E Samschdeg waren d'Presidentin vum Mouveco, d'Presidentin vum OGBL an der CSL an den UEL-President eis Invitéen an der Emissioun Background am Gespréich.

Eng Mëschung vu Fuerderunge fir d’Zukunft an awer och vill Realismus. An der Emissioun Background am Gespréich hunn d'Vertrieder vum OGBL, vum Mouvement Ecologique a vun der Union des Entreprises verschidde Léieren aus der Corona-Kris gezunn an aner Vuen gewisen, wéi et no der Kris soll weidergoen.

D’Zukunft nom Corona – Fuerderungen a Realismus
E Samschdeg waren d'Presidentin vum Mouveco, d'Presidentin vum OGBL an der CSL an den UEL-President eis Invitéen an der Emissioun Background am Gespréich.

D’Presidentin vum Mouvement Ecologique, Blanche Weber, sot duerch d’Corona-Kris hätt ee festgestallt wéi eng Problemer de Verloscht u Biodiversitéit, den Transport a Konsum vun onnéidege Produkter an déi laang Weeër an der Liwwerungskette mat sech bréngen. D'Globaliséierung wier elo a Fro gestallt an et misst een erëm méi regional wirtschaften. Iwwerspëtzt sot d’Nora Back, Presidentin vum OGBL, d’klimatesch a sozial Problemer wieren drop zeréckzeféieren, datt multinational Konzerner ze vill Muecht hätten.

De Patronatsvertrieder Nicolas Buck sot iwwerspëtzt, den OGBL an de Mouvement Ecologique géingen "eis zeréck an de Mëttelalter bréngen". De President vun der UEL war der Meenung, datt onbedéngt misst investéiert ginn an d’administrativ Weeër misste vereinfacht ginn. Op kee Fall sollen d’Steiere fir d’Mëttelschicht an d’Betriber an d’Luucht goen. Fir d’Blanche Weber misst een onbedéngt Digital-Steieren, Verméigenssteieren, CO2-Steieren an d’A faassen. Well et kéint net sinn, datt ee klenge Restaurant wéinst der Kris ënnergeet, mä Amazon Milliarde-Gewënner mécht. "Iwwerzeegunge mussen iwwerduecht ginn", sou de Nicolas Buck. Bei all den Iddie misst een awer realistesch bleiwen an d’Konsequenzen am Kapp hunn, zum Beispill vun enger wirtschaftlecher Entschleunegung op d’Staatsfinanzen.

Background: Blanche Weber, Nora Back an Nicolas Buck

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.