Am Virfeld vum Debat hat sech en Experten-Grupp fir eng sektoriell Impfflicht am Gesondheetssecteur an eng Impfflicht fir Leit iwwer 50 Joer ausgeschwat.

D’Regierung huet sech e Mëttwoch de Mëtteg an der Chamber fir eng Impfflicht ausgeschwat. An hirer Introduktioun fir den Debat iwwert dës Fro an der Chamber hunn de Premier an och d‘Justiz- a Gesondheetsministesch erkläert, dass esouwuel wëssenschaftlech Experte wéi och d‘Statistike kloer feststellen, dass eng Impfflicht op d‘mannst fir Deeler vun der Populatioun néideg wier.

D'Impfflicht-Debatt an der Chamber / Rep. Fanny Kinsch

E Grupp vun onofhängege wëssenschaftlechen Experten, déi d‘Regierung fir hirem Avis gefrot hat, hat eng Impfflicht recommandéiert fir all Resident iwwer 50 Joer a fir jiddereen deen am Gesondheets- a Fleegesecteur schafft.

Et kéint ee sech net erlaben nëmmen ze hoffen, dass et riicht ausgeet, a mam aktuellen Impftempo géif et einfach ze laang daueren, bis all déi vulnerabel Leit an der Populatioun geimpft wieren, esou de Premier Xavier Bettel. Eng Impfflicht wier wuel e groussen Agrëff an déi perséinlech Fräiheet vun engem Deel vun der Populatioun. Ma doduerch kéint een aner Fräiheeten erëm zeréckginn.

„Nieft den offensichtleche Virdeeler, déi eng Impfflicht fir de Schutz vun der Gesondheet vun all Eenzele mat sech bréngt, ass d‘Perspektiv och vun engem Enn vun der Pandemie en entscheedend Argument a Richtung vun enger Impfflicht. D‘Regierung hofft och nom Akraafttriede vun der Impfflicht, Restriktioune kënnen zeréckzeféieren op e Minimum.“

De Premier nennt d'Impfflicht "alternativlos"

D‘Justizministesch Sam Tanson huet iwwerdeems erkläert, dass déi aktuell Restriktioune fir d‘Leit schonn immens wäit géife goen. Et wier een der Gesellschaft schëlleg, dës Kris séier op en Enn ze bréngen. An dat géif wéi et schéngt nëmmen iwwert eng Impfflicht goen. Dës misst awer e kloren, einfachen an transparente juristesche Kader hunn.

Fir d‘Gesondheetsministesch Paulette Lenert wier eng Impfflicht dee leschten Auswee. Ma no zwee Joer Pandemie an ouni aner Solutioun, déi zu engem séieren Enn vun dëser Kris féiert, misst een och un déi leschte Schrauwen dréie goen. Dat och en Vue vum Hierscht, wou d‘Infektioune jo erëm méi staark riskéieren ze klammen.

"Mir sinn zur Iwwerzeegung komm, dass et eis Flicht ass, no zwee Joer wou mir keen Auswee fonnt hunn a wou och haut keen aneren Auswee a Siicht ass, dass ee muss un déi lescht Schrauwen dréine goen an och déi an d‘Spill bréngen.“

Fir Gesondheet fir jiddereen z‘assuréiere misst d‘Belaaschtung fir de Gesondheetssecteur reduzéiert ginn, esou d‘Ministesch weider. Hei géife Grondprinzippie vun ieweschter Wichtegkeet openeen treffen. Ma d‘Paulette Lenert hofft, dass aus enger Flicht eng Iwwerzeegung an e solidaresche Geste géif ginn.

De CSV-Deputéierte Claude Wiseler huet sech a senger Ried gewonnert, datt d’Regierung zwar keng Propositioun op den Dësch leet, dann awer am Ufank vun der Debatt géing soen, et wier alternativlos.

"Da froen ech mech awer heiansdo, firwat mer dann d'Debatt hei banne féieren, well eng Rei vun deene Froen, déi dir eis gestallt hutt, datt mer haut solle beäntweren, sinn déi Froen, déi d'Experte scho beäntwert hunn. Wann dat elo alternativlos ass, dann ass och eis Diskussioun hei bannen onsënneg, well et geet mir net just hei drëm, fir iwwert déi kleng Detailer vun der Ëmsetzung ze schwätzen, et geet mer och drëm, fir iwwert déi grouss Prinzippien ze schwätzen."

