D'Inneministesch war dëse Samschdeg Invitée an der Emissioun "Background am Gespréich".

"Mir wëlle besteieren, wat den Terrain haut wäert ass, an net wat en 1941 wäert war, well dat ass net gerecht." Esou huet d’LSAP-Inneministesch Taina Bofferding d’Reform vun der Grondsteier erkläert, si war Invitée am Background. D'Zil wier net, d’Grondsteier massiv z’erhéijen an d’Keesen domadder ze fëllen.

Background am Gespréich mam Taina Bofferding

Fir géint d'Spekulatioun ze handelen, misst een der Inneministesch no eng national Spekulatiounssteier aféieren. Bis ewell géingen nëmmen 3 Gemengen eng Taxe op eidel Terrainen a Wunnengen erhiewen, wat och zum Deel u juristeschen Onsécherheete géing leien. D'Donnéeën, déi iwwert d'Reform vun der Grondsteier erakommen, wäerte kéinte par konter genotzt ginn, fir eng Spekulatiounssteier auszeschaffen an domat dann och Terrainen a Wunnengen ze mobiliséieren. D’Iddi vun enger „Lex Koller“-Steier, déi Leit misste bezuelen, déi Wunnenge kafen, mee net hei wunnen, huet d’Taina Bofferding als "sympathesch" bezeechent.

Wat d'Logementsproblematik ugeet, wier jorelaang just constatéiert ginn, datt et e Problem géing ginn, ma et wier näischt geschitt. Dat hätt sech awer elo geännert, sou d'Inneministesch, hir Regierung géing elo an de Marché agräifen, fir eppes z'änneren. Dat iwwert de Baulandvertrag, de Remembrement ministériel, Investissementer an den ëffentleche Wunnengsbau an den neie Pacte Logement. Elo wier per Gesetz virgesinn, datt gebaut gëtt.

Kritik um Pacte Logement gëtt et well d’Regierung am Gesetzprojet den Undeel u Wunnengen „à coût modéré“ bei zukünftege Projeten vun 30% op 20% gesat huet. De Grond wier, sou d’Taina Bofferding, datt eng Rei Gemengen der Regierung soten, mat 30% wieren d’Projeten net méi rentabel, well den Terrain ze deier ass. D’Regierung hätt dowéinst eng innovativ Alternativ decidéiert, sou d’Ministesch. Terrainen déi fir abordabele Wunnraum geduecht sinn, géingen automatesch un d’Gemeng oder un de Staat goen an déi amplaz mat Cash bezuelen, méi Baupotential accordéieren. „Amplaz datt de Promoteur Sue kritt, kritt en 10% méi Baurecht“.

Corona-Steier net vum Dësch

Fir d’Keesen ze fëllen, misst eng gréisser Contributioun vun do kommen, wou d’Sue sinn, sou d’LSAP-Politikerin weider. D’Schold sollt net op déi nächst Generatioune gedréckt ginn an am Sozialen dierft net gespuert ginn, dowéinst wier eng Corona-Steier, wéi hire Partei- a Regierungskolleeg Dan Kersch se proposéiert hat, och nach net vum Dësch. Wann d’Kris bis eriwwer ass, wier et an hiren Aen eng gutt Iddi, wärend enger gewësser Zäit déi Betriber, déi profitéiert hunn, méi héich ze besteieren. Bei der Besteierung vu private Verméige misst een iwwerdeems oppassen, datt een net méi Inegalitéite schaaft.

"Ech weess net, wou de Premierminister erausgeet, hien ass en erwuessene Mann a ka maache wat e wëll. Ech soe just: mech gesäit een net an engem Striplokal", sot d'Taina Bofferding iwwerdeems op d'Fro, wéi si et als Chancëgläichheetsministesch gesäit, datt de Staatsminister esou en Etablissement frequentéiert. D’Méiglechkeet, datt de Xavier Bettel sech beim rausgoe mam Coronavirus ugestach kéint hunn oder anerer kéint ugestach hunn, wier net de Grond, datt d’Selbsttester vun nächstem Weekend un no Hallefnuecht net méi sollen acceptéiert ginn. Déi Tester, fir selwer ze maachen, wieren d’Schwaachtstell am System an dofir géing een hei agéieren – d’Alternativ wier gewiescht, d’Diskoen nees zou ze maachen.

Eng Frechheet géigeniwwer dem CGDIS

"Et ass net sou, datt ech Sträit mat den 102 Gemengen hunn, ma virun allem CSV-Gemenge sinn net frou mat mir", sou d’LSAP-Inneministesch zu de Meenungsverschiddenheete wéinst der Reform vum CGDIS. Si kéint d’Reprochen och net wierklech novollzéien, datt d'Gemengen elo méi déif an d'Täsch misste gräifen. D'Zil, bannent 15 Minutten iwwerall am Land op der Plaz vun engem Tëschefall ze sinn, kéint een net zum 0-Tariff erreechen. Dat wier naiv an eng Frechheet géigeniwwer dem CGDIS. Et géing drëm goen, Liewen ze retten, an dat géing grad emol 1 Prozent vum Budget vun enger Gemeng ausmaachen.

Wat déi fräiwëlleg Pompjeeën ugeet, déi no der Reorganisatioun vun de Rettungsdéngschter net duerch de Medico komm sinn, wieren déi net vum CGDIS ausgeschloss, esou d'Ministesch. Déi fräiwëlleg wiere ganz wichteg a si kéinten och aner Aufgaben iwwerhuelen, wa si fir verschidden Aktivitéiten net méi kéinten agesat ginn.


"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video).
Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.