No den Olympeschen an de Paralympesche Spiller stoung dëser Deeg nach e weidert grousst Evenement un, bei deem eng lëtzebuergesch Delegatioun dobäi war.

Eng Medail fir Team Lëtzebuerg!

Um Sonndeg Owend war no 3 laange Kompetitiounsdeeg d'Ofschlosszeremonie vun den EuroSkills 2021. D'Lëtzebuerger Delegatioun huet sech mat all den Ekippe vun den anere Länner an der Grazer Stadthalle erëmfonnt. All d'Kandidatinnen an d'Kandidaten, zesumme mat hiren Experten, hu voller Nervositéit op dëse Moment gewaart. Natierlech steet bei internationale Concoursen a Vergläicher virun allem am Virdergrond, fir sech mat aneren ze moossen an dat eegent Kënnen ze weisen. Mä wann ee bei engem Concours matmécht, da wëll ee sech awer natierlech och gutt placéieren.

An all Beruff gouf eng Gold-, Sëlwer- a Bronzemedail verginn a bis zum Schluss war d'Spannung grouss, wien dann elo vum Jury wéi bewäert gouf. Zu der grousser Freed vun der ganzer Delegatioun huet Team Lëtzebuerg et tatsächlech fäerdeg bruecht, fir bei dësen Europameeschterschaften eng Bronze-Medail ze gewannen. An der Geschicht vun den EuroSkills läit eng Medail fir Lëtzebuerg scho vill Joren zréck. D'Clémentine an den Ivo hunn am Entrepreneurship Business Development-Concours déi perfekt 3. Plaz erreecht. An 3 Deeg hu si den Opbau vun enger Firma simuléiert an de Jury mat hiren Iddien a Pläng voll a ganz iwwerzeegt. Et ass flott ze gesinn, datt sech d'Entrepreneurship-Educatioun a Lëtzebuerg am europäesche Verglach esou gutt positionéiert.

Dëst exzellent Resultat huet net laang gebraucht, bis et de Wee op Lëtzebuerg fonnt huet. Den Educatiounsminister Claude Meisch huet et sech net huele gelooss, fir all de Lëtzebuerger Kandidatinnen a Kandidaten säi Luef auszeschwätzen.

Well d'Fërderung vum entrepreneuriale Geescht an de Schoulen och e staarkt Uleies vum Mëttelstandsministère ass, huet och de Minister Lex Delles e léiwe Message fir d'ganz Ekipp hannerlooss. Zesumme mat dem Educatiounsministère, ënnert der Leedung vum SCRIPT, dréit de Mëttelstandsministère nämlech d'Initiativ vun den sustainable entrepreneurial schools (méi Informatiounen op www.entrepreneurship.lu). Bei dësem Projet liewen d'Lycéeën den nohaltegen Entrepreneursgeescht mat hire Schülerinnen a Schüler vir. Déi engagéiert Schoulen kréien den 30. September 2021 vun de Ministere Claude Meisch a Lex Delles den éischten offiziellen nationale sustainable entrepreneurship-Label verdeelt.

Extrait Lex Delles

D'Ofschlosszeremonie huet de Schluss vun enger ganz opreegender EuroSkills 2021 bedeit. Wéi ëmmer bei Concourse gouf et méi glécklech an awer och e puer enttäuschte Gesiichter bei der Lëtzebuerger Ekipp. Mä onofhängeg vum Resultat hunn alleguer d'Kandidaten, an och hir Experten, vill bäigeléiert. De Chef de mission an techneschen Delegéierte vun Team Lëtzebuerg, de Gil Belling, huet um Mikro e kuerze Fazit gezunn, éier an den nächste Wochen a Rou eng Analys vun der Kompetitioun gemaach gëtt.

