De President vum House of Automobile an de Mobilitéitsminister hunn iwwert d'Zukunft vun der Mobilitéit geschwat.

D'Regierung wéilt net vun haut op muer e reng elektresche Leasing-Fuerpark duerchsetzen, dat wier och net realistesch.

Mat där Ausso berouegt de Mobilitéits-Minister François Bausch d'Gemidder an der Autosbranche.

Ënner anerem d'House of Automobile hat den Energieminister Claude Turmes schaarf attackéiert, nodeems dee rezent annoncéiert hat, datt beim Leasing an Zukunft just nach Elektrogefierer steierlech begënschtegt géinge ginn.

De Claude Turmes wier bësse falsch verstane ginn, argumentéiert de Ministerkolleg François Bausch an der Emissioun Background.

Resumé Background: Bausch-Pirsch
De President vum House of Automobile an de Mobilitéitsminister hunn iwwert d'Zukunft vun der Mobilitéit geschwat.

D'Richtung an d'Zil wieren einfach déi, datt mer no an no vum thermesche Moteur missten ewechkommen an datt d'Leasing-Modalitéite wäerten adaptéiert ginn.

Et wier nach näischt konkret an et wäert ee sech nach mat allen Acteuren un en Dësch setzen, sou de Mobilitéitsminister Bausch.

50% Elektroautoen an Hybriden bis 2030, dat wier eng Zilsetzung vu viru laanger Zäit gewiescht, déi leider net realistesch wier, seet de François Bausch.

D'Eropsetze vun der Primme vun den Elektrogefierer hätt bis ewell leider keen Effet gehat, d'Leit géingen nach ofwaarden, sou den Ernest Pirsch vum House of Automobile, deen och Invité am Background war. Hien hätt sech gewënscht, datt an der aktueller Krisesituatioun och de Kaf vun ëmweltfrëndleche Verbrenner-Gefierer finanziell ënnerstëtzt gi wier

A punkto Infrastrukturen ass Lëtzebuerg elo ronn op der Hallschent vun den 800 Elektro-Bornen, déi bis 2020 geplangt waren.

Et géif awer gutt Noriichte ginn, sou de Minister Bausch: Zu Lëtzebuerg solle bis Enn 2021 85 Super-Chargeuren installéiert ginn. Dat si Bornen, wou Elektroautoe bannent 10 Minutte kënne geluede ginn, net just op den Autobunnen, mä och op de groussen Nationalen.

Da sollen och Aidë kommen, fir Garagen a Privatstéit, déi bei sech Bornen installéieren.

A wéi wäit gëtt de Plug-In Hybrid gefërdert?

D'Ministeren Turmes an Dieschbourg hätte verlaude gelooss, datt dee Modell keng Zukunft hätt, beklot sech den Ernest Pirsch, deen op déi aktuell Primme verweist.

Dee Modell wäert weider consideréiert ginn, seet de François Bausch, mä deen Auto misst natierlech richteg genotzt ginn an et kéint zum Beispill net sinn, datt fir Déngschtween mat dëser Technologie och nach Bensinns-Kaarte verdeelt ginn.

Bei den Technologië soll een awer allgemeng oppebleiwen, sou de Minister. Och de Waasserstoff kéint interessant ginn a kéint d'Elektromobilitéit ergänzen.

Wou sech déi zwéin Invitéë wierklech net eens ware war beim Thema Diesel: De Vetrieder aus der Autosbranche gleeft un eng Renaissance.

De Minister äntwert, datt net méi Techniken onnëtz solle gefërdert ginn, wann et anerer gëtt, déi besser wieren.

Fir den Ernest Pirsch spillen d'individuell Mobilitéit, den Auto an och de Verbrennungsmoteur 2030 nach ëmmer eng grouss Roll.

De François Bausch wëll fir säin Deel keng Politik géint den Auto maachen, mä hie plädéiert fir eng nei Mobilitéit, déi en Zesummespill vun alle Verkéiersmëttele wier, déi all sollte matenee kombinéiert ginn. Mir stéingen op alle Fall um Virowend vun enger grousser Mobilitéits-Revolutioun.

Background am Gespréich: Ernest Pirsch a François Bausch

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.