De Jean-Claude Wiwinius war e Samschdeg eisen Invité an der Emissioun "Background am Gespréich".

"Ech sinn iwwerzeegt, datt d'Bierger Vertrauen an d'Justiz hunn" - dat sot de President vun der Cour Supérieure de Justice Jean-Claude Wiwinius, deen den 2. Juli an d'Pensioun geet a vum Roger Linden ersat gëtt. Hie war e Samschdeg de Mëtteg den Invité am RTL-Background.

Regreten huet de Riichter, datt wärend sengem Mandat de Conseil National de la Justice nach ëmmer net geschaf gouf.

Dëse Gremium soll ënnert anerem d'Riichter ernennen an och iwwert d'Avancementer vun hinnen decidéieren, sou datt d'Onofhängegkeet vun der Magistratur garantéiert wier.

Dat soll awer nach wärend dëser Legislaturperiod de Fall sinn. Dësen neie Gremium muss jo och an der neier Verfassung verankert ginn. Den Avis vum Staatsrot läit iwwerdeem vir.

No der Visitt vum EU-Commissaire Didier Reynders wier dem Jean-Claude Wiwinius no, nees d'Pandora-Béchs vun der Zuel vun de Membere vum Justizrot opgemeet ginn, déi aktuell bei 9 ugesat ass.

Op d'Affär ëm d'juristesch Datebanken JUCHA ugeschwat, wou jo e Bréif vum Martine Solovieff an dem Jean-Claude Wiwinius un de Chamberpresident gaangen war, sot den ierwechte Riichter, datt dësen Dossier lo zou ass.

Mam aktuellen Text vun der neier Verfassung, wou de pouvoir judiciaire nees am Volet iwwert d'Justiz dra steet, ass de Jean-Claude Wiwinius averstanen.

Fir datt d'Delaie vun den Affäre méi kuerz ginn, gëtt d'Zivil-Recht reforméiert: sou sollen d'Kompetenzen fir Friddensriichter op Litige vu bis zu 20.000 Euro verduebelt ginn, och solle schrëftlech Prozeduren duerch mëndlecher ersat ginn, zB Appellen.

D'Schrëftstécker vun den Affekoten sollen iwwerdeem an der Zuel an an der Längt substantiell reduzéiert ginn.

Och am Strofrecht soll dejudiciariséiert ginn, andeems e juge unique siegéiert.

D'Gesetz iwwert d'Effikassitéit vun der Justice gëtt iwwerdeem am Juni vun der Chamber gestëmmt - dat huet RTL géintiwwer, de President vun der Chamberjustizkommissioun, Charel Margue, confirméiert.

De Reproche datt d'Finanzkriminalitéit hei am Land nëmmen "timide" poursuivéiert gëtt, léisst de Jean-Claude Wiwinius iwwerdeem net gëllen. An awer géif et an akute Manktem u Kandidate ginn, déi wëlle Riichter ginn.

Et géife keng Leit fonnt ginn, vläicht kéint dëst och dru leien, datt an Affekoten-Etüde méi verdéngt gëtt, wéi an der Magistratur. En Opmaache vun der Magistratur fir Net-Lëtzebuerger wier net méiglech, mä datt 45 Referendairë sollen agestallt ginn, wier schonn mol e Liichtbléck.

D'Covid-Limitatioune wéi ënnert anerem de Couvre-feu, wiere proportionell gewiescht, an d'Fräiheete wieren net iwwert de Moosse limitéiert ginn, sou d'Meenung vum héije Magistrat.

Background am Gespréich: Jean-Claude Wiwinius

Background am Gespréich mam Jean-Claude Wiwinius - Reportage Jeannot Ries
E Mann, dee sech fir eng onofhängech Justiz, fir d'Séparation des pouvoirs' asetzt.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.