Extrait Gil Belling

Dag 3 - Schweesspärelen a vill Tréinen um leschten Dag

Samschdes, de 25.09, war den drëtten an domat leschte Kompetitiounsdag vun den EuroSkills 2021 zu Graz. Et lounge zwee ganz laang an ustrengend Deeg hannert der Lëtzebuerger Ekipp, mä elo goung et drëm, fir nach eng Kéier all d’Reserven ze mobiliséieren. Wéi tragesch ee Concours ka sinn, huet d’Team Lëtzebuerg leider an den eegene Reie misse materliewen, wéi ee vun de Kandidaten opgrond vun engem Malaise net méi untriede konnt a säi Glaser-Concours net zu Enn brénge konnt. Dës sinn déi Momenter, déi kee Kandidat erliewe wëll, well hie säi Kënne net méi weise konnt. Et war awer schéin ze gesinn, datt d’Lëtzebuerger Kandidaten an dëser kuerzer Zäit zu enger richteger Ekipp zesummegewuess sinn an alleguer hiren Teamkomerod, de Lukas, probéiert hunn, erëm opzemonteren.

De leschten Dag hat awer och ganz schéi Momenter. Am Restaurant Service goung et ëm d’Mixe vun ausgefalene Cocktails an d’Zoubereede vum perfekte Kaffi. De Lëtzebuerg Kach, de Jim, huet sech innovativ Amuse-Bouchë missen iwwerleeën an am Web Developpement huet de Lëtzebuerger Kandidat, de Steve, nach eng Kéier säi ganzt Kënnen a seng Kreativitéit missen ënner Beweis stellen, fir komplex Aufgaben ze programméieren a mat Algorithmen ze jongléieren.

E ganz emotionalen Dag hat och d’Marina am Beruff vun der Beauty Therapy (Estheticienne). Hatt hat ganz grousse Respekt virun der leschter grousser Aufgab vum Body Painting, bei där d’Theema “Superheld” gezu gouf. E gutt Zouschwätze vu sengen Team Leaderen huet gehollef, fir datt d’Marina nach eng Kéier alles ginn huet. Aus Tréine vun Angscht virum Concours sinn duerno Tréine vu Freed ginn, well hatt dee komplexen Challenge an domat de ganze Concours bravouréis geléist hat. Allgemeng ass den Ofschloss vun de jeeweilege Concoursen ëmmer e ganz emouvante Moment, bei deem alleguer d’Kandidate vum Publikum ronderëm gefeiert ginn a jidderee sech vu Freed an Erliichterung an d’Äerm fält.

EuroSkills 2021 Dag 3
Weider Impressioune vun der Competitioun zu Graz

D’Kompetitioun vun den EuroSkills ass e Samschdeg um fréien Owend zu Enn gaangen an d’Juryen hu sech bis spéit an d’Nuecht zréckgezunn, fir d’Gewënner vun dëser Editioun ze ermëttelen. Déi Lëtzebuerger Kandidatinnen a Kandidate kënnen elo schonn houfreg op sech sinn, well si hiert Bescht ginn hunn an deelweis iwwert sech erausgewuess sinn. Mä och dat eent oder anert Kapprësele war an der Ekipp ze gesinn. E Concours bedeit numol ëmmer Stress an doduerch geschéie Feeler, déi am Training net passéieren, mä dat gehéiert dozou. Elo heescht et fir op d’Ofschlosszeremonie ze waarden an d’Daumen ze drécken, ob vläicht déi eng oder aner gutt Placéierung erausgesprongen ass.

D’Lëtzebuerger Kandidatin am Entrepreneurship Concours, d’Clémentine, ass virum Mikro op de leschten Dag agaangen an op d’Spannung, déi elo an der Loft läit.

