganz kloer soen, dass ee sech am Liewen zweemol begéint. An dëser Kris an no dëser Kris. A wéi déi Pharmaindustrie sech verhält an dëser Kris beaflosst eist Verhalen no dëser Kris. Dat muss ee mol eng Kéier esou kloer soen!''

Dem Marc Baum vun déi Lénk feelt déi wëssenschaftlech Basis fir d'Decisioune vun der Regierung.

''Et ass eng Situatioun, wou een d'Gefill huet, dass et éischter eng Fro vu politeschem Kouhandel ass, ob op oder zou ass. E Kouhandel net nëmme bannent der Regierung, mä och bei den Negociatioune mat eisen Nopeschlänner. Domat verléiere mir all Form vun Objektivitéit an och vu Previsibilitéit.''

D'Pirate sinn op alle Fall skeptesch, dass gréisser Ouverturë mat deem Tempo bei den Impfunge bis d'Enn vum Joer méiglech sinn. De Sven Clement huet awer een anert Haaptuleies. Seng Partei fuerdert en Artikel am Gesetz, dass just déi perséinlech Donnéeë vu Leit, déi sech effektiv impfe loossen, gespäichert ginn.

''An net vu jidderengem, deen invitéiert gëtt. Dat gouf vun der Regierung ofgeleent. Dat ass ganz erstaunlech, well si op der enger Säit soen, dass si just Donnéeë wëlle späichere vu Leit, déi sech impfe loossen, fir d'Wierkungen no den Impfungen ze retracéieren. Haut steet am Gesetz, dass se Donnéeën dierfe späichere vu jidderengem, deen eng Invitatioun kritt. Et ass deemno nach ëmmer e Kuddelmuddel. D'Regierung seet dat eent, schreift awer dat anert an d'Gesetz.''

De Piraten no dierften dës Donnéeën héchstens zwee Joer conservéiert ginn. Allerdéngs gesäit den neie Projet de Loi keng Reegele vir, wéi laang dës Donnéeë gespäichert ginn. Op dësem Punkt hätt d'Regierung hir Iwwerleeungen nach net ofgeschloss, esou sot d'Santésministesch Paulette Lenert.

D'Gesetz, mat deem déi aktuell Covid-Mesuren och nom 31. Januar gëllen, gëtt e Freideg am Chamberplenum gestëmmt.

Déi nei Restriktioune bei der Arees mam Fliger goufen en Dënschdeg an der Santéskommissioun net diskutéiert. Déi sinn och net Deel vum Projet de Loi.

9. Adaptatioun vum Covid-Gesetz

An der Santés-Chamberkommissioun gouf en Dënschdeg de Moie wéi gesot déi 9. Adaptatioun vum Covid-Gesetz diskutéiert, mat deem d'Mesurë bis den 21. Februar verlängert ginn.

Och d'Bistroen an d'Restaurante bleiwen bis deen Datum weider zou et et dierfen nëmmen 2 Leit aus engem Stot doheem empfaange ginn.

Och dës Kéier ass den LSAP-Deputéierte Mars Di Bartolomeo de Rapporter.

Ënnert anerem iwwert den Tracing goung en Dënschdeg de Moien an der Kommissioun Rieds: wéi d'Ministesch Paulette Lenert preziséiert huet, kéint wéinst de manner héijen neien Infektiounsfäll och den Tracing-Questionnaire méi detailléiert gefouert ginn.

D'Lëtzebuerger Politik an der Lutte géint de Virus géif ee sech net vum Ausland diktéiere loossen, huet et nach geheescht, mä géif op epidemiologesche Consideratioune baséieren.

Och war et d'Prezisioun, datt 90% vun allen Eltere vu Schüler d'Accord wieren, datt sech hir Kanner teste loossen, wann dat néideg ass.