Ee vun de Gewënner ass de Projet “shared kitchen” vun der sozialer Entreprise Microtarians um Kierchbierg.
D’Firma, déi am Fong Aus- a Weiderbildungen am Beräich vun der gesonder an nohalteger Ernierung ubitt, wäert interesséierte Leit hei Kichenapparater zur Verfügung stellen. Dem Björn Lorenzen, Mat-Grënner a Responsabele vun der Entreprise, no géinge sech eng Partie Leit nämlech schwéier doen, doheem ze kachen.
“Wenn man sich gerade den Kirchberg anguckt, aber auch die Wohnungsnot in Luxemburg allgemein; viele Leute erzählen immer wieder, sie würden gerne mit Freunden was gemeinsam machen, aber der eigene Raum ist nicht groß genug oder die Wohnung aufzuräumen ist zu stressig, zusätzlich wenn man sowieso schon einen langen Arbeitstag hat. Deswegen bieten wir also unseren Raum an.”
Et géing een drop setzen, datt Leit aus ganz ënnerschiddleche soziale Schichten hei zesummekommen a sech austauschen. Dozou bäidroe soll, datt een och méi ausgefale Maschinnen, zum Beispill fir Popcorn oder Glace ze maachen, uschafe wäert. Ma gläichzäiteg setzt een op Nohaltegkeet, andeems een alen Apparater een zweet Liewe schenkt.
“Das Projekt ermöglicht es uns, manche Sachen anzuschaffen, für die das Geld sonst nicht da wäre. Auf der anderen Seite haben wir vieles schon und, weil sie das zweite Leben angesprochen haben, arbeiten wir auch mit dem Repair Café zusammen. Da wird es dann möglich sein, alten Geräten ein zweites Leben zu geben oder auch die Wartung der Geräte sicherzustellen.”
Och wann ee bei Microtarians op gesond Ernierung Wäert leet, duerfen d’Leit, déi d’shared kitchen notze wëllen, awer kache wat se wëllen. Et besteet awer och d’Méiglechkeet, d’Kichenapparater auszeléinen. Dofir muss dann ee gewësse Montant bezuelt ginn. Wéi vill genee, ass awer nach net gewosst, déi verschidden Offere gi réischt ausgeschafft.
