Wéi geet et weider mam Site vum Stolkonzern Liberty Steel zu Diddeleng an deene ronn 250 Salariéen, déi do schaffen?

Et ass den Ament ee ganz sensibelen Dossier. D'Wirtschaftskommissioun vun der Chamber huet sech en Donneschdeg mat der aktueller Kris ronderëm d'Galvalange vun Diddeleng befaasst. Virun 19 Méint hat déi brittesch Liberty Steel d'Wierk iwwerholl. Nodeems dat europäesch Konkurrenzrecht ArcelorMittal gezwongen hat, Diddeleng am Kontext vun aneren Transaktiounen ze verkafen.

Elo ass den Finanzgrupp Greensill ronderëm den indesche Businessman Gupta awer an der Faillite. Et geet also drëms, de Site vun Diddeleng ze retten, dat mat staatlecher Hëllef? Eng Piste ënner aneren, déi den Ament intensiv am Wirtschaftsministère beschäftegt.

" Silence Radio " ronderëm Liberty Steel

Wéi Enn 2018 den Numm Liberty House fir d'éischt gefall ass, goufe séier Froen gestallt:

Wien ass dat? De brittesche Finanzgrupp, deen Ufank der 90er Jore vum Indesche Businessman Sanjeev Gupta gegrënnt gouf, dee virop Stolwierker opkeeft, mat ënner aneren der Galvalange zu Diddeleng. Souguer de Wirtschaftsminister Etienne Schneider war deemools iwwerrascht.

D'Gewerkschafte ware skeptesch, en Investissementsfong, deen ënner anerem Stolwierker keeft?

19 Méint nodeems de Logo vu Liberty Steel zu Diddeleng opgehaange gouf, brécht d'Kaartenhaus zesummen. Den Sanjeev Gupta huet sech verzockt.

Ze séier gewuess, mat Gelder, bei deenen et un Transparenz feelt. De Konstrukt ass ugangs Mäerz zesummegebrach. De Greensill freet d'Faillite un. Den Imperium vun GFA Alliance ziddert. Liberty Steel Diddeleng geréit mat sengen nach 215 Mataarbechter a Gefor.

A wat elo?

Déi Fro bleift den Owend ouni Äntwert. An der zoustänneger Chamberkommissioun huet de Wirtschaftsminister Franz Fayot d'Deputéiert informéiert. Decidéiert gouf aus strategesche Grënn eng Informatiounsspär.

Fakt ass, d'Wierk zu Diddeleng ass betraff. D'Produktioun géif bei just nach 40 Prozent leien. Iwwerdeems déi potenziell Auslaaschtung bei 80 Prozent leie géif. ArcelorMittal liwwert weider d'Réimaterial, wei et am Kontrakt steet. Awer just nach géint Cash.

Déi brittesch Regierung huet dem Finanzgrupp Greensill de Krunn zougedréit, well hei alles ze onduerchsichteg wier an dem Sanjeey Gupta géifen d'Liquiditéiten ausgoen. En Administrateur judiciaire gouf genannt an de Crédit Suisse probéiert, Scholden anzedreiwen. 30.000 Aarbechtsplaze stéinge weltwäit um Spill, sou déi europäesch Gewerkschaften, déi och mam Fanger op d'EU-Kommissioun weisen.

An zu Diddeleng? Gesicht gëtt wuel nees no engem, deen d'Galvalange opkafe kéint, iert se mat an d'Faillite flitt. Bis et sou wäit ass, kéint de Staat asprangen, ouni awer Geld an e Faass ouni Buedem ze stiechen.