Dat sot de Georges Bock an onser Emissioun Background hei op RTL.

Dem fréiere Chef vu KPMG Lëtzebuerg no missten d’Leit wëssen, wéi a wou se hir Suen investéieren, ob se um klassesche Wee investéieren oder iwwert nei digital Weeër. An deem Beräich fënnt hien iwweregens, datt d’klassesch Banken méi innovativ misste sinn. De Georges Bock schafft sengersäits aktuell u enger App, fir all Mënsch den Invest an nohalteg Produiten op einfachem Wee zougänglech ze maachen. A sengen Ae kéinten d’Leit mat Suen „Saache beaflossen“, mee hien huet agesinn, datt et och wäert musse Kontrolle ginn fir sécher ze sinn, datt den Invest och tatsächlech dat erreecht, wat den Investisseur wollt. De Georges Bock sot awer hie wier iwwerzeegt, datt d’Finanz muss bei der ekologescher Transitioun mat agebonne ginn.

E weidere Sujet am Background waren d’Steieren. Dem fréiere Steierberoder bei KMPG no ass Lëtzebuerg keng Steieroas, ëmmerhi géingen d’EU an d’OECD dat och net behaapten. Als Géigebeispill huet hien och d’Fonge genannt, déi hei am Land Recettë fir de Staat generéieren, a Frankräich zum Beispill awer net. D‘Attraktivitéit vum Grand-Duché wier op aner Facteuren zeréckzeféieren, dorënner zum Beispill de laangjäregen Knowhow. De Georges Bock huet zouginn, datt et op der enger oder anerer Plaz Blanchiment kéint ginn, mee et géing mat Gesetzer probéiert ginn dofir ze suergen, datt näischt méi „duerch de Filet geet“.

Background am Gespréich: Georges Bock

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.