Assistéiert gëtt d’CSL-Presidentin dat nächst 5-Joeres-Mandat vun de Vize-Presidenten Patrick Dury (LCGB) a Jean-Claude Reding (OGBL).
An hirer Untrëttsried huet d’Nora Back ë.a. de Fokus op d’Formatioun, d’Kanneraarmut an d’Steierongerechtegkeet geluecht, déi weider soll ausgebaut ginn. De Formatiouns-Congé géif bei wäitem net duer goen, duerfir misst deen erhéicht ginn.
Reformen a Moderniséierunge ginn och an der Beruffsausbildung fir d’ Apprentien gefuerdert.
A punkto Steieren sot d’OGBL-Presidentin, datt et intenabel wier, datt Kapitalereträg an de Patrimoine net géife besteiert ginn - dës Ongerechtegkeete géifen wuel och déi nächst Jore bestoe bleiwen.
Enttäuscht weist sech d’CSL-Presidentin iwwert d’Annoncë vum Premier Frieden iwwert de Logement an d’Klimapolitik - et wier kee grousse Worf a scho guer kee Paradigmewiessel, mee éischter e Spuerpak.
An der CSL-Plenière mat sengen 9 Gruppen huet den OGBL mat 37 Sëtz d’Majoritéit, virum LCGB mat 17 Memberen, der Aleba mat 5 Sëtz an engem Syprolux-Vertrieder.
Knapp 617.000 Wieler waren opgeruff, fir bei de Sozialwalen mat ze maachen - um Enn haten eng 210.000 Salariéen a Pensionären hire Stëmmziedel ageschéckt, wat enger Bedeelegung vun 34% entsprécht.
An d’CSL goufen och 17 Frontalieren gewielt - 27 Memberen sinn nei an deem Gremium dobäi.
