De Brand krute mer vun direkt e puer RTL Mobile Reporter matgedeelt. Deels ware grouss Dampwolleken ze gesinn, grad ewéi och Flamen, déi tëscht de Gebaier eropgeschloe sinn.
Op der Plaz ass dann z’erkennen, datt et e Feier an engem Haus, wat u béide Säiten ugebaut ass, ausgebrach ass. D’Pompjeeë si mat méi Ekippen an zwou grousse Leederen am Asaz, fir d’Feier anzedämmen respektiv ënner Kontroll ze kréien. Vun der Plaz heescht et, datt d’Feier am Eefamilljenhaus géint 20.15 Auer um Späicher ausgebrach ass. D’Flamen hunn och op de Späicher vum Nopeschhaus iwwergegraff. D’Awunner vu béiden Haiser goufen evakuéiert, blesséiert gouf beim Tëschefall keen.
Kuerz no 22 Auer konnten déi ronn 40 Pompjeeën, déi mat siwe bis aacht Ween am Asaz waren, d’Feier läschen. Dono awer goufen nach Deeler vum Gespär a vum Daach erausgeschnidden, fir datt d’Feier net nach eng Kéier nei ugoe kann.
