De CGDIS gouf um 4 Auer alertéiert, well e Camion op engem Parking Salzsaier verluer hat. Dës Substanz ass schiedlech fir d’Gesondheet, wann een domadder a Kontakt kënnt. Dowéinst gouf eng spezialiséiert Ekipp mat engem extrae Sécherheetsequipement vum CGDIS op d’Plaz geschéckt an e Sécherheetsperimeter gezunn.
Déi éischt Rettungsequippen op der Plaz hätten du festgestallt, dass si d’Fuite net kéinte flécken, erkläert d’Chef de Compagnie vum Asaz, d’Annick Baustert. Doropshin ass decidéiert ginn, dee ganze Flëssegkeet-Tank vum Camion an en aneren Tank ëmzepompelen.
D’CGDIS-Mataarbechter a spezielle Chemikalie-Schutzkostümer, deels mat Sauerstofffläschen um Réck ware stonnelaang domat beschäftegt, d’Leck ze stoppen, an d’Salzsaier opzefänken. Ma och d’Flëssegkeet, déi ausgetratt ass an op de Buedem gelaf ass, huet mussen opgefaange ginn. Mat Bindemëttel a Waasser gëtt dës gebonnen an an extra Behälter oftransportéiert.
Zu kengem Ament hätt eng Gefor fir d’Leit bestanen, betount d’Chef de Compagnie. Direkt vun Ufank vum Asaz u wier e Schutzperimeter ageriicht ginn.
Eng 70 Pompjeeën aus verschiddenen Zentre wéi Réiser, Beetebuerg, der Stad an e Spezialgrupp waren a sinn aktuell nach am Asaz. Fir de CGDIS en net alldeeglechen Asaz, “mee mir schaffen am Alldag drun, dass mer sou vill wéi méiglech Formatioune maachen, dass mer genau dee Moment, wou dann en Asaz kënnt, drop preparéiert sinn”, sou d’Annick Baustert.
Géint 10.30 Auer war d’Aire de Berchem an Direktioun Stad nees fir den Trafic op.
