Dat neit Covidgesetz gouf mat de Stëmme vun der DP, LSAP, déi Gréng, CSV an de Piraten ugeholl. D'ADR an déi Lénk hu sech enthalen.

De Roy Reding huet dogéint gestëmmt.

D'Diskussiounen an der Chamber hunn iwwer dräi Stonne gedauert, d'CSV huet betount, dass d'Mesurë géinge begréisst ginn, dës awer ze spéit géinge kommen. Vun de Regierungsparteie war et an de Riede gréisstendeels e Resumé vun den neie Mesuren. Och den Corona-Management gouf revue passéiere gelooss.

Dat neit Covidgesetz trëtt e Sonndeg ëm Hallefnuecht a Kraaft

Ënner anerem gëtt domat d'Ausgangsspär ofgeschaaft an d'Spärstonn fir Restauranten, Bistroen a Caféen opgehuewen. Op den Terrassen dierfe bis zu 10 Leit ouni Test beienee sëtzen a banne 4 Persounen. Mat engem Covid-Check, dat heescht, wann ee geimpft, geheelt oder getest ass, da ginn et keng strikt sanitär Mesurë méi. Dat bedeit, et brauch ee weder e Mask, nach muss een Distanz halen a mat engem Covid-Check ginn et och keng Restriktioune méi, wat d'Unzuel vun de Leit pro Dësch ugeet. Spréch, et dierfe souvill Leit op engem Dësch beienee sëtze wéi wëllen.

Am Private ginn d'Mesurë jo och méi labber. Doheem dierfen elo bis zu 10 Persoune beieneen kommen ouni Restriktiounen. Dee Punkt gouf vun enger Rei Oppositiounspolitiker e Samschdeg de Moien an der Chamber kritiséiert, ma hei war et d'Argument vun der Regierung, dass am Private kee Covid-Check oder keng Gestes-barrières kënne kontrolléiert ginn.

Weiderhi Virsiicht gebueden

Dat 20. Covidgesetz wier dat éischt, dat de Rapporteur Mars di Bartolomeo mat Freed géing presentéieren, sot hien e Samschdeg an der Chamber. Mir si mat der Spëtzt aus dem Tunnel eraus, mä komm mir passen op den Zuch op, deen eis um nämmlechte Gleis kéint entgéint kommen, esou de Mars di Bartolomeo. Och wann elo méi labber Mesurë kommen, sollt dem Virus keng nei Dier opgemaach ginn. Op eemol wier nämlech d'Delta-Variant, déi un Terrain gewënnt.

D'Impfcampagne géing den Ament gutt verlafen, ma mir wieren awer nach ëmmer ofhängeg vun de Liwwerunge vun de Pharmakonzerner. Mam Covid-Check soll awer elo méi Normalitéit zeréckkommen. Och fir d'Etablissementer wéi Restauranten, Baren oder Diskoe wier et wichteg, dass si erëm mat méiglechst grousser Sécherheet schaffe kënnen.

Wat d'Santés- a Fleegepersonal ugeet, bleift et am Gesetz eng staark Recommandatioun, fir sech impfen ze loossen, ma keng Obligatioun. An de Schoulen ass et dann d'Ännerung, dass dobaussen am Pausenhaff keng Mask méi muss gedroe ginn. Dobannen, also och wann een um Stull sëtzt, bleift de Mondschutz obligatoresch.

Fir den CSV-Deputéierte Michel Wolter kommen dës Mesuren ze spéit. Et hätt ee scho méi fréi solle kucken, wou genee d'Cluster sinn a wou genee ee méi streng Mesuren huele soll a wou net. De Michel Wolter huet dowéinst eng Proposition de loi deposéiert, déi virgesäit ze kucken, wouhier déi vill Infektiounen an den Alters- a Fleegeheemer komm sinn. Et géing een op de Rapport vum Jeannot Waringo waarden, ma d'Kritik geet dem Michel Wolter no virun allem un d'Familljeministesch Corinne Cahen.

Extrait Michel Wolter

Donieft wier vum Familljeministère dobaussen net dat kommunizéiert ginn, wat an den Alters- a Fleegeheemer géing geschéien. D'Argument, dass eng oppe Kommunikatioun nëmme fir Duerchernee gesuergt hätt, kéint den CSV-Deputéierten an enger Demokratie net gëlle loossen. D'Ministesch Corinne Cahen hätt hir Responsabilitéit net geholl an déi waarm Gromper ëmmer weidergeleet, esou nach de Michel Wolter.

D'Gesetz gouf vun de Majoritéitsparteien, der CSV an de Pirate matgestëmmt.

Fir d'Piraten wier déi wichtegst, Konditiounen, d'Ophiewe vun der Ausgangsspär, erfëllt gewiescht, sou den Deputéierte Sven Clement.

"De virleienden Text ass sécher net perfekt an ech wäert gläich nach op déi konkret Punkten agoen, déi ech gesinn, mee kee vun dëse Problemer ass och nëmmen hallef esou dramatesch, wéi de Fait, datt eis Regierung ouni wëssenschaftleche Grond méintelaang d'Beweegungsfräiheet vun de Biergerinnen a Bierger ageschränkt huet. Dofir huet et fir eis absolut Prioritéit mat dësem Text elo mol fir d'alleréischt d'Ausgangsspär opzehiewen a konkret Entspanungen am Privatem mat ze stëmmen."

De Roy Reding huet als Eenzege géint d'Gesetz gestëmmt, de Rescht vun der adr huet sech enthalen, déi Lénk och. Et géing ee sech notamment un der neier Testflicht fir Professioneller aus dem Santés- a Fleegesecteur stéieren, sot déi Lénk Deputéiert Nathalie Oberweis.

"Déi, déi mir elo zanter 15 Méint als Helde feieren, déi kréien elo eng Testflicht operluecht, mat der Warnung hir Aarbecht ze verléieren. Déi, déi esou vill geleescht hunn an dëser Pandemie, kréien ënnerschwelleg ënnerstallt, hir Aarbecht net gewëssenhaft ze maachen. Sou wäit ech weess, gëtt jo am Moment scho getest an dat géing och relativ gutt klappen. Firwat brauche mer dann eng Testflicht fir si? A grad elo, wou d'Infektiounszuelen esou niddereg sinn, wou esou vill Leit scho geimpft sinn, a virun allem déi vulnerabel Leit geimpft sinn, firwat brauche mer dann déi Testflicht?"

D'Nathalie Oberweis, déi am Géigesaz zu de meeschten aneren Deputéierten, fir d'éischte Kéier e Covid-Text matgestëmmt huet, huet sech och schockéiert gewisen iwwert d'Vitess, an där d'Gesetz duerch d'Chamber goung. Den nawell kriteschen Avis vun der Mënscherechtskommissioun zum Beispill wier mol net an der Chamberkommissioun diskutéiert ginn.