Éier den IRM sech net regulariséiert huet, kéint et beim Refus vum Remboursement bei der CNS bleiwen, seet de Minister Claude Haagen.

Et géif en Accord de principe ginn, sot dogéint d'Gesondheetsministesch Paulette Lenert e Méindeg am RTL-Interview a reagéiert domadder op e Schreiwes vum CMP e Méindeg de Moien. Dee wär och Sujet am Verwaltungsrot vum CHL gewiescht a wär do och validéiert ginn, esou d‘Ministesch.

Iwwer d'Zesummenaarbecht tëscht CHL an dem private Gesondheetszentrum wäre sécherlech nach vill Detailer ze klären. D‘Volontéit, gemeinsam Saach ze maachen, wär awer besigelt, betount d‘Paulette Lenert.

Hir Ausso am Journal op der Tëlee e Freideg, de Centre Hospitalier de Luxembourg géif den IRM vun der Privatpraxis um Potaschbierg iwwerhuelen, wär vläicht falsch formuléiert gewiescht, erkläert d‘Ministesch. Mä dat ass hirer Meenung no en Detail.

Et wären zwou Ënnerschrëften ënnert deem Accord de principe. Aktuell wär et dem Gesetz no net erlaabt, dass eng Privatpraxis en IRM bedreift. Den concernéierte Centre médical um Potaschbierg misst sech deemno mat engem Spidol zesummendinn. Dat wär déi eenzeg Léisung, betount d‘Paulette Lenert nach, soss géif eventuell eng Fermeture bléien.

Claude Haagen: IRM-Potaschbierg muss sech regulariséieren

D'Gesondheetskeess refuséiert jo, IRM-Rechungen aus der Privatpraxis um Potaschbierg ënnert dëse Konditiounen ze rembourséieren. De Minister vun der Sécurité Sociale Claude Haagen huet gesot, dass dee Centre médical sech als éischt misst iwwer een Accord mam Spidol regulariséieren. Aktuell wär et net legal, dass déi Praxis IRM-Servicer ubitt.

Claude Wiseler: Paulette Lenert soll sech a Santéskommissioun erkläre kommen

Déi dräi lescht Gesondheetsministeren hunn am Dossier IRM ganz vill "Schlamassel" gemaach, dat ass d'Reaktioun vum Oppositiounspolitiker Claude Wiseler vun der CSV. D'Gesondheetsministesch Paulette Lenert hätt sech selwer geschuet, andeems si viru lafende Kameraen net d'Wourecht gesot hätt, erkläert den Claude Wiseler. D‘CSV fuerdert d'Gesondheetsministesch op, sech an d‘Santéskommissioun an der Chamber erklären ze kommen.