D'Drogen-Delikter, déi vun der Police statistesch erfaasst goufen, si bannent de leschten 8 Joer ëm ronn 2.000 Fäll eropgaangen.

Dat ass net grad dat Duebelt wéi virun 8 Joer.

Deemno goufen et  2012 ronn 2.600 esou Delikter, 2016 waren et der ronn 4.000 an zejoert waren et der dunn ronn 4.600.

Zu den 3 verschiddenen Delikter, déi mat Drogen ze dinn hunn a wou d'Police aktiv gëtt, zielt d'Dealen, d'Huele vun Drogen an de Besëtz vun net-erlaabte Substanzen.

Dëst äntwert de Minister fir bannenzegt Sécherheet op eng entspriechend parlamentaresch Fro vun der Nathalie Oberweis vun Déi Lénk.

Dem Henri Kox no, géif et awer net stëmmen, datt d'Beamten speziell Instruktiounen oder Consignen krut hätten, fir d'Interpellatiounen am Drogemilieu eropzeschrauwen. All Beamten hätt souwisou d'Obligatioun, fir all Infraktioune géint d'Gesetzer nozegoen an ze mellen.

De Minister Kox preziséiert awer och, datt aktuell d'Zuel vun de Police-Patrullen op der Stater Gare an zu Bouneweg erop gesat gi wieren. Trotz allem kéint d'Police eleng dem Sécherheetsproblem net Meeschter ginn.