D'Embraer E-195-E2 war op Besuch
Deen éischte Fliger soll Enn nächst Joer ukommen. Dräi dann 2026. Ma 5 weider Maschinne si scho bestallt.
"Profit-Hunter" stoung op deem Fliger, deen e Freiden de Moien um Flughafe Findel ze gesi war. Bei der Maschinn, déi ugemoolt ass wéi e faarwegen Adler, handelt et sech ëm e Fliger, dee ronderëm d'Welt flitt, fir nei Clienten ze fannen. Numm an Ustrach sollen iwwerzeegen, dass en effizienten a rouege Fluch gebuede gëtt. Bei Luxair ass dëst dem Constructeur aus Brasilien scho gelongen. 9 Fligeren aus der Embraer E2-Famill sollen an d'Flott integréiert ginn an domat d'Q-400 mat 76 Sëtzplazen ergänzen.
"Dat do ass wierklech d’Zukunft", sot de Generaldirekter vu Luxair bei der Presentatioun vum Fliger um Findel. Dat besonnescht um Fliger wier, dass et deen ekonomeschste regionale Fliger wier, deen ee kafe kéint. "De Fliger bréngt 25 Prozent Aspuerunge vum Keroseng an domat och vun den CO2-Emissiounen", huet d'Marie-Louise Philippe ergänzt, déi Verkafsdirektrice vun Embraer fir Europa an Zentralasien ass. Fir seng Gréisst mat enger Reechwäit vu 5.000 Kilometer an der Kapazitéit ënner 150 Sëtz wier et deen effizientste vu senger Kategorie.
D'195-E2 mat Plaz fir 136 Passagéier géing e groussen Ënnerscheed fir Luxair maachen, huet sech de Gilles Feith gefreet. De Fliger kéint all d'Destinatiounen an Europa an d'Kanaresch Inselen ufléien. Et wéilt een en awer méi op Kuerzstrecken asetzen. Dëst géing Luxair hëllefen, besser an engem finanziell schwieregen Ëmfeld eens ze ginn. De Lëschtepräis vun Embraer léich pro Maschinn iwweregens bei iwwer 80 Milliounen.
Fir d'Passagéier soll et da méi Confort ginn, wéi bis elo. Bedeitend méi Plaz wéi an der Q-400 wäert et fir d'Gepäck an der Kabinn ginn. "D'Gepäckfächer si méi déif well mer de System vun der Klimaanlag geréckelt hunn", huet de Guy Douglas erkläert, dee fir d'Kommunikatioun vum Projet E2 responsabel ass. All Passagéier huet domat Plaz, fir säi Bagage ze stockéieren. Awer och ënnert dem Sëtz wäert däitlech méi Plaz si fir Gepäck. Doriwwer eraus wier de Geräsichpegel an der Kabinn am Verglach zum Virgängermodell ëm 50 Prozent reduzéiert. An et gi just 2 Sëtzreie mat jeeweils 2 Sëtzer. Den onbeléifte Mëttelsëtz fält also ewech.
"Et ass dee gréisste Fliger, dee kann op London City fléien, mee mer wäerten och zum Beispill op Lissabon fléien", huet de Gilles Feith vun de Pläng erzielt. Mat den neie Maschinnen hätt een d'Méiglechkeet, de Reseau auszebauen an nei Destinatiounen unzebidden. Den Ament bedéngt Luxair 96 Destinatiounen am europäesche Reseau an d'Kanaren. Dat mat 10 Boeingen an 11 De Havilland Q-400.
Déi éischt Embraer-Maschinn soll Enn vum nächste Joer geliwwert ginn. Déi dräi aner dann 2026. Bei de 5 weidere Fliger, déi Luxair kafe wëll, ass nach net ganz kloer, fir wéi een Embraer-Modell ee sech entscheede wéilt. D'195-E2 oder déi méi kléng 190, déi eng Kapazitéit fir bis zu 110 Passagéier huet. Ma d'Präferenz léich den Ament op der méi grousser, huet de Gilles Feith verroden. Fir hien ass dann och elo scho kloer, dass et mat den 9 Fliger, déi bäikommen, warscheinlech nach net wäert duergoen.
Embraer ass no Airbus a Boeing deen drëttgréisste Fligerconstructeur vun der Welt. Luxair hat schonn an der Vergaangenheet déi méi al Embraer-Fligeren ERJ-145 an ERJ-120 agesat.
