E Samschdeg war den CSV-Parteipresident Frank Engel eisen Invité an der Emissioun "Background am Gespréich".

Méi Transparenz a méi Novollzéibarkeet déngt dem Haff an der Institutioun vum Grand-Duc a schued net, dat sot den CSV-Parteipresident Frank Engel an eiser Emissioun Background am Gespréich am Kontext vum Rapport vum Jeannot Waringo iwwert d'Cour grande-ducale.

Background am Gespréich: Frank Engel

Wann et Prozeduren gëtt, déi an där do Form net weider bestoe kënne, da missten déi geännert ginn. De Frank Engel huet hei konkret op d'Astellungspolitik vum Haff verwisen.

E prinzipiellt Afrostellen vun der Monarchie hält den CSV-Chef net néideg.

Datt d'Enquête mam Averständnis vum Grand-Duc geschitt wier, géif weisen, datt mer an enger Demarche sinn fir eppes ze verbesseren, net fir eppes ofzeschafen. D'Aart a Weis wéi de Grand-Duc mat den aneren Institutiounen interagéiert, wier antëscht absolut zäitgeméiss. Déi proposéiert Changementer an der Verfassung géifen dem Grand-Duc och net schueden.

Ob d'Konklusioune vum Waringo-Rapport d'Monarchie zu Lëtzebuerg an eng schwéier Kris géif stierzen, kéint hien net soen, sou nach de Frank Engel, sou laang hien de Rapport net gesinn hätt. Dee Rapport soll an den nächste puer Wochen public gemaach ginn.

Der Regierung si Kollateralschied egal

Schaarf Kritik koum un der Regierung hirer aktueller Klimaschutzpolitik. Den nationale Klima- an Energieplang nennt de Frank Engel "unausgegoren, wäit iwwert d'Méiglechkeet, déi den aktuellen Instrumentarium bitt erausschéissend a sozial absolut onausgewogen".

Datt den CO2-Ausstouss am Transport duerch eng Hausse vun den Accisen gebremst gëtt, dorunner gleeft eisen Invité net. Dat géif just Leit belaaschten, déi op den Auto ugewisen sinn. Vill méi sënnvoll wier en Transitverbuet fir Camionen. Wann dat am Tiroul geet, firwat net hei?

Wuel misst ee bestëmmte Verhalensweisen an de Grëff kréien. Dat géif een awer net erreechen, andeems een elo d'Leit ausquëtscht, déi haut keng Alternativen hunn. D'Frais de déplacement elo ze reforméieren, dat hätt nach gefeelt, sou de Frank Engel. Der Regierung wieren awer einfach Kollateralschied an där Hallschent vun der Populatioun egal, déi se net gewielt hätt.

Net verstoen kann de Frank Engel och net, firwat Blo-Rout-Gréng der Waasserstofftechnik keng Chance gëtt a just um Elektro géif festhalen.

Lëtzebuerg wier dat eenzegt Land, wat d'Initiative vun der éisträichescher Presidence an deem Beräich verweigert hätt. Hei géif just vum batteriegeluedenen Auto fabuléiert, dat wier ee Witz.

Mir mussen de Perimeter erweideren

Fir de Frank Engel ass et kloer, datt de fräie Maart de Wunnengsproblem zu Lëtzebuerg net selwer léisst. Déi ëffentlech Hand misst vill méi däitlech agräifen.

D'Reform vun der Grondsteier dierft net déi treffen, déi Terrainen fir hir Kanner halen. All déi aner, déi aus Spekulatiounsgrënn handelen, missten et awer finanziell ze spiere kréien. Eng Gréisstenuerdnung konnt de Frank Engel net nennen.

D'CSV hält och weider un hirer Iwwerzeegung fest, datt een de Perimeter misst opmaachen. Do wou et landesplaneresch Sënn mécht. Alles anescht géif net duergoen a géif de Staat och immens vill kaschten.

CSV kritt net genuch gelauschtert

An der Emissioun Background, huet de Parteipresident vun der gréisster Oppositiounspartei och säi Bedaueren driwwer ausgedréckt, datt d'CSV wuel vill proposéiere géif an nach méi proposéiere wëll. Ma déi Proposen géifen net ëmmer deen néidegen Uklang fannen. Datt d'Majoritéit sech sou verhält, wier quasi normal. Vill méi huet de Frank Engel bedauert, datt och d'Press der Partei hir Proposen "net sou an der Déift begleet hätt".

An engems huet de fréieren Europadeputéierten zouginn, datt d'CSV bei de leschte puer Walen sech vun de Suergen vun de Leit distanzéiert hätt. Och wieren déi Chrëschtlechsozial bei de Jonken deels als "verstëbsten Draach" riwwer komm. Do hätt een d'Ambitioun dat ze änneren. Et misst een do och no Weeër sichen, fir nach un d'Wieler ze kommen.

Engel kandidéiert bei der nächster Geleeënheet, déi sech bitt

Ugeschwat op den internen Funktionnement an der CSV, huet de Frank Engel zouginn, datt d'Zesummenaarbecht mat der Fraktioun no sengem Vott als President virun engem Joer e bësschen holpereg war. Hie géif awer gutt mat der Fraktioun eens ginn an et géif och kee Concours, ob wien méi gelauschtert géif. Hie wier sécher awer net onfrou driwwer, fir nees an noer Zukunft e politescht Mandat z'iwwerhuelen a géif och sécher kandidéieren bei der nächster Geleeënheet, déi sech bitt.

Fir konkret ze sinn bei den nächste Chamberwalen 2023, déi sollten, wann et dem Frank Engel nogeet, op deem selwechten Dag ofgehale ginn wéi d'Gemengewalen.

An net wéi annoncéiert mat engem Ecart vun e puer Méint.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.