An den nächste Jore ass d'Gefor vun enger Rezessioun net auszeschléissen, esou de Wirtschaftsminister Fränz Fayot.

"Wéi mer eise leschten Wirtschaftsbarometer am Dezember 2021 erausginn hunn war d'Welt nach eng aner," sot en Dënschdeg de Moien den Direkter vun der Chambre de Commerce Carlo Thelen bei der Presentatioun vum Bilan vum éischte Semester. Am Plaz vun der erwaarter Reprise no der Covid-Kris hu mer lo mat héijer Inflatioun ze dinn an enger Wirtschaft, déi stagnéiert. D'Chambre de commerce huet de Bols bei iwwer 500 Entreprisen zu Lëtzebuerg gefillt an d'Aussiichte sinn alles anescht wéi roseg.

Nach kee Stuerm awer alles anescht wéi sonneg, esou gesäit de Barometer aus. No der Covid-Kris huet den Ukrainkrich d'Weltwirtschaft voll erwëscht, Inflatioun, Matières premièren, déi feelen, strenge Lockdown a China, deen zu weideren Liwwerenkpäss feiert, all dat Onsécherheet, Gëft fir Investisseuren, een Däiwelskrees, seet de Generaldirekter vun der Chambre de Commerce Carlo Thelen.

Ee cercle vicieux an deem Sënn, dass effektiv d'Käschte fir d'Betriber an d'Luucht ginn, also ginn hir Margen erof d'Rentabilitéit fält, d'Wettbewerbsfäegkeet geet erof an domadder och d'Capacitéit fir d'Betriber, fir méi Steieren ze bezuelen. An dann hätt een och nach een Afloss op d'Finances publiques, wat natierlech och geféierlech ass, a wou Lëtzebuerg onbedéngt den Triple A muss behalen.

D'Previsioune vu Wuesstem an Inflatioun weisen et, d'Croissance vum PIB géif dëst Joer hei am Land vu 6,9 Prozent an zejoert op 1,4 Prozent fale bei enger Inflatioun vun iwwer 5 Prozent. An dës Zenarie sinn den Experten no nach optimistesch, d'Gefor vun enger Rezessioun ass net auszeschléissen, warnt de Wirtschaftsminister Fränz Fayot.

Energie ass natierlech ee Problem awer och nach vill anerer Matière premièren, déi mer net méi erbäikréien a ville Beräicher. An dobäi kënnt eng allgemeng Veronsécherung vun de Konsumenten awer och vun de Betriber, déi den Ament einfach ofwaarden an net investéieren.

Bei 564 Betriber huet d'Chambre de Commerce eng Enquête gemaach déi weist, datt 50 vun de befroten Entreprisen d'Situatioun als stabel aschätzen. 26 Prozent hunn am éischte Semester besser geschafft, wéi erwaart, 24 Prozent méi schlecht. D'Secteuren Transport a Bau leide besonnesch duerch déi héich Energie- a Materialpräisser. Awer och den Horeca-Beräich leit. Dat Paradoxt ass awer, datt de Chômage nach niddreg bleift, esou de Minister.

Dat ass net nëmme bei eis esou, dat ass och an aneren europäesche Länner esou. Et muss ee lo kucken, ob dat bësschen dephaséiert ass, ob dat sech net mat der schwaacher Croissance alignéiert, dat huet einfach domadder ze dinn, dass net genuch Leit do si fir den Emploi, dee gesicht gëtt.

Hëllefe fir Betriber sinn néideg

D'Betriber solle weider gehollef kréie via Luxinnovation awer och europäesch Programmer, fir an digital an ëmweltfrëndlech Techniken z'investéieren. An och weider cibléiert Hëllefe wieren néideg.

Fir déi energieintensiv Betriber. Mir mussen och weider d'Industrie ënnerstëtzen a Prozeduren erliichteren an acceleréieren, fir rëm méi Industrie op Lëtzebuerg ze kréien.

D'Verréckele vun der Indextranche, déi fir Juli virgesinn ass, géing de Betriber fir den Ament genuch Previsibilitéit ginn a wann d'Tranche mol verréckelt gëtt, kréien d'Gehälter bis 100.000 Euro Brutto d'Joer jo degressiv Steierkreditter. Donieft ginn et jo nach cibléiert Hëllef fir d'Leit a fir d’Betriber, sou datt de "Solidaritéitspak" dem Franz Fayot no nach ëmmer "valabel" wier.

Kuerzfristeg wier et awer net néideg, eng weider Tripartite anzeberuffen. Do si Minister a Patronatsvertriedung sech eens.

9% vun de Betriber hunn Energiekäschte ganz ofgewälzt

Konferenz Chambre de Commerce / Reportage Fränz Aulner

De Krich an der Ukrain huet scho staark Inflatioun nach méi an d’Luucht gedréckt an de Wirtschaftswuesstem ofgebremst. D'Chambre de Commerce huet en neie Barometer vun der Ekonomie presentéiert, bei deem 564 Lëtzebuerger Betriber mat méi wéi 6 Salariéë matgemaach hunn. 37% vun de Betriber wiere gezwonge gewiescht, hir Margen erofzesetzen. 41% hunn d'Hausse vun den Energiepräisser zum Deel op hir Clientë kënnen ofwälzen. Just 9% konnten déi Käschte ganz ofwälzen.

Den Direkter vun der Handelskummer Carlo Thelen sot, d'Betriber géinge probéieren, dolaanscht ze kommen oder en Equiliber ze fannen, mee dat géing just bis zu enger gewëssener Zäit goen. Bis elo wieren nämlech eng Rei Energie-Kontrakter vu "Betriber nach OK", sou de Carlo Thelen, mee déi wäerten am Laf vun den nächste Méint musse nei verhandelt ginn. Laangfristeg Kontrakter wäerten ersat ginn duerch punktuell Akeef, wat dramatesch wier fir d'Previsibilitéit. Op der anerer Säit wéissten d'Betriber och, datt d'Konsumenten net alles kéinten opfänken, sou de Carlo Thelen. Dowéinst hofft den Direkter vun der Handelskummer, datt d'Kris net méi laang dauert.