Den Henri Kox, de Gilles Hempel an de Jean-Paul Scheuren waren Invité vum Background am Gespréich.

D'Situatioun wier eescht. Et géif massiv u Wunnengen zu abordabele Präisser feelen an do wieren an der Vergaangenheet gréisser Feeler gemaach ginn, esou de Logementsminister Henri Kox. Hie war e Samschdeg de Mëtteg Invité an der Emissioun Background. Dat zesumme mam Gilles Hempel vun der Agence immobilière sociale an dem Jean-Paul Scheuren, President vun der Chambre Immobilière.

Dem Minister seng grouss Prioritéit läit wéi gesot beim Schafe vun abordabelem Wunnraum, grad och an der ëffentlecher Hand. An der Vergaangenheet wiere Feeler gemaach ginn. Ënnert anerem, well Wunnengen zu abordabele Präisser verkaaft goufen, ma duerno hunn dierfen zu Maartpräisser weiderverkaaft ginn. Dofir misst an Zukunft garantéiert ginn, dass dës Wunnengen an der ëffentlecher Hand bleiwen, esou de Minister.

De Gilles Hempel vun der Agence immobilière sociale schätzt, dass den Ament eng 30 bis 35.000 Wunnengen zu Lëtzebuerg feelen – eleng fir déi Leit, déi riskéieren an d'Aarmut ze falen. Deemno geet him déi Obligatioun och net duer, dass 10 Prozent vun de Wunnengen, déi bei engem Projet vun engem private Promoteur gebaut ginn, mussen ënnert dem Marchéspräis offréiert ginn. Hien nennt do d'Beispill vu der Stad Wien, déi decidéiert huet, dass bei Terrainen, déi nei bebaut ginn, zwee Drëttel vu Wunnenge musse fir abordabele Wunnraum genotzt ginn. Esou wier et den Éisträicher gelongen, d'Spekulanten ewechzehalen.

De Jean-Paul Scheuren erwaart sech eng Verbesserung vun der Situatioun, wann d'Gemengen elo mol all en neie PAG hunn. Da wier d'Plangen nämlech wesentlech méi einfach. Zum Beispill missten dann eng ganz Partie manner PAP also Plans d'aménagements particuliers opgestallt ginn, wat bis ewell immens vill Zäit kascht hätt.

Background am Gespréich iwwer d'Wunnsituatioun zu Lëtzebuerg

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.