Den neie Generalsekretär vun der CSV war e Samschdeg eisen Invité an der Emissioun "Background am Gespréich".

Mir spieren eng nei Dynamik an der Partei an ech hu richteg Loscht Politik ze maachen, dat sot den neien CSV-Generalsekretär Christophe Hansen bei eis an der Emissioun Background am Gespréich.

Den aktuellen Europadeputéierten huet duerchblécke gelooss, mat der CSV 2023 an d'Chamberwalen ze goen. Säin Zil wier ëmmer gewiescht, eng Kéier op nationalem Niveau politesch Verantwortung z'iwwerhuelen. Op europäeschen a kommunalem Niveau hätt hie lo schonn Erfarungen gesammelt a wier amgaang, säi Profil ze schäerfen.  Dat kéint nëmmen am Interêt vun der Saach sinn. Den Ament hätt hien awer nach Loscht, seng grouss Dossieren am Europaparlament ofzeschléissen.

De Christophe Hansen hofft, datt nach virun den nächste Walen e puer Jonker Plaz an der Chamber gemaach kréien, fir virun de Walen méi eng grouss Visibilitéit ze kréien. Hie géif op alle Fall an deem Sënn d'Gespréich mat deene sichen, déi schonn op eng laang politesch Carrière zréckkucke kënnen.

Keen Handlungsbedarf bei der Finanzgestioun

Déi Chrëschtlechsozial wëllen d'Kapitel Frank Engel ee fir allemol hannert sech loossen. De positiven Driff, deen ee lo spiere géif, misst een elo notzen.

De Christophe Hansen huet am Background awer confirméiert, datt de Parquet am Kontext vun der ASBL Frëndeskreess eng weider Perquisitioun duerchgefouert huet. D'Justiz sollt elo hir Aarbecht maachen. "Mir hunn eisen Deel gemaach", sou den Nordpolitiker. Intern wier alles opgeschafft ginn.

Den neien CSV-Generalsekretär gesäit dann och keen direkten Handlungsbedarf, fir déi intern Gestioun vun de Finanzen méi ze professionaliséieren a sech schrëftlech Prozeduren ze ginn. Datt sou schrëftlech Prozedure feelen, hat den externen Audit iwwert d'Parteifinanze festgestallt. Déi hätt een awer ni gebraucht, sou de Christophe Hansen, deen d'Problemer, déi et gouf eleng un der Persoun Frank Engel festmécht. D'Partei hätt awer lo neien  Tresorier, deen d'Bicher genee ënnert d'Lupp géing huelen, esou de Christophe Hansen. De Kopleschter Buergermeeschter Thierry Schuman ass Member vum Verwaltungsrot bei der BGL BNP Paribas. Et wier een elo sou opgestallt, datt dat klappt an Zukunft.

Den Trend bei de Memberen weist no uewen

D'CSV soll mat neien Duebelspëtzten en neie Start an Ugrëff huelen. Eng vun den éischte groussen Aufgaben vun der neier Parteispëtzt wier et an e strukturéierten Dialog ze kommen.

D'Basisorganisatiounen, Net -Lëtzebuerger solle mat abezu ginn. Den Europadeputéierten nennt dat ''Back to the roots'', zeréck bei d'Originnen. Et wär keng Annonce aus Angscht, Leit ze verléieren. An der Vergaangenheet hätt een et immens gutt hi kritt, eng Politik aus engem Goss ze maachen.

Dem Christophe Hansen no hätt d'CSV trotz den turbulenten Zäiten, nach ëmmer iwwer 10.000 Memberen. Dat géif sech vun Dag zu Dag änneren. Den Trend géif  awer elo no uewen weisen, esou den CSV-Generalsekretär. Op mannst him géintiwwer hätt och kee Member gesot, sech dem Frank Engel fir deem seng nei Partei unzeschléissen.

Och den Avis vu Leit, vun Experten vu baussen, soll méi mat erageholl ginn. Et wéilt ee Solutiounen ausschaffen, déi vun 80,90% vun der Gesellschaft gedroe ginn an net nëmmen Favoritismus fir déi eng oder déi Aner ze maachen.  An der Klimapolitik géif et net nëmmen duergoen, mat "Ziler ronderëm ze puchen" mä et misst ee kucken, wéi een déi Ziler realistesch erreeche kann. An net nëmmen zum Beispill op Elektromobilitéit setzen. Nohaltegkeet misst awer sozialverträglech sinn.

Bis elo nach keng ofschléissend CSV-Positioun a Steierfroen

Dem Frank Engel seng Iwwerleeungen zu enger Ierfschaftssteier a Räichesteier huet de Christophe Hansen als Summerlach-Sujet ofgedoen.

De Revenu, deen eng Ierfschaftssteier theoretesch brénge géif, wier geréng an déi intergenerationell Solidaritéit an der Famill géif domadder kloer beschnidde ginn. De Steierdebat misst ee méi breet féieren a kucken, wéi eng Mesuren wierklech der Staatskeess hëllefen a wéi eng just ideologesch sinn.

Wou d'CSV sech mat der neier Parteispëtzt genee a Steierfroen positionéiert, wier een nach amgaang, an engem Aarbechtsgrupp opzeschaffen. Et géif een am Hierscht um Kongress réischt domadder rauskommen.

Onkoordinéiert Coronarestriktioune maache Reese bal onméiglech

D'lescht Joer gouf den Europadag um 9. Mee hannert zouene Grenzen op ville Plazen an Europa gefeiert och zu Lëtzebuerg. De Christophe Hansen sot sech am Background enttäuscht, wéi d'Kommissioun deen Ament op déi national Alleingäng reagéiert huet. D'Memberlänner hätten hei méi missten op d'Fanger geklappt kréien. Wa Memberstaaten Decisiounen huelen, déi net mam Noper ofgekläert sinn, géif een a Situatiounen kommen, déi Reese bal onméiglech mécht.

Wat den europäeschen Impfcertificat ugeet, wier et un der Verantwortung vun de Vaccinsproduzenten, déi net vun der Ema unerkannt goufen, mä un Europäer verimpft goufen, fir hir Prozedur bei der Europäescher Medikamentenagence ze komplettéieren.

D'Memberstaate missten hirersäits  sech virun allem en Vue vum grénge Pass preparéieren an déi néideg technesch Infrastruktur opbauen.

D'Iwwerleeungen, fir d'Patentrechter fir de Coronavaccin zäitweileg auszesetzen gräift an den Ae vum Christophe Hansen ze kuerz. D'USA missten dann och hiren Exportstopp vläicht ophiewen.

Background am Gespréich mam Christophe Hansen

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.