Kuerz viru 17.40 Auer waren d’Pompjeeë vu Miersch an d’Ambulanciere vu Lëntgen op Miersch an d’Rue Grand-Duchesse Charlotte geruff ginn, nodeems hei e Foussgänger vun engem Auto ugestouss a blesséiert gouf.
Knapps eng Stonn méi spéit waren dann op der A6 a Richtung Arel op der Héicht vum Zéissenger Kräiz zwee Autoen anenee geknuppt. Och hei gouf et ee Blesséierten, dee vun de Rettungsekippen aus der Stad versuergt gouf.
E weidere Foussgänger gouf blesséiert, wéi dëse géint 18.45 Auer an der Lëtzebuerger Strooss zu Schieren ugestouss gouf. Um Asaz waren d’Ambulanciere vum Zenter Nordstad an d’Pompjeeë vu Colmer-Bierg.
Eng zéng Minutte méi spéit waren iwwerdeem zwee Autoen op der RN04 tëscht der Cloche d’Or a Leideleng kollidéiert, woubäi eng Persoun verwonnt gouf. Hei waren nees d’Rettungsekippen aus der Stad am Asaz, dat mat engem Samu-Noutdokter.
An der Nuecht op e Freideg kuerz virun 1 Auer ass dann nach e Chauffer mat sengem Gefier an e Bam gerannt. Dat um CR158 tëscht der Kockelscheier a Réiser. D’Ambulancieren aus der Stad an d’Pompjeeë vu Réiser hu sech ëm déi blesséiert Persoun gekëmmert.
