Déi offiziell Ouverture war den 21. September, dat a Presenz vun ënner anerem de Ministere Lex Delles a Léon Gloden. D’Wierk besteet zanter 1992 an ass zanter 2022 Deel vum Webasto-Grupp.
Duerch den Invest an de Standuert ginn iwwer 60 nei Aarbechtsplaze geschaaft. D’Produktiounsfläch gëtt duerch d’Erweiderung ëm 13.000m2 vergréissert. En zentraalt Element vum Invest ass d’Installatioun vun enger Photovoltaikanlag vum Daach, dat mat enger Leeschtung vu 4,5 Megawatt-Peak. Hei gi pro Joer ronn 3,95 Gigawattstonne Stroum produzéiert. D’Anlag ass sou grouss wéi 3 Futtballsterrainen an hëlleft massiv bei der Reduzéierung vum Stroumverbrauch.
Et hätt een elo eng vun de modernste Produktiounslinne fir Hightech-Glas op der Welt, woumat ee seng Innovatiounskraaft am Beräich Daachsystemer weider ausbaut, esou de Jan Henning Mehfeldt vu Webasto. No just 2 Joer wier een elo zu Gréiwemaacher optimal opgestallt, fir der wuessender Demande no Daachsystemer mat Hightech-Glas an der Automobilindustrie nozekommen.
