De fréiere sozialistesche Minister, Deputéierten a Gemengeconseiller Jacques Poos ass e Samschdeg am spéide Moien am Spidol verscheet.

De Jacques Poos krut 86 Joer. Ugefaangen hat de Jacques Poos seng politesch Karriär am Gemengerot zu Esch, an deen en 1969 gewielt gouf.

1974 gouf de Jacques Poos eng éischte Kéier an d'Chamber gewielt. Zu deem Ament huet de Jacques Poos och säi Posten als Direkter vum Tageblatt opginn.

Ënnert dem Gaston Thorn war de studéierten Ekonomist Finanzminister bis 1979. Anengems war hie Gouverneur vun der Weltbank, vum internationale Währungsfong a vun der europäescher Investitiounsbank.

1984 an der Regierung ënnert dem Premier Jacques Santer gouf de Jacques Poos ënnert anerem Ausseminister. Dee Ressort hat hie bis 1999 a war wärend senger Karriär och nach zum Deel zäitgläich Minister fir de Commerce extérieur, d'Cooperatioun, Minister fir de Mëttelstand, den Tresor an d'Défense.

De Jacques Poos war also Member an der Regierung a Vize-Premier bis 1999, ënnert de Regierungscheffe Gaston Thorn, Jacques Santer a Jean-Claude Juncker.

1999 ass hien an d'EU-Parlament gewielt ginn, wou hie bis 2004 war. Dono huet hie sech aus dem aktive politesche Liewen zeréckgezunn.

Senger Famill eist häerzlecht Bäileed.

De Jacques Poos hat eng laang politesch Karriär - mat ville Renconteren. Wéi eng fir hien déi spannendst waren, huet hien eis viru gutt 4 Joer an eiser Emissioun Background am Gespréich erzielt.

De Jacques Poos (1)

An dunn huet de Jacques Poos awer nach e weideren Numm genannt an zwar dee vum fréiere Palestinenserpresident Yassir Arafat.

De Jacques Poos war deemools eisen Invité, 10 Méint virun de Chamberwahlen am Oktober 2018, hien huet du schonn eng Zukunft fir Blo-Rout-Gréng gesinn an och vu senger Zäit an der Regierung, mam liberale Premier Gaston Thorn erzielt.

De Jacques Poos (2)

Reaktiounen

Mam Doud vum Jacques Poos verléiere mer ee vun deene grousse Politiker aus de leschte 50 Joer, seet den aktuellen LSAP-Ausseminister Jean Asselborn an ënnersträicht, datt säi Parteikolleeg d'LSAP iwwer Joerzéngte gepräägt huet.

Am meeschte markéiert hätt hien déi sozial Oder vum Jacques Poos a säi Message, datt d'Groussmächten d'Welt net eleng kënne regéieren, mä datt d'Reegele vum internationalem Recht mussen iwwert allem stoen.

De Jean Asselborn

De Jean Claude Juncker huet un de Jacques Poos erënnert als e Mann vu präzise Raisonnementer, vu gutt gefouerten Iwwerleeungen.

Hie wier eng vun de grousse Figuren aus de 70er, 80er an 90er Jore gewiescht.

Jacques Santer reagéiert op den Doud vum Jacques Poos
De fréiere sozialistesche Minister, Deputéierten a Gemengeconseiller Jacques Poos ass e Samschdeg am spéide Moien am Spidol verscheet.