Déi amerikanesch Entreprise AI, déi och ChatGPT entwéckelt huet, huet elo eng nei Applikatioun erausbruecht.

Dës benotzt kënschtlech Intelligenz, fir realistesch Videoen ze kreéieren. Dat Ganzt nennt sech "Sora" a ka Videoe bis zu enger Längt vun enger Minutt produzéieren. Et misst ee just e kuerze Befeel an Textform aginn, deelt OpenAI um Donneschdeg mat.

Aktuell kéint eng "limitéiert Unzuel u Kënschtler" d'Applikatioun testen. Fir ze demonstréieren, wat Sora alles kann, huet de Chef vun Open-AI, de Sam Altman, d'Leit iwwer X opgefuerdert, hir Proposen anzereechen. E bësse méi spéit, huet den Altman e Video verëffentlecht. Ze gesinn ass en Déier, "hallef Int, hallef Draach", virun engem "wonnerschéine Sonnenënnergang", dat flitt an dobäi en "Hamster am Abenteuer-Outfit" um Réck huet.

Allerdéngs huet Sora nach e puer Schwächten a verwiesselt riets a lénks. Weider feelt et nach un der Kontinuitéit. Wann e Mënsch zum Beispill an e Kichelche bäisst, huet dësen duerno keen Zännofdrock.