Wat hunn d'CFL wëlles mat hire Garen, deenen alen Tunnellen oder och nach de Barrièreshäisercher vu fréier, déi deels ganz no bei de Schinne stinn?

Näischt Gutts fäerten d’Membere vu Luxembourg under Destruction, engem Grupp mat ganz villen Denkmalschützer, déi als Expats hei liewen an net verstinn, firwat zu Lëtzebuerg esou vill Patrimoine ofgerappt géif. No engem Gespréich mat engem Responsabele vun den CFL ass et hinnen ellen: ouni offizielle Bescheed kéint een dovunner ausgoen, dass de Patrimoine ferroviaire iwwerall am Land a Gefor wier.

"Luxembourg Under Destruction" - Rep. Danielle Goergen

A senger Strooss sinn ëmmer méi al Gebaier verschwonnen.  Si hunn deem Neien, deem Moderne missen weechen. Doropshin huet de Peter Kleijneburg 2019 de Facebook-Grupp «Luxembourg under Destruction – Mir wëllen hale wat mir hunn» gegrënnt. "Il y a beaucoup de gens qui m’ont contacté pour remercier et pour dire que c’est incroyable qu’on a besoin d'un étranger pour lancer cette initiative", esou de Peter Kleijneburg.  Vill Leit wieren awer frou, datt de Grupp sech fir de Patrimoine asetzt.

Zemools de Verloscht vu lokalem Patrimoine beschäftegt d'Leit. Dat, wat se kennen – woumat si Erënnerunge verbannen. Déi mannste géife sech awer trauen, fir eppes dogéint ze ënnerhuelen oder dacks mol iwwerhaapt net realiséieren, datt de Patrimoine a Gefor ass.

D’CFL wieren ee vun deene wichtegste Proprietäre vum Lëtzebuerger Patrimoine, erkläert iwwerdeems d’Karin Waringo. Si huet sech an de leschte Méint virun allem mat der Ettelbrécker Gare beschäftegt.  De Grupp ass doduercher op de Verloscht vum Patrimoine ferroviaire opmierksam ginn. Den Ausbau vum Schinnereseau géif elo vill Affer fuerderen. Bunnhaiser a kleng Garen – wichteg Zeie vun der Lëtzebuerger Industriegeschicht. "D'CFL ass am Gaang Gebaier, déi no bei de Gleiser stinn, opzekafen, fir se och ofzerappen". D'Gebaier missten aus Sécherheetsgrënn op d'mannst 7 Meter vum Achs vun deem Gleis, deen am nooste beim Haus ass, fort sinn.

Lëtzebuerg misst am grousse Ganzen ëmdenken. Manner ofrappen, mee dat aalt – dat, wat eis Land ausmécht – besser an déi nei Projeten integréieren, esou d'Karin Waringo. Wuel wier net alles schéin, ma och dat gehéiert awer zur Geschicht vum Land. "Wann der kuckt, wat nach vu Reklamme gemaach gëtt – och am Tourismus – dann ass dat bal nëmmen nach d'Landschaft an d'Bëscher, well mir vum ganze Recht net méi ganz vill ze presentéieren hunn. Et ginn am ganze Land net méi vill Duerfkären, déi erhale sinn".

Et géif vill flott Beispiller, wou nei Strukture ronderëm déi al Gebaier opgeriicht goufen an déi dës esouguer ervirhiewen, esou nach de Peter Kleijneburg.  De Patrimoine muss méi geschat ginn. Well wat ofgerappt ass, bleift verluer.