Den neie CEO vu Rothschild war e Samschdeg eisen Invité am Background am Gespréich.

De Staat misst seng Participatiounen a verschiddene Banke verkafen, an déi Suen an de Logement stiechen - dat sot de François Pauly hei op der Antenn, an eiser Emissioun Background am Gespréich.

De François Pauly ass fréiere Generaldirekter vun der BIL an neie Generaldirekter vun der Schwäizer Privatbank Edmond de Rothschild, ass awer och an enger Rei anere Secteuren aktiv, dorënner och Immobilien. Wärend der Finanzkris hätt de Staat vill Suen an d'Banke gestach, haut awer bréicht d'Land keng Participatioun méi a 4 Banken. D'Logementskris wier ze vergläiche mam Neiopbau nom 2. Weltkrich a mat der Stolkris an den 80er Joren, esou de François Pauly, ma hien hätt d'Gefill et géing probéiert ginn ronderëm ze flécken am Plaz Mesure mat Envergure ze huelen.

„Mir brauchen iwwert déi nächst 10 Joer 100.000 Wunnengen hei am Land an déi kënne mer just kréien, wa mer eis déi Moyene ginn. Mir hunn awer eng Chance, déi aner Länner net hunn, mir hunn e Land, dat Finanzmoyenen huet. Mir hunn och eng 2. Chance, an ech mengen, dat entdecke mer réischt, dass mer och genuch Terrainen hunn. Mir sinn net zu Monaco a mir mussen och net Gréngzonen erabréngen, mee wat hëllefe géing wier, dass mer bei all PAG, bei all Autorisatioun 30% méi erlaben, mee dat just fir de Logement abordable. »

Wann de Staat fir zousätzleche Wunnraum suerge géing, géif de Promoteuren näischt fortgeholl ginn. Ma duerch eng méi grouss Offer kéint de Präis awer gedréckt ginn. Et géing hei och net just ëm soziale Wunnraum goen, mee ëm Logement, deen ee sech an der Locatioun leeschte kann. Den Haaptproblem hei am Land wier, dass de Buedem ze deier wier. Donieft wier eng Inflatioun um Logementsmarché entstanen, well och ze vill héich Kreditter accordéiert ginn. Och doduerch géingen d'Präisser klammen, well och deier Objeten e Keefer fannen.

D'Banken da géingen an Zukunft ëmmer méi Konkurrenz kréien duerch spezialiséiert Fintech-Entreprisen. Dofir kéint ee sech an nächster Zäit erwaarden, datt eng Bank déi aner opkeeft fir ze wuessen. Edmond de Rothschild géing sech op Investissementer mat engem laangfristegen Usaz fokusséieren, esou de François Pauly. A sengen Aen hätt den afrikanesche Kontinent vill Potential. Donieft wier och ëmmer méi Interessi do fir sougenannten "Impact financing", dat heescht datt ee seng Suen esou investéiert, datt et e positiven Impakt op d'Gesellschaft huet. Fir de Poste vum Generaldirekter unzehuelen, huet de François Pauly net laang missen iwwerleeën.

„Ech mengen, ech hunn d'Chance an d'Pech gehat, dass ech am Bankesekteur bal op d'Welt komm sinn, well d'LaLux hat deemools nach eng Bank, respektiv mat 22 Joer op der BIL ugefaangen hunn, iergendwéi kann een d'Fangere vun deem Secteur net ewechloossen a wann een dann d'Méiglechkeet huet, nodeems ech elo awer 5 Joer an deem Betrib am Verwaltungsrot war, d'Méiglechkeet kritt do eng Hand mat unzepaken, an souguer eng grouss Hand, vue dass een als Generaldirekter vum ganze Grupp awer grouss Responsabilitéiten huet, war et e bëssen déi lescht sportlech Erausfuerderung an enger Karriär."

Background mam François Pauly


"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video).
Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.