De Claude Wiseler sot, hie géing sech Leadership a kloer Aussoe vun der Regierung wënschen. An den Ae vun der gréisster Oppositiounspartei bleift déi allgemeng Impfflicht dee beschte Wee, vun engem sanitären, gesellschaftlechen, etheschen a juristeschem Point de vue. Jiddereen iwwer 18 Joer, deen zu Lëtzebuerg wunnt oder schafft, sollt dovu concernéiert sinn, ausser et gëtt eng medezinesch Géigenindicatioun. Dat deementspriechend Gesetz misst am Februar, spéitstens am Mäerz gestëmmt ginn, fir datt jidderee genuch Zäit hätt sech ze konforméieren. Wann een eréischt géing am September géing domat ufänken, wier et schonn ze spéit.

De Claude Wiseler huet widderholl, datt een d’Accord wier fir bei der Impfflicht mat de Leit iwwer 50 Joer an dem Gesondheets- a Fleegepersonal unzefänken, awer just als éischte Schrëtt.

Den DP-Deputéierte Gilles Baum huet am Numm vun den dräi Majoritéitsparteien eng Motioun agereecht, déi e Gesetz fir eng Impfflicht fir Leit iwwer 50 Joer a fir déi Professionell aus dem Gesondheets- a Fleegesecteur fuerdert. Wéi den LSAP-Fraktiounschef Yves Cruchten duerno a senger Ried ënnerstrach huet, géinge fir d’LSAP awer nach eng Rei Informatioune feelen, iert een iwwert esou e Gesetz kéint ofstëmmen.

"Wat fir een Impakt wäert déi nei Generatioun vun Impfstoffer hunn, déi elo geschwënn deployéiert ginn an déi besser sollen op déi nei Varianten uschloen? Wat heescht dat fir d'Verhältnisméissegkeet, wann nieft dem Impfstoff an den nächste Wochen och Medikamenter an den Asaz kommen, déi e schwéiere Verlaf, respektiv den Doud verhënnere kënnen? Wéi een Impakt erwaarde mer eis vun deem neien Impfstoff, deen no méi klassesche Methoden entwéckelt gouf a wou ee kann unhuelen, datt eng Partie Leit eigentlech dorop gewaart hunn, well se vun den aktuell gebrauchten Impfstoffer veronséchert sinn?"

D'LSAP fuerdert d'Regierung op, parallel zu den Aarbechten um Gesetz Äntwerten op dës Froen ze liwweren.

D’Pirate si fir den Ament géint eng Impfflicht. Wann d’Situatioun sech géing änneren, géing ee sech enger allgemenger Impfflicht awer net verschléissen, esou de Sven Clement. Senger Meenung no wier een awer nach net do.

"De Premier huet virdru vun den Experte gesot, déi kloer zu enger Conclusioun koumen. Dozou muss een dann awer och soen, wann et sou einfach wier, da kéint ee jo u sech och d'Chamber zoumaachen, d'Regierung ofschafen, géife mer eng Technokrate-Regierung dohinner setzen, déi just nach géing Entscheedunge reng no Faktebasis huelen, da géife mer ganz séier mierken, datt och Fakte politiséieren."

Déi Lénk Deputéiert Nathalie Oberweis kann d’Conclusioun, datt eng Impfflicht néideg wier, net novollzéien. Och déi Lénk wieren net prinzipiell géint eng Impfflicht.

"Wa se sech noutwenneg erweist a wa se wëssenschaftlech ënnermauert ass. Den Ament gesinn ech awer keng wëssenschaftlech Donnéeën, déi eis beleeën, dass d'Impfflicht de Wee eraus ass. Mir schwätze vun der Impfflicht an net vun der Impfung. D'Diskussioun gëtt nämlech dacks vermëscht an dat fält mer immens oft op wa mer matenee schwätzen. An och dobaussen, dass d'Argumenter fir eng Impfung u sech geholl ginn, fir eng Impfflicht z'argumentéieren an dobäi sinn d'Argumenter u sech déi fir d'Impfung fir den Taux vaccinal an d'Luucht ze bréngen. An ech versiche wierklech ze héieren, wou d'Argumenter fir d'Impfflicht sinn, ech héieren awer haaptsächlech Argumenter fir d'Impfung."

Den ADR-Deputéierte Fernand Kartheiser huet sech kloer géint eng Impfflicht a fir déi fräiwëlleg Impfung ausgeschwat. Allgemeng huet hie virun enger – Zitat – "Iwwermoraliséirung" vun der Debatt an "Angschtmaacherei" gewarnt.

"Nëmmen e ganz ganz klenge Prozentsaz vun den Inzidenzzuelen, déi mir all Moien ze héiere kréien, féieren iwwerhaapt zu enger Krankheet. A vun deenen, déi krank ginn, kommen nëmme wéineg Leit an eng Klinik a vun deenen, déi an d‘Klinik kommen, kommen nach laang net alleguer op eng Intensivstatioun. Mir mussen oppassen, dass mir net e Klima vun Angscht verbreeden, well an engem Klima vun Angscht mécht ee keng gutt Politik."

