Déi gréng Justiz- a Kulturministesch war e Samschdeg eis Invitée an der Emissioun Background am Gespréich.

Et ass nach net kloer, wat decidéiert gëtt, a soulaang keng Decisioun geholl gouf, kënne mer och net driwwer diskutéieren. Dat sot d'Sam Tanson.

D'Zuele géifen erofgoen, mä d'Fro wär, ob dat duer geet, sou d'Sam Tanson. D'Vakanz an d'Feierdeeg sti jo virun der Dier.

Mesurë vum aktuelle Gesetz falsch ausgeluecht

Haut kéint ee scho soen, datt verschidde Mesurë vum aktuelle Covidgesetz falsch ausgeluecht géife ginn. Zum Beispill wat den Alkoholkonsum am ëffentleche Raum ugeet. Outdoorbaren, déi an de leschten Deeg opgaange sinn, wiere weder de Wonsch vun der Regierung nach vum Legislateur. D'Regierung schafft der grénger Ministesch no un enger Laangzäitstrategie. Si wier och Demandeur, datt no der Pandemie Bilan gezu gëtt.

Falsch wier et awer fir ze soen, datt de Grand-Duché en extrem liberale Wee gaangen ass. D'Restriktiounen am Private wieren och iwwert de Summer streng gewiescht. Et kéint een net à la légère Rechter aschneiden, sou d'Sam Tanson. Mir hätten elo schonn e ganz speziellen Ëmgang mat eise Rechter an dat hätt en Impakt op d'Gesellschaft.

An der Regierung géif de Collectif stëmmen. D'Decisioune géif een zesummen huelen. Wann Diskussioune wieren, da wieren et grondsätzlecher a keng „Grabenkämpf“.

Klimakris an ëffentlechen Transport

Datt Bus, Tram an Zuch et elo méi schwéier hunn, hätt näischt mam ëffentlechen Transport u sech ze dinn, ma éischter wéinst der Angscht, déi Leit virun zouene Raim hunn. Nieft der Coronakris géif nämlech och d'Klimakris bleiwen. Si géif dovunner ausgoen, datt d'Pandemie d'Consciencen awer och ännere kann. An datt d'Mënschen net do weider maachen, wou se virun der Kris stoungen, mä deels och Gewunnechten, zum Positiven, änneren.

Ugeschwat op déi rezent Ëmfroen an deenen déi Gréng un Zoustëmmung verluer hunn, huet d'Sam Tanson gemengt, et hätt een an de leschte Méint eng ganz Rei gréng Projeten op de Wee bruecht an et géif ee weider seng Aarbecht maache wéi virdrun. Zum Beispill duerch déi rekordhéich Investissementer an d'Zuchinfrastruktur.

Geheim Dossiere bei Police a Justiz

Op hir zwee Ressorte Justiz an d'Kultur ugeschwat, sot d'Ministesch, d'CSV-Deputéiert Gilles Roth a Laurent Mosar hätten d'lescht Joer mat hirer Kritik un de geheime Fichiere bei Justiz a Police hir Aarbecht gemaach. D'Mëssstänn wieren elo am Gaangen, zesummen opgeschafft ze ginn. Am Interessi vun de Bierger. E Freideg huet de Regierungsrot säin Accord ginn fir e Gesetzesprojet iwwert den Traitement vu perséinlechen Donnéeën an de Fichiere vun der Police.

An dat neit Jugendschutzgesetz da géif kloer drastoe kommen, datt kee Mineur dierf an engem Erwuesseneprisong agespaart ginn.

D'Kritik, déi dacks am Kontext vun der Drogekriminalitéit geäussert gëtt, datt de Parquet dacks Dealer géife lafe loossen, léisst d'Justizministesch net gëllen. Et wier an der Lescht vill repressiv agéiert ginn. Et gëtt poursuivéiert an et gëtt condamnéiert, mä de Problem wier komplex a misst och gesellschaftlech ugaange ginn.

Artiste stelle sech d'Fro, der Kultur de Réck ze dréinen

Ass shoppe méi wichteg wéi Kultur? Déi Fro ass gestallt ginn, nodeems Theateren a Kinoen hu missen zoumaachen, d'Butteker awer weider däerfen op hunn. D'Sam Tanson versteet d'Kritik. Si huet dat och bedauert. Et sollt een awer och net vergiessen, datt d'Kris gemeinsam soll gestemmt ginn. Dowéinst misst och all Secteur Aschränkungen agoen. Wat Muséeën an d'Bibliothéiken ugeet, sot d'Kulturministesch, datt si frou wier, datt dësen Deel vum Kultursecteur konnt op bleiwen, well een hei wéi an engem Commerce de Mask unhale kann a sech och duerch de Raum beweegt. Dat wier an anere Länner net esou gehandhaabt ginn, ma hei hätt een awer wëllen e Stéck Kultur bäibehalen.

Wat dem Sam Tanson am meeschte Suerge mécht, ass, datt aktuell vill Artiste sech d’Fro stellen, ob se solle weider maachen. Eng Rëtsch Artiste géife sech iwwerleeën, ob se net sollen der Kultur de Réck dréinen, well et ze vill schwiereg wier.

Dofir hätt een d’Aiden e Freideg verlängert a verstäerkt. Déi lescht Joren wären esou vill Efforte bei der Professionaliséierung am Kulturberäich gemaach ginn, datt et katastrophal wier, wann een dat alles géif verléieren, seet d’Ministesch.

Et hätt een eng Perspektiv. Et wäert besser goen. Dofir hofft d’Kulturministesch, datt een de Secteur nach iwwert dës schwéier Zäit gerett kritt.

Background am Gespréich vum 19. Dezember - Sam Tanson

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.