Dëse Samschdeg goung et an der Emissioun "Background am Gespréich" ëm d'Thema Sécherheet.

Gëtt et e Sécherheetsproblem zu Lëtzebuerg oder net?

Ëm déi Fro huet d'Emissioun Background gedréit, mam grénge Policeminister Henri Kox, dem CSV-Deputéierten a Stater Schäffen Laurent Mosar souwéi dem Raoul Schaaf, Direkter vum Comité National de Défense Sociale, do gehéiert den Drogenhëllefszenter Abrigado op der Stater Gare derzou.

Ganz kloer hu mer keen nationale Sécherheetsproblem, seet den Henri Kox. Et gëtt Hotspotte wéi d'Stater Gare, Ettelbréck, Déifferdeng an Esch, sou de Policeminister. Wann een d'Zuelen iwwer 5 Joer kuckt, géingen d'Affären zeréckgoen. D'Iwwerfäll mat Gewalt wiere stabel. Wat aktuell zougeholl huet, wier de Vol mat Gewalt vu Ketten an Aueren. Zejoert gouf et 160 där Fäll, an den éischte 5 Méint vun dësem Joer schonn 187. Dat sollt ee seriö huelen, mä net iwwerbewäerten.

Allgemeng misst een differenzéieren: d'Drogebekämpfung hätt zum Beispill zougeholl, well d'Police um Terrain ganz aktiv ass, huet den Henri Kox erkläert. Déi Presenz um Terrain misst awer sécherlech nach ausgebaut ginn. Et géif een dowéinst massiv rekrutéiere bei der Police an et wär ee méi um Terrain. An der Vergaangenheet wieren d’Effektiver net duergaangen.

Mir hunn e Sécherheetsproblem op verschiddene Plazen am Land, seet par Konter de Laurent Mosar. Et géing keen Dag vergoen, wou net Rieds vun Déifställ oder Iwwerfäll wier an dat géing sech och an den Zuele weisen, déi géingen nämlech eropgoen, trotz Pandemie. An der Groussregioun géingen déi Chifferen dogéint erofgoen, sou den CSV-Politiker.

Dacks wieren et auslännesch mannerjäreg Täter, sou de Laurent Mosar, déi souguer am hellen do Leit géingen iwwerfalen. D'Police misst gestäerkt ginn, ënner anerem sollt op modernen Equipement zeréckgegraff ginn, wéi Bodycams oder Taseren.

Et wier och demotivant fir d'Police, wann Täter no hirer Verhaftung nees direkt géinge fräigelooss ginn. Do misst endlech eppes virugoen bei de Réckname-Accorde mat verschiddene Länner, och wann dat net dem Här Kox seng Responsabilitéit wier, fënnt den CSV-Deputéierten a Stater Schäffen.

A puncto Droge wier d'Situatioun net méi schlëmm, mä anescht ginn, d'Konsumverhalen hätt sech geännert, sot dann de Raoul Schaaf. Plazeweis géif et natierlech Problemer ginn. 50 Mol de selwechte Constat maachen, géing awer net hëllefen, am Sozialberäich wär een éischter op der Sich no de Léisungen, sou de Raoul Schaaf. Wichteg wier, datt eppes géint déi gesellschaftlech Exklusioun ënnerholl gëtt, och wat de Logement ugeet.

Allgemeng war ee sech an der Emissioun eens, datt de Problem vun der Sécherheet komplex ass. Et gëtt net just ee Schëllegen an och net just eng Léisung, dat huet och déi interministeriell Nott gewisen. Gemeinsam misst een no Léisunge sichen.

Background am Gespréich - Thema Sécherheet


"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video).
Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.