E Mëttwoch de Mëtteg ëm 15 Auer ass den Appellsprozess géint den Dr. Benoît Ochs ugaangen.

An der Cité judicaire war e Mëttwoch de Mëtteg eng méi lass. Iwwer 100 Sympathisanten hunn um Plateau-Saint Esprit op den Dr. Benoît Ochs fir säin Appellsprozess gewaart. An éischter Instanz war him virgehäit ginn, an 13 Punkte géint den Deontologieskodex vun den Doktere widdersprach ze hunn. Zu enger Uklo war et komm, nodeems den Dr. Benoît Ochs an enger ëffentlecher Ried Saache gesot huet, déi dem Collège medical no en Dokter, deen zu Lëtzebuerg schafft, net dierft maachen.

Appellsprozess Benoît Ochs / Rep. Diana Hoffmann

Seng Sympathisante gesinn dat awer anescht a ware mat Schëlder wéi "Our Hero" an "Je suis Ochs" virun d’Geriicht komm. Mat Applaus hunn si den Dokter an Empfang geholl. Dësen huet nach eng Kéier behaapt, datt de Protekoll, dee vun der Santé virgesinn ass, bei der Behandlung vu Covid-Patiente géing dozou féieren, datt Leit doheem stierwe gelooss ginn. Hien géing sech awer ëm d’Wuel vu senge Patiente suergen a géing dësen dofir net akzeptéieren.

Elo wier hien um Geriicht wéinst dem Collège Medical, deen all dës Protokoller gemaach hätt, esou den Ugekloten. Dozou zielt den Dr. Ochs och deen, dee wéilt datt Kanner geimpft ginn, woubäi hien och am Prozess behaapt huet, datt d’Risike vum Vaccin bei Jonke méi héich wieren, wéi d'Virdeeler.

Den Dr. Ochs huet dann och gesot, net fir sech selwer viru Geriicht ze sinn, mee fir d'Bierger a fir "la cause". Virum Geriicht waren eng Handvoll Polizisten am Asaz. An de soziale Medie war dozou opgeruff ginn, den Dr. Ochs um Dag vum Appellsprozess ze ënnerstëtzen.

RTL

© Screenshot vun Telegram

De President vum Collège Medical de Pit Buchler sot e Mëttwoch, datt en Dokter net kéint maache wat en wëllt. Den Dr. Benoît Ochs wéisst net besser Bescheed wei déi international Communautéit, déi all Dag dofir kämpft d’Pandemie an de Grëff ze kréien. Et géing net goen, datt hien sech zum Beispill géint d’Noutwendegkeet vu de Masken ausschwätzt. Doriwwer eraus géing de Pit Buchler sech wënschen, den Dr. Ochs géing méi eng grouss Virsiicht beim verschreiwe vu verschiddene Medikamenter un den Dag leen, wéi am Bezuch op de Covid-Vaccin.

An éischter Instanz ass dem Benoît Ochs nämlech och virgehäit ginn, Patiente mat Medikamenter behandelt ze hunn, déi net erlaabt sinn. Den Affekot vum Dr. Ochs, de Christian Bock, huet wärend dem Prozess e puer mol drop verwisen, datt d’Beweislaascht a gewësse Punkten eigentlech soll beim Collège Medical leien. Hie sot, am Moment géing ee mengen, datt et eng absolut Wourecht a Covid-Saache géing ginn. "Wann een eng aner Meenung huet, da schéngt een un de Pranger gestallt ze ginn, an ofgeschoss", sou den Affekot. Den Dr. Ochs hätt seng Aarbecht am Wuel vu senge Patiente gemaach an hätt kengem wëlle Schueden. Dofir fuerdert hie säi Fräisproch. De Collège medical wënscht sech awer, datt d’Riichter beim Urteel aus éischter Instanz bleiwen. Ee Joer Beruffsverbuet fir den Dr. Benoît Ochs. D’Urteel gëtt de 16. Mäerz gesprach.