Zanter Mee kéint een Asätz fléien, esou de CEO Wieger Ketellapper , dee selwer Pilot ass an och d’Maschinne ka bedéngen.
En éischte Kontrakt huet ee mat der spuenescher Regierung. 3 Läschfliger sinn den Ament permanent a Spuenien an der Géigend vu Valencia stationéiert a kënnen, wa gebraucht, bannent 15 Minutten op en Asaz starten.
Och a Portugal gëtt et aktuell vill Bëschbränn. Déi 4. Maschinn, déi een zanter August huet, kéint do an den Asaz kommen, wa se nach gebraucht gëtt. “Mir haten et e puer Mol, dass mer gefrot gi sinn, fir hëllefen ze kommen, ma dunn nees kuerzfristeg gesot kruten, dass mir net gebraucht ginn”, esou de Wieger Ketellapper am Interview. Dat wier eben Deel vum Business.
Et géif och Gespréicher mat der Lëtzebuerger Regierung ginn, fir ze kucken, wéi een an Zukunft kéint zesummeschaffen. Weider Fligere sollen dobäikommen. 2026 wéilt een 12 Fligere zur Verfügung hunn.
Um Dënschdegmëtte gouf um Findel e Promofilm gedréint. Insgesamt gouf 5 Mol Waasser erausgelooss. Et wier och d’Méiglechkeet gewiescht, dem Personal vun der Cargolux ze weisen, wéi esou Asätz ausgesinn. Géint 16.30 Auer konnt een déi giel-rout Maschinn iwwer dem Iechternacher Sei fléie gesinn, dat well een e Sonndeg um nationalen Dag vum CGDIS eng Virféierung mécht. DAC hätt eng Geneemegung ginn, dass de Pilot sech d’Plaz kéint ukucken. E Sonndeg géint 14 Auer géif dann och Waasser iwwer dem Iechternacher Séi erofgelooss ginn.
Gutt ze wëssen: Quasi all d’Läschfligere si giel, rout wier den Touch Cargolux, deen ee wollt bei de Fligere bäibehalen, esou de CEO vun Aquarius Aerial Firefighting.
