2 Joer Prisong mat eventuellem Sursis an eng Geldstrof, dat fuerdert de Parquet fir den Auteur vu verschiddene Bréiwer mat Menacen.

An der Pandemie sinn eng Rëtsch Bréiwer mat Menacë beim Staatsministère, der Santé, der CNS, an och bei RTL agaangen. Doran huet den Auteur mat Attentater menacéiert, ënnert anerem op Impfzenteren. An de Bréiwer war e bronge Polver. Elo huet de Mann sech misse viru Geriicht veräntwerten. 3 Méint souz den Auteur an Untersuchungshaft, e Mëttwoch de Moie stoung hie viru Geriicht, ënnert anerem wéinst Menace d'attentat. De Mann ass Papp vun engem 8 Joer ale Meedchen a wunnt zanter 10 Joer zu Lëtzebuerg. Säi Casier war bis ewell eidel.

Réckbléck

De Staatsministère, d'Santé an d'CNS kruten am Juli 2021 Post. Et war e Bréif voller Menacen: den Auteur huet sech géint d'Corona-Politik gewiert an ënnert anerem mat Attentater op Impfzentren gedreet. An zwee vun de Bréiwer war e brongt Polver, wat dann och eng gréisser Enquête ausgeléist hat. Wéi sech erausgestallt huet, war et Peffer.

Am Dezember 2021 huet de Mann dunn den nächste Bréif verschéckt, ënnert anerem och un d'RTL-Redaktioun. Dee Bréif war un de Premier Xavier Bettel an un d'Gesondheetsministesch Paulette Lenert perséinlech adresséiert. Am Bréif gouf et explizitt Menacë géint de Mann vum Premier an d'Kanner vun der Gesondheetsministesch.

Dora sti Sätz wéi: je vais lui couper la gorge pour enfin l expédié chez vous en morceaux“

Oder och nach: „M.Me PAULETTE LENERT, je serais direct avec vous, VOUS TOUCHÉ MES ENFANTS, MOI JE VAIS TOUCHER VOS ENFANTS. (…) J IMAGINE DEJA LEURS CORPS DÉCAPITÉS ET APRES JETTE DANS LA MOSELLE.“

Déi grammatesch Opfällegkeete waren et dunn och, déi d'Enquêteuren op d'Spuer vum Mann gefouert hunn, erkläert de Jacques Thiele bei senger Ausso viru Geriicht. Et wier ee schonn am August, also virun der zweeter Serie Bréiwer, op e sougenannte Fake-Profil bei Facebook gestouss, dee verschidden Noriichtenartikele kommentéiert hat. Den opfällege Schreifstil an de Kommentare wier de selwechte gewiescht wéi an de Bréiwer.

Duerch eng Perquisitioun bei Facebook sinn d'Enquêteuren dunn op d'Handysnummer vum concernéierte Facebook-Konto gestouss. D'Identitéit vum Mann konnt duerno séier gekläert ginn, a schonn een Dag, nodeems déi zweet Serie Bréiwer verschéckt gouf, ass de Mann dunn den 9. Dezember 2021 verhaft ginn.

„E schwaache Moment“

Viru Geriicht huet de 37 Joer ale Buschauffer am groen T-Shirt sech zeréckhalend gewisen, en huet meeschtens op de Buedem gekuckt a war ganz op seng Iwwersetzerin konzentréiert, déi him de Prozess simultan iwwersat huet. Ouni ze zécken, huet hien zouginn, d'Bréiwer geschriwwen ze hunn. Hie wier zu der Zäit immens frustréiert iwwert d'Restriktioune gewiescht an d'Schreiwe vun de Bréiwer wier an engem „Moment de faiblesse“ geschitt. D'Dot huet hien als "débile" bezeechent.

De Riichter huet dogéint gehalen, et wieren schliisslech zwee verschidde Bréiwer gewiescht, an och déi Recherchen, déi de Mann iwwert de Xavier Bettel an d'Paulette Lenert gemaach hätt, géinge weisen, dass et premeditéiert gewiescht wier.

Mat der Fro konfrontéiert, wat e sech dobäi geduecht hätt, konnt de Mann keng richteg Äntwert ginn. "Je me fais peur à moi-même", sot hien, wéi de Riichter him d'Aggressivitéit an d'Virulenz vun de Menacë virun Ae gehalen huet.

De Parquet huet d'envergure vun der Enquête betount an ass op de Kontext vun der eskaléierter Maniff um Chrëschtmaart agaangen. Uganks Dezember zejoert haten Demonstranten de Chrëschtmaart bei der gëlle Fra gestiermt a sech och virun dem Premier sengem Haus versammelt, fir géint d'Covidmesuren ze demonstréieren. D'Maniff war net friddlech bliwwen an et ass zu Vandalismus komm. Virun dem Hannergrond hätt een de Bréif vum aachten Dezember immens eescht geholl.

De Parquet huet schliisslech eng Prisongsstrof mat eventuellem Sursis vun 2 Joer gefrot an eng Geldstrof. D‘Urteel gëtt de 16. Juni geschwat.