Wéi d’Police mellt, kruten d’Leit an deem Kontext och gefälschte Maile vun der Police selwer respektiv Bee Secure, der Lëtzebuerger Justiz oder och auslännesche Police-Autoritéite geschéckt.
An der Reegel géifen d’Auteure vun de Mailen, den Affer reprochéieren, eng Strofdot verüübt ze hunn a si dann opfuerderen, Suen ze bezuelen.
D’Police mécht drop opmierksam, dass et sech bei dëse Mailen ëm Fälschungen handelt. Wien esou eng Mail kritt huet, soll se ignoréieren a läschen. Iwwerdeems biet d’Police d’Leit drëms, eeler Matmënschen an hirem Ëmfeld iwwer d’Bedruchsmasch opzeklären.
