An der CSV-Frëndeskrees-Affär ass um Dënschdeg de leschte Prozessdag ier d'Urteel den 9. Dezember gesprach gëtt.

9 Méint Prisong mat integralem Sursis an eng ubruechte Geldstrof fir de Frank Engel, 6 Méint Prisong mat integralem Sursis fir de Félix Eischen an den André Martins fir d’Ënnerschreiwe vum Kontrakt Frank Engel/Asbl CSV-Frëndeskrees, an eng ubruechte Geldstrof fir d’Elisabeth Margue, d’Stéphanie Weydert, de Georges Pierret an de Georges Heirendt - dat fuerdert de Parquet en Dënschdeg a sengem Requisitoire.

Direkt um éischte Prozessdag haten d'Affekote vun de siwen Ugeklote gefuerdert, datt de Parquet fir d'éischt géing virleeën, wat hire Mandanten dann iwwerhaapt virgehäit gëtt, well hinnen dat net kloer wier. Deem sinn d'Riichter awer net nokomm.

Prozess CSV vs Engel - Reportage Diana Hoffmann

Esou huet da musse wéi ëmmer bis ganz um Schluss vum Prozess gewaart ginn, bis de Procureur säi Requisitoire gemaach huet. An dësem feiert hien un, datt et net kann als normaalt Ofkommes tëscht Parteipresident an Tresorier ka gesi ginn, datt Sozialleeschtungen iwwerwise ginn. Ëmmerhin hätten déi jeeweileg Tresorieren Zweiwel dobäi gehat.

De Frank Engel hätt awer duerch dauernd Nofroen Drock gemaach, esou de Procureur. Wat de Kontrakt ugeet, wier et dann e fiktive Kontrakt gewiescht, well ee jo net kéint soen, datt de Frank Engel 40 Stonnen d’Woch un der Missioun geschafft hätt. Datt hie fir dat ze maachen eng Paie kritt hätt, wier och net nozevollzéien. Schliisslech wier dat jo seng Aarbecht als Parteipresident an déi wier net remuneréiert. Et wier also kloer, datt de Vertrag eenzeg an eleng existéiert hätt, well de Frank Engel Geld gebraucht hätt, nodeems seng Remuneratiounen als EU-Deputéierten ausgelaf war.

D’Ugeklote Stéphanie Weydert, Elisabeth Marque a Georges Pierret wieren da Coauteure vun der Dot, well si op der Reunioun am Abrëll 2020 all hier Zoustëmmung ginn hätten iwwert en Accord de Principe zu deem Vertrag. Si hätten all an der Mise en scène participéiert, déi der ganzer Saach sollt en Ustrach vu Legitimitéit ginn, esou de Procureur.

D’Affekote sinn dann der Meenung, datt de Procureur net op hier Plaidoyeren an hier Explikatiounen agaangen ass. Den Tresorier hätt wuel d’Kapazitéit, eng Decisioun iwwer Depensen eleng ze huelen, esou d’Maître Lydie Lorang. Eppes anescht géing net aus de Statuten ervir.

De Maîte Philippe Penning hätt da gären eng Äntwert kritt, wisou et mat enger nach ni dogewieschter Rapiditéit zu deem Prozess komm ass, wou et an anere Fäll fënnef Joer dauert, bis et zu engem Prozess kënnt. De Maître François Prüm koum dann zu der Conclusioun, datt et dorëm gaangen ass, de Frank Engel mat alle Moyene lasszeginn, an datt och de Parquet a sengem Requisitoire net méi geliwwert hätt, wéi an den Dossiere géing stoen

De Resumé vum Mâitre Frank Rollinger dann: "Dat ass fir mech méi Science politique wéi science juridique hei." De Parquet wier senger Meenung no fir politesch Muechtspiller benotzt ginn.

Um Schluss huet de Frank Engel selwer dann nach eng Kéier d’Wuert kritt. Hien sot, säi Posten als EU-Deputéierten opginn ze hunn, fir sech als Kandidat fir d’Parteipresidence ze stellen, wier wuel de gréisste Feeler vu sengem Liewe gewiescht. Et géing esou ausgesinn, wéi wann hien d’Partei wärend Jore belunn a bedrunn hätt. Dat hätt hien net verdéngt, a kee vun deenen aneren, déi ugeklot wieren. An d’Richtung vum Procureur sot hien: "Well et war net wéi dir et sot, esou war et net!"

D’Urteel gëtt den 9. Dezember gesprach.