RTL-Informatiounen no gouf de Max Leners, deen als lénken Aktivist gëllt, aktiv vun der Parteileedung ënnerstëtzt, fir bannent dem Staatsrot fir e Méi u Politik ze suergen.
Den LSAP-Politiker gouf virun de leschte Chamberwale virun allem duerch eng Publikatioun, “Das politische ABC des Luc Frieden”, bekannt, an där hien den aktuelle Premier Luc Frieden a seng “neoliberal Politik” zolidd kritiséiert huet.
De Max Leners koum bei de Legislativwalen zejoert op der LSAP-Südlëscht mat knapp 17.000 Stëmmen op déi 17. Plaz a gouf deemno net an d’Chamber gewielt.
D’LSAP schreift, si wier houfreg, mam Max Leners deene Jonken eng Stëmm am Staatsrot ze ginn.
