E Freideg de Moie gouf den nationale Mesuren-Pak virgestallt, fir besser géint d’Drogekriminalitéit am Land kënne virzegoen.

Neie Mesuren-Pak géint Drogekriminalitéit / vum Fränz Aulner

D'Police kritt an Zukunft d'Méiglechkeet, Leit aus Entrée vu Gebaier ze verdrängen, wann et muss sinn per force. Dat ass eng vun de 27 Mesurë géint d'Kriminalitéit, déi 5 Ministeren e Freideg de Moie virun den zoustännege Chamberkommissiounen an dunn virun der Press presentéiert hunn. Et hätten och 7 Ministere kënne sinn, well d'Regierung wollt eng "holistesch" Approche hunn, déi also alles ëmfaasst, wéi de Policeminister Henri Kox widderholl huet. Well et esou "holistesch" ass, wäerten déi nei Mesuren och kuerz-, mëttel- a just laangfristeg a Kraaft trieden, respektiv hir Friichten droen. De "Platzverweis light" dee kënnt awer d'nächst Woch an d'zoustänneg Chamberkommissioun. Oder "d’Garantie d’accès", wéi den Henri Kox et léiwer nennt. Et géing drëm goen, den Equiliber ze fannen tëscht "wéi wäit geet meng Fräiheet, wou se deem anere seng aschränkt".

Zum repressiven Arsenal: d'Bodycams ginn agefouert, de Gebrauch vu Videoiwwerwaachung gëtt erweidert. Donieft gëtt de Begrëff vun Ausweisung vu Leit, déi net däerfen hei am Land sinn, am Gesetz präziséiert, fir dass déi Leit, déi an den Nopeschlänner an enger Asylprozedur sinn, net ëmmer rëm kënnen hei an d'Land Droge verkafe kommen. Den Ausseminister Jean Asselborn sot, et géing net drëm goen Leit, déi illegal hei am Land wieren, ze "kujenéieren" oder ze "kriminaliséieren", mee fir "deem entgéintzewierken", wa Leit net däerfen hei am Land sinn a kriminellen Aktivitéiten noginn.

Déi meescht Mesurë sinn awer preventiv, dorënner zielt och d'Rekrutéierung vu Polizisten, déi weider virugedriwwe gëtt, fir méi Beamten um Terrain visibel ze maachen. Ganz vill preventiv Mesurë sinn dann am Beräich Santé. Dat geet vum Ausbau vun der Offer un Therapien oder Consultatiounen, iwwert mobil Interventiounsservicer oder nach d'Dezentraliséierung vun de Strukturen: Zum Beispill soll am Norde vum Land eng Annexe vun der Stëmm vun der Strooss kommen an et gëtt nach ëmmer versicht, eenzel Servicer vun der Fixerstuff ze delokaliséieren. Standuerter konnt d'Santésministesch Paulette Lenert awer nach keng nennen. Sitte fannen, wier "déi gréisst Erausfuerderung".

Nach ëmmer preventiv: den Ubau vu Cannabis gëtt erlaabt - 4 Planze pro Stot an de Besëtz vu Cannabis gëtt ënner 3 Gramm dekorrektionaliséiert. Wann ee manner ewéi 3 Gramm bei sech huet, gëtt eng Procédure allegée agefouert. De Cannabis gëtt saiséiert an et gëtt just nach eng Amende vu 25 bis 500 Euro, amplaz wéi elo 251 bis 5.000 Euro. An de Casier kéim een net méi. Un enger Legaliséierung mat staatlechem Ubau géing awer weider geschafft ginn, sou d'Justizministesch Sam Tanson. Am Zesummenhang mam Drogekonsum huet dann nach den Educatiounsminister Claude Meisch ënnert anerem e Preventiounskonzept ugekënnegt, deen all d'Schoule sollen zesumme mat den Enseignanten ausschaffen.

De Regierungsrot huet de 27-Mesurëkatalog d’'escht Woch guttgeheescht. Eng Rei vun de Mesurë mussen nach vun der Chamber ugeholl ginn. An engem Joer géing och schonn en éischte Bilan gemaach ginn, sou wäit dat da scho waert méiglech sinn. Op de Mënschenhandel, respektiv d'organiséiert Heescherei wollten d'Ministeren op Nofro hin iwweregens net agoen. Dat well de Mesurëkatalog sech op Drogekriminalitéit géing konzentréieren. Trotzdem wäert de "Platzverweis light" dem Gaston Vogel awer wuel e bësse Satisfaktioun ginn.

Reaktioun vun de politesche Jugendorganisatiounen

Um Freideg den Owend hunn déi jonk gréng, Jonk Demokraten a Jonk Sozialisten an engem gemeinsame Communiqué op déi ugekënnegt Reform vun der Drogepolitik reagéiert. Si stelle fest, dass et an déi richteg Richtung géif goen, ma de legale Kaf a Verkaf, wéi en am Regierungsprogramm vun 2018 versprach gouf, géif weiderhin ausbleiwen. Déi politesch Jugendorganisatioune géife sech weiderhin dofir asetzen, dass nach an dëser Legislaturperiod déi néideg gesetzlech Kader-Konditioune geschafe ginn, fir e staatlech reguléierten a legale Verkaf vu Cannabis zu Lëtzebuerg.

RTL