Extrait Clementine Offner

Dag 2 – En Dag mat Flambéieren, Coden a Pitchen

Um Freideg, dem 24.09, stoung den 2. Dag vun den EuroSkills 2021 um Programm a fir d’Team Lëtzebuerg sinn hir jeeweileg Competitioune virugaangen. Nodeems den éischten Dag vu vill Nervositéit an dem friemen Ëmfeld gepräägt war, hunn déi Lëtzebuerger Nowuesstalenter den 2. Dag mat méi Rou gestart. Si wossten elo, datt si sech gutt virbereet haten an hu virun allem gesinn, datt si sech net virun hire "Konkurrenten" ze verstoppe brauchen, och wann dës aus grousse Länner wéi Frankräich, Däitschland oder Russland kommen. Bei verschiddene Beruffer, déi op ee groussen Ofschloss hischaffen, konnt ee scho grouss Fortschrëtter gesinn. Dëst war ënner anerem och de Fall beim Lëtzebuerger Kandidat Kevin Meyer, deem seng Heizungsinstallatioun Stonn fir Stonn ëmmer méi wiisst. Och de jéngste Member aus der Delegatioun Noah Massen huet mat senge 16 Joer an annerhallwem Dag, ouni Virgaben oder Hëllef vun Internet, sech e ganze Roboter ausgeduecht an opgebaut. Dëse gëtt elo um 3. Dag esou programméiert, datt en ouni Steierung selbststänneg e Parcours fiert an Aufgaben erfëllt.

EuroSkills 2021 Dag 2
Déi jonk Lëtzebuerger Handwierker si weider am Asaz.

Aner Concourse bestinn aus verschiddene méi klengen Deeler, wéi zum Beispill beim Kachen oder dem Restaurant Service. Hei stoung um 2. Dag ënner anerem de "Fine Dining", also de Service an engem méi gehuewene Kader, um Programm. Vollen Asaz huet do de Georges Albert gewisen, datt souguer beim Flambéieren dat eent oder anert Hoer vun der Chienne schwaarz ginn ass.

E Concours, deen op den éischte Bléck méi abstrakt kléngt, ass den Entrepreneurship Challenge. Hei besteet d’Aufgab doran, fir an 3 Deeg den Opbau vun enger Start-Up ze simuléieren; mat allem wat dozou gehéiert: enger Maartanalys, Sondagë bei de Leit, engem Finanzplang, enger Vermaarktungsstrategie a villem méi. Déi Lëtzebuerger Expertin vun der Ekipp a Jurymember, d’Fabienne Kieffer, ass virum Mikro op déi lescht 2 Deeg agaangen.

Extrait Fabienne Kieffer

Et war e ganz spannenden Dag fir déi gesamte Lëtzebuerger Delegatioun, och wann no den zwee Kompetitiounsdeeg bei den éischte Kandidatinnen a Kandidaten eng éischt Ermiddung ze gesinn ass. Mä elo heescht et nach eng Kéier all Reserve sammelen an um leschten Dag säi Bescht ze ginn, fir esou vläicht déi eng oder aner gutt Placéierung fir  Lëtzebuerg mat Heem ze bréngen.

Dag 1 – eng Mëschung aus Nervositéit, Konzentratioun a Kënnen

D’Concourse vun den EuroSkills hunn offiziell ugefaangen an an all de Beruffer sinn d’Kompetitioune gestart. Och eis Lëtzebuerger Kandidatinnen a Kandidate ware voller Uspanung a Virfreed, fir endlech hir Aufgabe gewuer ze ginn. Bei deem engen oder anere war eng gewëssen Nervositéit ze gesinn an ze spieren, wat awer ganz normal ass. Trotz de strenge sanitäre Mesurë si Visiteuren erlaabt. Schaffen ënnert deem Kaméidi a viru lauter Leit, déi nokucken, ass awer eppes anescht, wéi an der Schoul oder am Betrib. Nodeems eis Ekipp sech mat där neier Situatioun familiariséiert hat, hunn d'Handwierker an Handwierkerinnen ugefaangen, konzentréiert ze schaffen an ze weisen, datt si genau fir dëse Moment esou laang trainéiert hunn. Den éischten Dag ass ofgeschloss, d’Lëtzebuerger Nowuesstalenter sinn nach gutt am Concours dran an elo heescht et, fir konzentréiert ze bleiwen an déi gutt Leeschtungen déi nächst Deeg ze confirméieren.

