D'Fedil üübt schaarf Kritik un der Liser-Logementsetüd, déi mam Fanger op d’Promoteure weist.

Trotz datt déi grouss Steierreform op déi laang Bänk gedréckt ginn ass, soll et zu punktuelle steierlechen Upassunge kommen. Dat huet de CGFP-President Romain Wolff an der Emissioun Background-Spezial zur sozialer a politescher Rentrée gefuerdert. Deemno sollen d'Klass 1A ofgeschaaft an d'Barèmen un d'Inflatioun ugepasst ginn.

D'Regierung hätt lo de Choix, fir entweder den Defizit héich ze halen oder nei Steieren anzeféieren, woubäi sech d'CGFP do natierlech dogéint strieft.

Iwwernächst Woch gesi sech d'Gewerkschafte mat der Regierung, fir sech e Bild iwwert d'aktuell Situatioun ze maachen, éier dann am Oktober de Staatsbudget fir d'nächst Joer deponéiert gëtt. D'CGFP bleift dann och bei hirer Fuerderung no enger Tripartite, fir "den Duerchbléck" ze kréien.

D'Meenungen iwwert d'Logements-Etüd vum Liser goungen iwwerdeem auserneen: de Fedil-Direkter huet et net sou stoe gelooss, datt d'Promoteuren déi Schëlleg un der Logementsproblematik wieren an d'Etüd als simplistesch, kontradiktoresch an net komplett bezeechent. Den Haaptprobleem léich dem René Winkin no bei den ëffentleche Baupromoteuren, där hir Produktioun "miserabel" schlecht wier.

Extrait René Winkin

Souwuel d'Patronat wéi d'CGFP ware sech eens, datt misst eng Spekulatiounssteier op Terrainen, déi brooch leien, agefouert an d'Grondsteier iwwerschafft ginn. Just géif heifir den néidege politesche Courage feelen.

Dem Fedil-Direkter René Winkin maachen d'OECD-Mesurë Suergen, duerch déi d'Besteierungsbasen ëmmer méi breet gemaach ginn. An de Betriber wier et duerfir aktuell eng reegelrecht "navigation à vue", well d'Tauxen automatesch géifen eropgoen. Och d'ekologesch Transitioun géif de Betriber Suerge maachen, eng déifgräifend Diskussioun heiriwwer wier net z'ëmgoen.

Eng aner Debatt misst onbedéngt iwwert d'Covid-Legislatioun gefouert ginn, fir d'Protectiounsmesuren an de Betriber z'adaptéieren an zum Beispill dem CovidCheck-System unzepassen.

Den Haaptenjeu fir d'nächst Jore gesäit d'Liser-Generaldirektesch Aline Muller fir d'Wirtschaft an enger oppener Ekonomie kompetitiv ze gestalten an d'sozial Kohesioun z'erhalen.

"Kee weess wéini eng Pandemie en Enn huet", sou d'Aline Muller, där no d'Relance extrem schwéier ze begleede wier, zemools an Zäiten, wou d'Digitaliséierung quasi explodéiert wier.

Eng Ofso un d'Iddi vun der Corona-Steier gouf et souwuel vu Gewerkschafte wéi och vum Patronat. Heimat géifen nëmmen d'Krisegewënner duebel besteiert ginn. D'Fedil gëtt och ze bedenken, datt Enn zejoert d'Avoiren op de Bankkonte substantiell an d'Luucht gaange sinn. D'Iddie vun der Corona-Steier wier onausgeräift an eesäiteg géint d'Betriber gemënzt, sou d'Fedil.

Background am Gespréich / Resumé Danielle Goergen

Invitéiert waren:

d'Generaldirektesch vum Liser, d'Professer Aline Müller

de CGFP-President Romain Wolff

an de Fedil-Direkter René Winkin

Background-Spezial ekonomesch a sozial Rentrée


"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video).
Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.