All Joer gëtt de groussen Télévie-Spendemarathon Enn Abrëll mam groussen Télévie-Dag op all den RTL-Medien ofgeschloss.

Duerch déi aktuell sanitär Situatioun gëtt dëst Joer fir d'éischte Kéier eng Télévie-Woch organiséiert, sou dass de Programm op e puer Deeg verdeelt ka ginn. D'ganzt Joer iwwer hu privat Leit, Benevollen, Veräiner, Associatiounen a Firme sech fir den Télévie agesat, Done gesammelt a sech domadder fir d'Lutte géint de Kriibs staark gemaach. Bedéngt duerch d'Pandemie goufen och dëst, wéi d'lescht Joer keng Evenementer organiséiert, an et sinn aner Weeër fonnt ginn, fir Solidaritéit a Matgefill mat Betraffener ze fannen.

24. Abrëll: Groussen Télévie-Dag

Samschdes de 24. Abrëll ass dann dee groussen Ofschloss vum Spendemarathon. Moies fréi gëtt de Compteur um Radio lancéiert, wou jiddereen nach weider spende kann. Telefonslinne si vu 07:00 Auer moies un op. De ganzen Dag iwwer sinn och nees eng Rei Live-Schaltungen a Reportagen an Temoignagen um Radio. Owes an der Live-Emissioun op RTL Télé Lëtzebuerg, ginn um Compteur final all Donen, déi wärend deem ganze Joer gesammelt goufen, annoncéiert. Wéi all Joer gëtt de ganzen Erléis un d'Kriibsfuerschung hei zu Lëtzebuerg gespent.

Zesumme géint de Kriibs - Mäin Don zielt

Um Dag selwer waren dann och nach verschidde gréisser Aktiounen. Ënner anerem den DHL-Tour mam Vëlo...

Oder och eng Randonnée mat 69 Trakteren, déi ënnerwee waren.

Den traditionelle Moto's Tour huet dann och net dierfte feelen.

Télévie-Woch: De Programm

Vu Méindes den 19. Abrëll bis freides den 23. Abrëll schalt RTL all Dag live an ee vun de fënnef Centres de Promesses. Ugefaange gëtt e Méindeg den 19. Abrëll mam Centre de Promesses permanent zu Rodange. Dënschdes den 20. Abrëll geet et weider mam Zenter zu Ëlwen, mëttwochs zu Suessem, donneschdes zu Iechternach a freides den 23. Abrëll zu Stroossen.
Lass geet et ëmmer moies fréi um 06:40 Auer um Radio an um Internet, wou all Dag en anere Centre de Promesses virgestallt gëtt. Owes am Magazin um 19:00 Auer mellt sech d'RTL-Ekipp och live aus deem jeeweilegen Zenter. Wärend der Télévie-Woch ginn op all den RTL-Medien (Radio, Tëlee an Internet) eng ganz Rei Reportagen an Temoignagen diffuséiert.D'ganz Woch iwwer sinn d'Telefonslinne fir d'Spende wärend de Radios- an Tëleessemissioune vu moies 06:30 Auer bis owes 21:00 Auer op.

15. Abrëll: Kloertext Spezial Télévie

Startschoss vun der Télévie-Woch ass en Donneschdeg de 15. Abrëll mat engem Kloertext Spezial ganz ronderëm den Télévie an Theme wéi Kriibs a Pandemiezäiten oder d'Evolutioun vun der Recherche. Invitéë beim Caroline Mart an der Emissioun sinn den Dokter Guy Berchem (Onkolog), Dr. Simone Niclou (LIH), d’Psychologin Anaïs Meulemans an den DJ Nosi (Eric Nosbusch).

Rendez-vous um 20:00 Auer op RTL Télé Lëtzebuerg

Kuckt alleguerten d'Reportage vun dëser Woch iwwert den Télévie am Replay op RTLPlay.