Wéinst dem gemellte Glatäis a Schnéi kënnt et e Mëttwoch zu enger ganzer Partie Ofsoen.

Hei en Iwwerbléck vun den Annulatiounen, déi d'RTL-Redaktioun bis ewell matgedeelt krut. Den Artikel gëtt permanent aktualiséiert.

Sämtlech Informatiounen an déi neisten Entwécklunge fannt Dir och an eisem Liveticker zur Alerte rouge.

Gemengen

Clierf: Wéinst der aktuell gemellte Wiederkonditioune fir Muer ass an der Gemeng Clierf keng Sammlung vun der Superdreckskëscht. Dat betrëfft souwuel d'Haus-zu-Haus-Sammlung wéi och d'Container-Sammlung. 

Déifferdeng: De Campus Kannerbongert bleift zou. D'Kanner ginn um Mëttwoch an d'Schoul Woiwer, respektiv de Foyer Kornascht.

Diddeleng: Wéinst der Meteo kënnt et zu enger Partie Ännerunge bei den Ëffnungszäiten, d'Kollekte vun de Poubelle goufe verluecht an et sinn och e puer Stroosse gespaart. Informatioune fënnt een um Internetsite vun der Gemeng.

Zu Dippech gëtt d'Collecte vun de Poubellen e Samschdeg nogeholl.

Esch: Och an der Gemeng Esch bleiwe sämtlech Schoulen zou (en Accueil ass assuréiert an d'Maison-relaise sinn op), et ass kee Schoultransport an och de Pedibus fiert net. Detailer an hirem Schreiwes.

Ettelbréck:D'Gemeng Ettelbréck deelt mat, dass de Schoultransport net fiert. Wéi offiziell ugekënnegt, wäert awer en Accueil an de Schoulen & Maison-relaisen ugebuede ginn. D'Büroe vun der Gemeng maachen ausnamsweis um 16.30 Auer zou an et ass och keng Nocturne.

Gréiwemaacher: Haut gëtt de ganzen Dag kee Biooffall opgeholl, dat gëtt e Samschdeg nogeholl.

Kielen: Den Neijoerschpatt e Mëttwoch den Owend an der Musekshal Keespelt-Meespelt ass op en Donneschdes 19 Auer verluecht ginn.Weider Infoen um Site vun der Kielener Gemeng.

Wolz: D'Schwämm an d'Sportshal vum Lycée, grad ewéi d'Sportshale Millermialer a Geenzepark sinn zou.

Schoulen

Uni Lëtzebuerg: Opgrond vun de Wiederkonditiounen sinn d'Presenzexamen e Mëttwoch 17. Januar ofgesot a verréckelt. D'Studente ginn all kontaktéiert.

Lycée Technique pour professions éducatives et sociales: Opgrond vun der Alerte bezüglech de Wiederkonditioune wéilte mir eise Soziale Stamminet an der Maison de retraite St. Joseph zu Miersch e Mëttwoch den Owend 18.30 Auer ofsoen.

Message vum Inneministère: Sämtlech Examen "à distance a présentiel" si fir muer annuléiert.

D'Maacher Museksschoul bleift e Mëttwoch zou.

Athénée: D'Cours adultes e Mëttwoch den Owend sinn annuléiert.

Servicer

Bummelbus: Opgrond vun der Altere rouge annuléiert de Service Bummelbus vum Forum pour l'emploi alleguerten déi geplangten Faarten vun hire Cliente fir muer, de 17.01.2024.

STEP:Aus Sécherheetsgrënn bleiwen déi zwee Recyclingparke vum STEP zu Diddeleng/Beetebuerg an zu Téiteng/Rëmeleng e Mëttwoch, 17. Januar 2024 de ganzen Dag zou.

Post: D'Bréifdréiere fuere muer net eraus, deemno gëtt kee Courrier a keng Zeitung verdeelt. Och d'Distributioun vu Päck ass affektéiert. D'Butteker bleiwen op.

Lamesch: Wéinst der Wiedersituatioun dierfen e Mëttwoch keng Gefierer vun iwwer 7,5 Tonnen iwwer d'A1, d'A6 an d'A13 fueren. Dowéinst ass ee beim Lamesch forcéiert, d'Prestatiounen anzestellen.

Servior: D'Firma deelt mat, dass et opgrond vun der Situatioun op de Stroossen zu Verspéidungen oder Ënnerbriechunge beim "Repas-sur-roues" komme kéint.

Sigre: D'Poubellen an enger Partie Gemengen - Bech, Bous-Waldbriedemes, Duelem, Lenneng, Mäertert, Stadbriedemes a Wuermer - ginn net eidel gemaach. Dat gouf op e Samschdeg geréckelt.

Sidec: Wéinst der Wiedersituatioun gi keng Poubellen eidel gemaach. A follgende Gemenge wäert dëst dann e Samschdeg, den 20. Januar nogeholl ginn:

Biekerech: déchets ménagers
Biissen: biodéchets
Ell: déchets ménagers
Eschsauer: verre creux
Feelen: biodéchets
Stauséigemeng: verre creux
Mäerzeg: biodéchets
Préizerdaul: papier/carton
Réiden un der Atert: déchets ménagers
Ëlwen: biodéchets
Wäiswampach: biodéchets

Sport

Basket: D'Basketfederatioun deelt mat, dass all Matcher vum 17. Januar wéinst der Alerte rouge ofgesot sinn. Domat ginn 2 Matcher an der LBBL bei den Hären net gespillt, Conter - Mamer a Gréngewald - Kordall stoungen um Programm.

LASEP: Sämtlech Seancë fir muer sinn annuléiert.


Evenementer, Kultur a Fräizäit

Amicale des Anciens Spuerkeess: Leider muss d'Amicale des Anciens Spuerkeess hier Assemblée Générale vu muer dem 17 Januar wéinst de schlechte Wiederkonditiounen ofsoen.

Conservatoire du Nord, Esch a Stad Lëtzebuerg: D'Coursen an Exame vun e Mëttwoch sinn ofgesot.

Conservatoire du Nord: De Concert PopRock am CAPE ass ofgesot.

BnL: D'Nationalbibliothéik informéiert hir Lieser, datt de Bicherbus-Service de Mëttwoch 17. Januar 2024 wéinst schwierege Stroossekonditiounen ofgesot ass. D'BnL selwer bleift awer op. Donieft mécht d'BnL e Mëttwoch dann och schonn hir Dieren um 18 Auer zou. En Donneschdeg ass nees zu de gewinnten Zäiten op.

Domaines Vinsmoselle: Den Neijoerschpatt ass ofgesot.

Club Senior Prënzebierg:  Déi verschidden Aktivitéiten, déi fir e Mëttwoch geplangt waren, sinn annuléiert.

Seniorentreff Käerch: D'Generalversammlung vu 14.30 Auer ass ofgesot a gëtt op en aneren Dag verluecht.

Rainbow Center: D'Lancement vu queer.lu e Mëttwoch den Owend 19 Auer ass verluecht an och den Zenter bleift zou.

Senior Club Kielen: Sämtlech Aktivitéite sinn ofgesot.