Traditioun trëfft d’Kompetenze vum 21. Joerhonnert

D’Mëschung vu méi traditionelle Beruffer an neien Entwécklungen an der Beruffs- an Ausbildungswelt spigelt d’Defien an d’Méiglechkeete vun der Beruffsausbildung an doriwwer eraus der gesamter Educatioun zu Lëtzebuerg erëm. Déi klassesch Beruffer vun der Heizungsinstallatioun, dem Kachen, dem Leeë vu Plättercher, dem Restaurantservice a villem méi entwéckele sech ëmmer weider a ginn hautdesdaags ëmmer méi wichteg. De Concours weist, datt dës traditionell Beruffer duerchaus innovativ Weeër ginn.

Donieft fuerderen nei Beruffer, déi z.B. aus der Welt vum Coding kommen oder och dem Entrepreneuriat an der Industrie 4.0, ganz däitlech d’Kompetenzen aus dem 21. Jorhonnert: kreativ denken, kollaborativ schaffen, kommunikativ sinn an awer och kritescht Denken, fir eng Aufgab unzegoen. Déi nei Beruffer sinn e Spigelbild vun de gesellschaftlechen an domat och den edukativen Weiderentwécklungen an et ass flott ze gesinn, wéi Jugendlecher eng Passioun an engem Beruff fannen, deen et virun 10 Joer nach guer net gouf.

Deel vun der offizieller Delegatioun ass och de SCRIPT-Direkter Luc Weis. De SCRIPT ass ee vun de Moteure vun der Lëtzebuerger Educatioun an huet ënner anerem d’Mandat, nei Léierweeër, Léiermaterialien an och Fächer wéi Coding an Digital sciences ze entwéckelen an doriwwer eraus d’Fërderung via d’Organisatioun vu Concoursen ze stäerken.

Extrait Luc Weis

Team Lëtzebuerg op de Beruffseuropameeschterschafte vun der Jugend

Vum 22. bis de 26. September sinn zu Graz an Eisterräich d’EuroSkills, d’Beruffs-Europameeschterschafte vun de Jugendleche bis 25 Joer.

RTL

Dobäi handelt et sech ëm d'Europameeschterschafte vun de Beruffer aus Handwierk, Industrie, Handel an Horeca. Fir datt ee sech eng ongeféier Gréisstenuerdnung vun dësem Event ausmole kann, sief drop verwisen, datt bei der leschter Editioun zu Budapest 2018 an deenen 3 Deeg net manner wéi 75.000 Visiteuren do waren, fir d'Kandidaten z'encouragéieren. Dës Gréisstenuerdung kann natierlech bei dëser Editioun net erfëllt ginn. Ënnert engem strenge Sanitärkonzept fënnt dës Editioun nämlech mat enger ganz limitéierter Unzuel u Visiteuren als 3G-Event statt; mee d’ganz Delegatioun ass frou an erliichtert, datt de Concours schlussendlech lassgeet.

Aus iwwer 20 europäesche Länner sinn Delegatioune vu Jugendleche mat hiren Traineren ugereest, déi a knapp 50 verschiddene Beruffer géinteneen untrieden. Nodeems déi Jugendlech elo méint- respektiv jorelaang op dësen Event hin trainéiert hunn - covid-bedéngt gouf den Event vun 2020 op 2021 verréckelt - moosse si sech déi nächst Deeg mat anere jonke Kandidatinnen a Kandidaten.