An den Ae vum ADR wéisst ee jo schonn haut, wien am meeschte vum Virus menacéiert wier. Firwat een dann elo Leit wéilt impfen, déi selwer kaum krank géife ginn, liicht dem Fernand Kartheiser deemno och net an.

Avis vum Ethikrot en vue vum Consultatiounsdebat an der Chamber

Den nationalen Ethikrot schwätzt sech aus ethesche Grënn géint d'Propos vum medezineschen Expertegrupp aus, dee fir eng sektoriell Impfflicht ass.  Dat en vue vun der Consultatiounsdebatt iwwert d'Impfflicht e Mëttwoch de Mëtteg an der Chamber. Den Expertegrupp hat d'lescht Woch fir eng sektoriell Impfflicht am Gesondheets- a Fleegesecteur a vu 50 Joer u plädéiert. Dat geet aus engem aktualiséierten Avis ervir, deen RTL virläit.
Den 8. Dezember hat sech den Ethikrot scho fir eng generell Impfflicht fir all Erwuessener ausgeschwat. Jiddereen iwwer 18 Joer misst hirer Meenung d'selwecht behandelt ginn. Et hätt nun emol keen Afloss op säin Alter, heescht et an der Nott, déi op e Méindeg datéiert ass.

Och déi proposéiert sektoriell Impfflicht gesäit ee beim Ethikrot kritesch. Leit, déi am Gesondheetssecteur schaffen, hätte wuel eng ethesch Flicht sech impfen ze loossen, mä fir d'Impfflicht zu dësem Ament nëmmen op deen een oder anere Secteur ze limitéieren wier schwiereg. Ëmmerhi géif et drëms goen, fir zesummen aus enger Kris ze kommen, déi d'Gesellschaft als Ganzt concernéiert. Ënnerschiddlech Reegelen fir ënnerschiddlech Secteure géifen d'Saach just nach méi komplizéiert maachen. Och kéint et net sinn, datt Residenten a Frontalieren ënnerschiddlech behandelt ginn. Eng generell Impfflicht fir all Resident an all Salarié, egal wou e schafft, hätt de Virdeel fir kloer ze sinn a kéint e bësse Kloerheet an d'Mesurëpäck bréngen, déi mer déi lescht zwee Joer kannt hunn, sou den nationalen Ethikrot, deen och bedauert, datt d'Regierung net scho laang tranchéiert huet.

Hätt een net de Feeler gemaach, fir eng Impfflicht am Ufank auszeschléissen, hätt een den Debat schonn de leschte Summer kënnen ustoussen. Elo dierft een de selwechte Feeler net nach eng Kéier maachen, mä och wann d'Impfflicht keen Impakt méi op déi aktuell Omikron-Well huet, misste lo zukünfteg Riske preparéiert ginn. D'Zukunft vum Land dierft net op Hoffnunge baséieren, déi ze dacks schonn zerstéiert goufen. Prinzipiell gesinn d'Membere vum nationalen Ethikrot majoritär keng ethesch, moralesch a gesellschaftlech Problemer mat enger Impfflicht, wann d'Konditiounen derfir erfëllt sinn.

Eng sektoriell Impfflicht dierft och mat de Gewerkschaften schwéier ëmzesetze sinn. D'OGBL-Presidentin Nora Back hat sech d'lescht Woch scho bei eis op der Antenn kloer dogéint ausgeschwat. An och de Professer am Strofrecht op der Uni Lëtzebuerg Stefan Braum hat am RTL-Interview fir eng generell Impfflicht vun 18 Joer u plädéiert. Aus de selwechten Iwwerleeungen eraus wéi den nationalen Ethikrot. Bestëmmte Beruffsgruppe sollten net stigmatiséiert ginn an et wier e gesamtgesellschaftlechen Effort an der Pandemie gefrot. D'Impfflicht hätt an den Ae vum Droitsexpert och de Virdeel méi kloer ze sinn wéi déi aktuell 2G an 3G-Systemer, déi den Ament eis Fräiheeten aschränken an zu engem onkloren an ontransparente Rechtszoustand gefouert hunn.

Den UEL-President Michel Reckinger hat d'lescht Woch begréisst, datt elo mol endlech den Debat iwwert d'Impfflicht gefouert gëtt, och wann hien net mat enger konkreter Ëmsetzung virum nächste Wanter rechent. D'Patronat géif sech op alle Fall un dat halen, wat d'Experte soen an ass prinzipiell fir eng Impfflicht.