Am Background goung et och ëm d'Homosexuelle-Gesetz an Ungarn. Hei war et d'Ausso "Homosexuell ze sinn ass kee Choix, homophob ze si schonn."

D'nächst Woch wäerten déi éischt ënner 18-Jähreg eng Impfinvitatioun kréien. Fir d'éischt kommen déi Jonk mat Virerkrankungen un d'Rei. Dat sot de Premier Xavier Bettel an eiser Emissioun Background.

513.000 Impfunge goufe bis ewell gemaach. 220.000 Leit si komplett geimpft. Et hätt een déi lescht Woch kënnen duebel sou vill impfen, wa mer méi Vaccine kritt hätten, sou de Staatsminister.

Impfzentere sollen och reduzéiert, also no an no zougemaach ginn. A beim Hausdokter soll ee sech geschwë kënnen impfe loossen, huet de Xavier Bettel e Samschdeg de Mëtteg annoncéiert.

Extrait Xavier Bettel - Impfzenteren

Op d'Delta-Variant ugeschwat, sot de Premier, datt Lëtzebuerg keng Insel wier. Een Drëttel vun de Fäll hei am Land si jo aktuell d'Delta-Variant, déi méi ustiechend soll sinn. Mir géifen awer och vill sequenzéieren, dat heescht analyséiere wéi en Typ-Virus et ass. Da géif een och méi fannen. Et hätt een een Dag gehat, wou een ee Fall hat, dat wären dann natierlech 100%.

D'Kräizimpfungen, also no enger 1. Astra-Impfung zum Beispill als 2. Dosis Biontech kréien, do gëtt et nach keng Decisioun zu Lëtzebuerg, ob dat soll gemaach ginn. Wann d'Ema awer hir Recommandatioun ännert, da maache mer dat och, sot de Xavier Bettel. Wann déi Europäesch Medikamentenagence géif den Accord ginn, géif een dat respektéieren. Am Impfzenter géif een dann awer de Choix kréien, ob een en aneren mRNA-Vaccin no enger 1. Astra-Impfung wéilt.

Extrait Xavier Bettel - Kräizimpfungen

A senger Ried op Nationalfeierdag huet de Xavier Bettel d'Krisegestioun vun der Pandemie e Lëtzebuerger "Erfollegsmodell" genannt. U wat géif hien dee Succès fest maachen?, war d'Fro. All Doudegen - et gouf der bis ewell 818 - wär natierlech een ze vill. Mä datt d'Schoule sou mann wéi méiglech zou waren, gehéiert fir mech zum Succès vun der Lëtzebuerger Strategie, huet de Premier geäntwert. Commerce a Servicer hate manner zou wéi deels am Ausland a mir hätten d'Situatioun finanziell gutt gemeeschtert, huet de Xavier Bettel resuméiert.

Xavier Bettel: "Homosexuell ze sinn ass kee Choix, homophob ze si schonn"

Den EU-Sommet an d'Diskussioun iwwert dat ëmstriddent ungarescht Homosexuelle-Gesetz waren och en Thema an der Emissioun. Mäi Coming-Out viru Joren, deemools an engem Radiosinterview hei op RTL, hätt ech dem neien ungaresche Gesetz no net dierfe maachen, well da villäicht Kanner hätte kënnen nolauschteren, sot de Premier am Background.

Politik op Käschte vun anere Leit ze maachen, wier net an der Rei. Den ungaresche Premier Victor Orban wär op engem stramm rietse Wee. Et wär nach e wäite Wee ze goen. Homosexuell ze si wär kee Choix, homophob ze si schonn. E Coming-Out wär net einfach. Et wär e perséinleche Sujet, och wann en net gären domadder wéilt Politik maachen. Toleranz an enger Gesellschaft wär ganz wichteg. Et wier awer elo un der EU-Kommissioun ze kucken, wéi et weidergeet.

Extrait Xavier Bettel - Ungarn
Background am Gespréich mam Xavier Bettel

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.