Am Prisong ginn d'Leit net alleguerten zesumme geimpft. Dat huet d'Gesondheetsministesch e Méindeg de Moie gesot.

Aktuell wier een am Gaangen ze kucken, wéi dat logistesch organiséiert kéint ginn, huet et vun der Paulette Lenert an dem Santésdirekter geheescht.

Mir hu jo och e Service medical sur place, an do gëtt gekuckt, wie kënnt a wéi eng Kategorie vu Vulnerabilitéit. Ech mengen, si si Patiente wéi anerer och, an do wäerte mer eng Léisung sichen, esou d'Ministesch.

D'Associatioun “Eran, eraus, an elo?” hat e Méindeg am fréie Moien an engem Schreiwes op dës Problematik opmierksam gemaach. Am Ausland, an Däitschland an a Frankräich zum Beispill, géif dëse vulnerabelen Deel vun der Populatioun als prioritär fir e Vaccin ugesi ginn, wat do och wëssenschaftlech begrënnt gi wier. Dofir gëtt gefuerdert, dass d’Giischtercher an d’Detenuen, och hei zu Lëtzebuerg, an den éischten zwou Phase vun der Impfcampagne solle mat abegraff ginn.