D'Gesondheetsministesch bedauert, datt quasi all d'Kardiologen, déi am Ettelbrécker Spidol geschafft hunn, elo definitiv decidéiert hu fortzegoen.

D'Paulette Lenert wier awer zouversiichtlech, datt nei Häerzdoktere géinge fonnt ginn a géing och begréissen, datt déi 6 Medezinner sech bereet gewisen hunn, fir noutfalls e bësse méi laang am CHdN ze bleiwen. D'Gesondheetsministesch huet nach emol widderholl, datt ee bei der Fro vun der Remuneratioun vun de Gardë bis Enn vum Joer mat enger Léisung géing rechnen.

Kardiologie CHdN / Reportage Fanny Kinsch

De President vun der Doktesch- an Zänndokteschassociatioun Alain Schmit huet e Mëttwoch de Moie bei de Kolleege vum 100,7 kritiséiert, datt geplangt wier, datt d'Garden iwwert d'Spideeler bezuelt ginn an net direkt un d'Dokteren: dat wier Ueleg op d'Feier geschott.

Fir d'Ministesch Paulette Lenert ass dee System awer logesch: "D'Spidol ass laut Gesetz responsabel, fir Garden a verschiddene Spezialitéiten z'assuréieren. Si sinn och déi, déi wëssen, wéi se dat maachen, wéi een Dokter wéini am Asaz ass. Vun dohier ass et fir eis logesch an och am Sënn vum Gesetz, dass mer déi Suen un d'Spideeler ginn. D'Diskussioun oder den Doute, ob dat eent zu eent géif bei den Dokter weidergoen, déi ass och geféiert ginn. Do hu mir vun eiser Säit aus Assurancë ginn, an et ass och an deene Konventiounen, déi scho stinn, fir d'Maternitéen hu mer scho Konventiounen, op alle Fall ganz kloer a menges Wëssens um Terrain och onbestridden, dass dat eent zu eent weidergeet."
Zwee fréier Membere vum Grupp hätte sech zwar doru gestéiert, datt d'Garden net bezuelt goufen, awer hir Kënnegunge wieren an éischter Linn dorop zeréckzeféieren, datt d'Privatliewen ze vill ënnert dem Beruff gelidden hätt. Op d'Problematik am CHdN ugeschwat, seet d'Gesondheetsministesch, si wier sech dëser bewosst an et géing een u Léisunge schaffen.

"Mir probéieren, d'Zesummeschaffe vun den Dokteren ze vereinfachen a méi attraktiv ze maachen. Ënnert anerem erwaarden ech mer do eppes vum Projet iwwer d'Gesellschafte vun Dokteren, déi et erlaben zu méi zesummen déi selwecht Charge ze assuréieren, sech eventuell ofzewiesselen oder Part-Time ze schaffen. Dat ass fir deen Eenzele schwéier a méi einfach, wann ee sech strukturéiert kann zesummesetzen, sou wéi an anere Beruffer och."

Bis ewell ginn déi meescht liberal Dokteren nach net dofir bezuelt, wa si Garden an engem Spidol hunn. Dat soll sech an noer Zukunft änneren.

"6 Leit sinn ëmmer duergaangen zu enger Zäit, wou d'Doktere geschafft hu mat enger Stonnenzuel d'Woch, déi haut kee méi mécht", seet den Direkter vum CHdN Paul Wirtgen.

De Kardiolog Laurent Visser dréckt et esou aus: "Dat ass en haarden Job, ech hunn deen elo 22 Joer gemaach, ech hat am Prinzip och wëlles, fir deen nach e puer Joer weider ze maachen, bis ech meng 60 Joer erreecht hunn, mee wann awer keng Basis méi do ass vu jonke Leit, déi dat weider wëlle fueren, dann ass et fir de Rescht vun der Ekipp net méiglech, fir op nidderegem Niveau déi Aktivitéit weider ze fueren. Mat manner Leit méi ze schaffen, dat geet net."

De Laurent Visser an déi aner 5 demissionär Häerzdokteren hunn decidéiert, sech op hir gemeinsam Praxis ze konzentréieren.

"Dat war eng ganz schwéier Decisioun, déi op eemol plëtzlech noutwenneg ginn ass, well 2 jonk Kolleegen aus private Grënn wollten ophale mat där Kliniksaktivitéit. Dunn huet sech natierlech d'Fro gestallt, wien iwwerhëlt déi Chargen? A mir hunn agesinn, datt dat fir eis net méi ze stemmen ass."

An zu Ettelbréck sicht een nei Kardiologen, fir déi d'Spidol Prioritéit huet, sou de Paul Wirtgen.

"Mir sichen elo just a mir hunn nach, mee mir vergréisseren d'Ekipp, déi Kardiologen, déi elo mol am Spidol schaffen. Ob déi a wéi déi Praxis maachen, dat beschwätze mer mat hinnen, mee déi kënnen dat och intern am Spidol maachen, well mir hunn, wat een nennt, eng kardiologesch Poliklinik, wou genau déi ambulant Examen och kënne gemaach ginn."

Da kéint déi Aarbecht och mat der selwechter Zuel u Kardiologe gemeeschtert ginn, sou de Paul Wirtgen. A Konkurrenz mat deenen anere Spideeler géing ee senger Meenung no awer net kommen, et géing ee wuel éischter aus dem Ausland rekrutéieren.