An der Emissioun "Background am Gespréich"-Spezial gouf iwwer Naturkatastrophen an d'Gestioun dovunner geschwat.

Muss ee sech fir d'Zukunft dru gewinnen a kënnen och méi previsibel Mesurë geholl ginn, fir op sou Evenementer wéi dat uergt Héichwaasser besser virbereet ze sinn? Gutt preparéiert ze sinn, wier net sou einfach, et géing een awer aus sou Situatiounen eng Léier zéien, sou den Tenor an der Emissioun.

Vill Facteure wiere Schold, datt et zu der extremer Héichwaasser-Situatioun vum leschten Donneschdeg konnt kommen.
Et wier eng klimatesch ganz exzeptionell Situatioun mat vill Ree gewiescht, derbäi kéim eng staark Versigelung vum Buedem. Dat sot den Direkter vum Waasserwirtschaftsamt Jean-Paul Lickes am RTL-Background e Samschdeg.

"Et huet geklappt wéi um 'Schnürchen', géif ech bal soen, souwuel an der Cellule de crise, ech si jo och scho méi laang dobäi, wann ech elo géif 10 oder 15 Joer no hanne kucken, a kucke wou ma elo sinn - also do komme ma vu ganz wäit - a wou ma lo stinn, dat ass awer eppes komplett Aneschters, wat ma u previsionellen Instrumenter hunn", sou de Jean-Paul Lickes.

Déi nei Héichwaassergeforen- a Staarkreekaarten hätte sech als korrekt erausgestallt, sot de Jean-Paul Lickes weider an huet dozou opgefuerdert, datt all Bierger se sech op www.waasser.lu ukucke geet. Hie geet mat Bléck op déi aktuell Situatioun net dervunner aus, datt op der Musel mat engem gréisseren Héichwaasser muss gerechent ginn. Allemol wier méi heefeg mat gréisseren Héichwaasser-Evenementer ze rechnen, sou de Jean-Paul Lickes.

Vum Direkter vum Waasserwirtschaftsamt war et och den Appell un all Leit, fir eventuell Schied, déi ee laanscht d'Flëss gesäit, wéi zum Beispill beschiedegt Brécken oder Uwänner via Mail bei der Administratioun ze mellen (degats.inondations@eau.etat.lu).

Wat d'Krisegestioun ugeet, wier et natierlech ëmmer schwéier eng Kris ze preparéieren. Et hätt ee vill dorunner geschafft déi lescht Joren, natierlech géing een och aus dëser Kris léieren, sou de Luc Feller, Haut Commissaire à la Protection Nationale.

„Mir hunn eng ganz Rei Krise gehat, déi duerch de Wiederphenomen provozéiert gi sinn an deene leschte Joren. An all Kris huet eis weider bruecht an der Krisegestioun, et sinn Moyenen en place gesat ginn, fir dass mir besser informéiert sinn, dass ma ee bessere Monitoring hunn. Et si Moyenen en place gesat gi bei de Verwaltungen, fir dee Moment besser kënnen ze intervenéieren", huet de Luc Feller betount.

Resumé vum Background am Gespréich / Rep. Chris Meisch

Geschéie sou Naturkatastrophen elo méi heefeg a léisst sech dat just op de Klimawandel reduzéieren?

„Ech fäerte leider, dat, wat mir elo haut als 100 Järegt gesinn, villäicht dann herno erauskënnt, dass dat elo scho éischter ee 50 oder villäicht just nach een 30 järegt Héichwaasser ass. Dat heescht, mir hunn ee Klimawandel, deen ass einfach net vun der Hand ze weisen, an dat heescht, déi Periodicitéit ass villäicht esou, dass ma awer duerch de Klimawandel méi oft musse mat sou Phenomener rechnen", huet de Jean-Paul Lickes geäntwert.

Op d'Applikatioun GouvAlert ugeschwat, sot de Luc Feller, datt d'App un hir Limitte gestouss wier an duerfir iwwerschafft gëtt, fir an Zukunft méi breet a cibléiert kënnen agesat ze ginn. Nëmmen eng 15.000 Leit haten dës bis ewell erofgelueden.

Wat de Schued an den Haiser ugeet, gëtt Appell gemaach, sou séier wéi méiglech Fotoen ze maachen, de Schued ze dokumentéieren an d'Assurancen ze kontaktéieren an och iwwer Guichet.lu eventuell finanziell Hëllefen no ze sichen. Wann een am Stot Problemer mam Stroum huet, soll ee sech bei engem privaten Elektriker mellen, Creos géing just bis bei, mä net an den Haiser intervenéieren.

Den drëtte Background-Invité Paul Schroeder confirméiert eng gutt Krisegestioun. Den Direkter vum CGDIS sot, et wier ee jo och besser agespillt, well et an de leschte Jore schonn eng Rei sou Evenementer gouf. 550 Leit hätten iwwregens missen evakuéiert, respektiv relogéiert ginn.

Background am Gespréich-Spezial


"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video).
Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.