Team Lëtzebuerg, zesummegesat vun der Associatioun WorldSkills Luxembourg, ass offiziell mat 9 Nowuesstalenter an insgesamt 8 Beruffer vun der Glaskonstruktioun, der Sanitär- an Heizungsinstallatioun, dem Web Development, der Mobile Robotic, vum Estheticien respektiv Estheticienne, dem Kachen, dem Restaurantservice an dem Entrepreneuriat vertrueden. Encadréiert ginn déi jonk Talenter jeeweils vun engem Expert aus dem Fach a si gi begleet vun 2 Teamleaderen. D’Vertriederinnen an d’Vertrieder vun de lëtzebuergesche Faarwen hu sech qualifizéiert a bewisen, datt si souwuel déi fachlech Kompetenz matbréngen, wéi och dem Drock standhalen, viru Public präzis ze schaffen. Si sinn an dësem Joergang déi landesbescht an hirem Fach; si sinn Ambassadeuren an Ambassadricë fir hire Beruffsstand, fir déi héich Qualitéit vun der Beruffsausbildung an domat natierlech och ganz allgemeng wichteg Representantë vu Lëtzebuerg. De Service vun der Formation professionelle vum Educatiounsministère ass vun Ufank un e wichtege Partner vun der WorldSkills-Beweegung. D’Directrice vun der Beruffsausbildung, d’Madame Véronique Schaber, geet um Mikro op d’Delegatioun an, op d’Chance erëm live an net digital zesummen ze schaffen an op déi gutt Virbereedung, déi souwuel an de Betriber wéi och an de Schoule stattfonnt huet.

Extrait Véronique Schaber

Offizielle Startschoss

Den 22. September war et dann endlech esou wäit. No laangem Training a Baangen, ob de Concours iwwerhaapt stattfanne kann, goufen an der Grazer Stadthalle d’EuroSkills offiziell gestart an déi Lëtzebuerger Kandidatinnen a Kandidaten hu sech als Team Lëtzebuerg op der Bühn presentéiert. Dobäi gouf all de Jonken nach eng Kéier mat op de Wee ginn, hiert Bescht ze ginn an hire Beruffsstand gutt ze vertrieden. Si hunn den offiziellen Eed ofgeluecht fir ethesch korrekt a fair ze bleiwen. Ee vun de Riedner, live aus Bréissel zougeschalt, war den EU-Kommissär Nicolas Schmit. Hien huet all de jonken Talenter vill Kënnen an och Gléck gewënscht, huet awer och op d’Wichtegkeet vun de Beruffsausbildungen an op d’Exzellenzinitiative EuroSkills higewisen.

Hei nach eng Kéier d’Lëtzebuerger Kandidatinnen a Kandidaten am Iwwerbléck:

•             Masselter Lukas – Glass Construction Technology

•             Meyer Kevin – Plumbing and Heating

•             Weiwert Steve – Web Development

•             Massen Noah – Mobile Robotics

•             Pinto Monteiro Marina – Beauty Therapy

•             Meyers Jim – Cooking

•             Silva Ivo – Entrepreneurship Business Development

•             Offner Clémentine – Entrepreneurship Business Development

•             Albert Georges – Restaurant Service

Leider sinn dëse Concours an d’Ausblidungsméiglechkeeten a Lëtzebuerg nach net esou bekannt wéi an anere Länner; dëst kéint nämlech e weidere Moyen sinn, fir anere Jonken d'Diversitéit an d'Faszinatioun vun deem engen oder anere Beruff ze weisen. Et gëtt dofir probéiert, fir iwwert dëse Wee vum Blog der Delegatioun an hirer Leeschtung um Concours méi Opmierksamkeet ze schenken. All Dag vum Concours beriichte mir live a féieren Interviewen, fir datt all d'Leit doheem de ganzen Evenement souzesoe "live" verfollege kënnen.

WorldSkills Luxembourg, d’Organisatioun, déi fir d’Organisatioun vun den nationalen (LuxSkills), souwéi d’Vertriedung vun den Europa- (EuroSkills) a Weltmeeschterschaften (WorldSkills) verantwortlech ass, gëtt ënnerstëtzt vum Educatiounsministère, dem Aarbechtsministère, dem Economiesministère resp. der Directioun vun de classes moyennes wéi och vun de Beruffschambren (Chambre des salariés, Chambre de commerce a Chambre des métiers).

Méi Informatiounen op www.worldskills.lu a www.script.lu .