E Samschdeg ass de Minister fir Landwirtschaft a Sécurité sociale eisen Invité an der Emissioun "Background am Gespréich".

Background am Gespréich - Romain Schneider

Dem Jean Asselborn säi Virstouss, fir vum Etienne Schneider eng kloer Annonce ze verlaangen, war bëssen onnëtz an onglécklech, virun allem vum Zäitpunkt hir. Dat sot den LSAP-Minister Romain Schneider dëse Samschdeg bei eis am Background.

D'LSAP-Fraktioun hätt nämlech an der Woch de Romain Schneider an den Dan Kersch beoptraagt, fir mam Etienne Schneider iwwer seng Zukunft ze schwätzen, wat en Donneschdeg och geschitt wier. Leider wier de Jean Asselborn heiriwwer net informéiert gewiescht an hätt dunn eben déi Ausso op RTL Télé Lëtzebuerg gemaach.

Extrait Romain Schneider (1)

Den Ausseminister Asselborn an de Vize-Premier Schneider hätte sech awer entretemps ausgeschwat

Et deet mir immens Leed, datt den Etienne Schneider d'Regierung verléisst, sou de Romain Schneider weider. Et hätt een ëmmer nees versicht, de Vize-Premier ze iwwerzeegen, fir awer ze bleiwen. Wouhinner dem Etienne Schneider säi Wee elo féiert, wollt de Romain Schneider natierlech net verroden. D'Planunge fir d'Zäit nom Etienne Schneider géingen op alle Fall lafen.

Sollt den LSAP-President Franz Fayot an d'Regierung wiesselen, kéint de Poste vum Parteichef nei besat sinn. D'Francine Closener schéngt jo net onintresséiert ze sinn. Et misst een elo ofwaarden, seet de Romain Schneider, ma hie kéint sech déi fréier Staatssekretärin awer op deem Poste virstellen.

De Romain Schneider ass elo méi ewéi 10 Joer an der Regierung. Hie wéilt seng Mandater op alle Fall fäerdeg maachen, sou de Politiker aus dem Norden. Wat duerno ass, wéisst hien nach net. Et misst een awer wëssen, wéini et duer geet.

Wat de Ressort Landwirtschaft ugeet missten d'Baueren hir Contributioun am Kampf géint de Klimawandel leeschten. Ënner anerem wäerte Changementer beim Féiere vu Gülle kommen. Och d'Biogasanlage sollen nees belieft ginn. D'Bauere wäerten och berode ginn a sollen eng gratis Bestandsopnam vum Betrib gemaach kréien. Et sollen och weider Begleet-Mesuren definéiert ginn.

De Landwirtschaftsminister Schneider wëll op alle Fall net toleréieren, datt bei der Klima-Thematik just mam Fanger op d'Bauere géing gewise ginn. D'Kriticken un de Bauere wiere ganz dacks net richteg. Et wier vill geschitt an d'Bauere wieren déi Éischt, déi vum Klimawandel betraff wieren.

Extrait Romain Schneider (2)

De Bio-Aktiounsplang soll am Januar presentéiert ginn. Ënner anerem wäerten d'Primmen no uewen adaptéiert ginn fir d'Biolandwirtschaft ze fërderen. Déi ambitiéis Bio-Ziler wieren op alle Fall realistesch, sou de Minister.

A puncto afrikanesch Schwéngspescht misst ee weider d'Aen ophalen, obwuel allen 337 Tester, déi zu Lëtzebuerg gemaach goufen, negativ waren. Den Zonk vu Grass op déi franséisch Grenz wier fäerdeg an d'Pläng wiere prett, fir dës Protectiouns-Clôture och a Richtung Norden auszebauen, sollt eng Gefor do bestoen.

De Sozialminister Romain Schneider seet als Reaktioun op d'Plainte vu Greenpeace, datt et zënter Jore Beméiunge géing ginn, fir de Pensiounsfong méi nohalteg ze gestalten. Natierlech missten d'finanziell Risken awer iwwerbléckt ginn.

Vum Prinzip hir kéint et dann net sinn, datt zu Lëtzebuerg privat Spideeler entstinn. Rezent gouf et jo e Geriichtsurteel, wat de Wee fräi mécht, fir IRMen a Privat-Praxen ze installéieren.

Am Ufank vum neie Joer gëtt e Gesetzprojet deposéiert, wat déi Fro reegelt. Fir de Sozialminister ass et op alle Fall kloer, datt déi schwéier Apparater an de Spideeler solle bleiwen oder an Antenne vu Spideeler solle funktionéieren.
Et kéint een awer mat weideren Offeren eraus op d'Land goen. Et kéinten Antennen zu Wolz, Diddeleng oder am Osten opgoen, kéint de Minister sech virstellen.

Extrait Romain Schneider (3)

Den Tiers-Payant soll jo kommen. Dat heescht, de Patient muss d'Sue fir d'Dokter-Rechnung net méi virstrecken. Et wier een amgaangen, un informatesche Systemer ze schaffen, déi déi finanziell Fluxe soll reegelen. 2021 kéinte Pilotprojete gestart ginn, bis 2023 soll de System dann definitiv funktionéieren.

D'Gesondheets-App vun der AMMD wier an deem Kontext keng Konkurrenz, mä eng Plus-Value. Beim annoncéierte Gesondheetsdësch soll am Januar elo zesumme mat de Partner d'Agenda festgeluecht ginn.

De Romain Schneider war am Background am Gespréich
Et gouf ënner anerem iwwert d'Baueren an de Klimaschutz awer och ëm d'Zukunft vun der LSAP nom Etienne Schneider geschwat.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.